“Taʼlim mazmuniga eʼtibor” mavzusida Respublika amaliy seminari boʻlib oʻtdi

Sharq hikmatlarida “Agar inson ilm nuri bilan oʻz yoʻlini yoritmasa, zulmat va nodonlik koʻchasida qoladi” deya bejiz taʼkidlanmagan. Kishi qalbining nuri ilm va maʼrifat bilan baquvvat boʻladi. Insoniyatning qadri ham ilm bilan hosil boʻladi. Ilmni egallab olish esa taʼlimdagi bir sanʼatga qiyoslanadi.

Taʼlim mazmun va mohiyatan jamiyatning moddiy va madaniy taraqqiyoti darajasiga borib taqaladi. Umumiy va sohaviy bilimlarga boʻlgan ehtiyoj, taʼlim haqidagi pedagogik gʻoyalar jamiyat taraqqiyotining turli bosqichlarida turlicha ahamiyat kasb etib, oʻzgarib kelgan. Jamiyatning asosiy negizi boʻlgan taʼlim va tarbiya jarayonida insonning sifatlari, dunyoqarashi va turli xil qobiliyatlari shakllanib, oʻsib boradi.

Bugungi kunda mamlakatimizda taʼlim-tarbiyaga qaratilayotgan eʼtibor natijasi oʻlaroq Oʻzbekistonda maʼnan barkamol, intellektual salohiyatga ega yoshlar yetishib chiqmoqda.

Bu borada pedagog kadrlarning salohiyatini yanada oshirish, taʼlimdagi soʻnggi yangiliklardan boxabar boʻlishlari uchun oʻtkazilib kelinayotgan koʻplab seminar-treninglar, forumlar katta ahamiyatga ega.

26-avgust kuni Amudaryo tumanidagi 40-sonli umumtaʼlim maktabida “Taʼlim mazmuniga eʼtibor” mavzusida Respublika amaliy seminari boʻlib oʻtdi.

Seminarda Amudaryo tumani Xalq taʼlimi boʻlimi mudiri oʻrinbosari Ibragim Rajabov, Beruniy tumani taʼlim sifati manitoringi boʻlimi inspektor-metodistlari Botir Yuldashev, Mahmud Razzaqov, Kegeyli tumani taʼlim sifati manitoringi boʻlimi inspektor-metodisti Mambetali Toremuratov, Amudaryo tumani taʼlim sifati manitoringi boʻlimi inspektor-metodisti Rayxon Yakubovalar trenerlik qilishdi.

Amudaryo tumanidagi mavjud 85 ta hamda Beruniy tumanidan tashrif buyurgan 72 ta maktabning oʻquv ishlari boʻyicha direktor oʻrinbosarlariga taʼlim sifati yuqori boʻlmagan maktablarning taʼlim sifatini yangi oʻquv yilida samarali yoʻlga qoʻyish, “Yagona elektron tizimi − erp.maktab.uz” dasuturiy majmuasini maktablarga joriy qilish, pedagog kadrlar salohiyatini oshirish, yangi oʻquv yilidagi dars taqsimoti, Xalqaro tadqiqotlarga tayyorgarlik koʻrish va munosib ishtirok etish boʻyicha batafsil maʼlumot va tushuntirishlar berdilar.

Shuningdek, umumtaʼlim maktablarda oʻquv ishlari boʻyicha direktor oʻrinbosarlarining taʼlim sifatini oshirishga qaratilgan kelgusidagi asosiy vazifalari va ularning masʼuliyati haqida, yangi oʻquv reja va yangi avlod darsliklari haqida tushuntirishlar berilib, kelgusidagi muhim vazifalar belgilab olindi.

Seminar ishtirokchilari trenerlarga oʻzlarini qiziqtirgan savollar bilan murojaat qilib atroflicha javoblar oldilar.

Tuman hokimligining Axborot xizmati.