ИСТИҚЛОЛ БЕРГАН ИМКОНИЯТЛАР МЕНИНГ ФАОЛИЯТИМГА КЕНГ ЙЎЛ ОЧДИ
Жаннатмакон Ўзбекистонимизда инсон қадр-қиммати улуғ ва азиз. Айниқса, истиқлол берган имкониятлар чексиз. Бу дориломон кунларга қанча шукрона айтсак ҳам кам.
Ўз ҳаётим мисолида айтишим мумкинки, истиқлолимиз барча қатори тадбиркорлар учун ҳам жуда кенг имкониятлар эшигини очиб берди. Мустақиллик берган барча имкониятлардан самарали фойдаланган юртдошларимиз қатори биз ҳам оилавий тадбиркорликни йўлга қўйдик. Аввалдан шунга яқин фаолият билан шуғулланиб келаётганимиз сабабли биз тадбиркорликни аҳолининг маънавиятини оширишда жуда керакли бўлган китоб ва турли қўлланмалар, газета ва журналлар, ўқув ва кўргазмали қуроллар кабилар савдосидан бошладик.
Дастлаб туманда “Қорақалпоқкитобсавдотаъминот” бошқарувига қарашли китоб дўконини ташкил қилдим. Китоблар турини кўпайтириш мақсадида “Ўзкитобсавдотаъминот” бошқаруви билан ҳам ҳамкорликни йўлга қўйиб, турли жанрлардаги китоблар ва аҳоли эҳтиёжига кўра ўқув қуроллари савдосини йўлга қўйдим. Шунингдек, ўтган асрнинг 90-йилларида туманда “Матбуот уюшмаси” МЧЖга раислик қилдим. Ўтган даврларда иш фаолиятим давомида ўзим орасида бўлганим: газета ва журналлар, турли китоблардан маънавий озуқа олардим. Бундан эса бошқаларни ҳам баҳраманд қилишни истардим. Шу сабабли китоб ва босма маҳсулотлари савдоси йўналишида ташкил этган фаолиятимизни кенгайтириб, дўконлар сонини кўпайтирдик. Ўзларига керакли китоблар ва бошқа босма маҳсулотларни харид қилаётган туманимиз аҳолиси ҳам бундан жуда мамнун.
Мустақиллик йилларидан то ҳозирги кунларгача тадбиркор давлат томонидан қўллаб-қувватланмоқда. Бу борада қабул қилинаётган давлат раҳбари ва ҳукумат қарорлари, берилаётган имтиёзлардан фойдаланаётган тадбиркорлар қатори биз ҳам элимизга, давлатимизга ва оиламизга наф келтиришга ҳаракат қилмоқдамиз.
Мазкур йилда фаолиятимизни янада кенгайтириб, юртдошларимизнинг ҳордиқ чиқаришлари учун Вахум аҳоли пункти ҳудудида “Озодбой Амирхон” МЧЖга қарашли “Арена” кўнгилочар масканини ташкил қилдик. Ёз мавсуми бошидан буён ташриф буюрганлар бу ерда теннис, бильярд, компьютер ўйинлари билан банд бўлиб, бўш вақтларини мазмунли ўтказишмоқда, турли чироқлар билан безатилган жойларимизда ўтириб, хушхўр музқаймоқларимиздан баҳраманд бўлишмоқда. Шунингдек, ҳудуд аҳолиси тозаланган сув, китоб дўкони ва бинода жойлашган Агробанкнинг туман филиали томонидан ташкил этилган касса хизматларидан фойдаланишмоқда.
Шуни алоҳида таъкидлашни истардимки, истиқлол берган имкониятлар туфайли турмушимиз янада фаровон бўлди. Давлатимиз раҳбарининг сўнгги йиллардаги биз тадбиркорларга қилаётган ғамхўрликларидан илҳомланиб, фаолиятимизни янада кенгайтириш ниятидамиз. Насиб қилса, замонавий кўринишдаги бино қуриб, янгидан китоб ва босма маҳсулотлари савдоси дўконини ташкил қилиш ҳаракатидамиз.
Мустақиллик байрами барчамизга муборак бўлсин. Бундай гўзал байрамларимиз, одамларимиздаги кўтаринки кайфият, энг аввало, юртимиздаги осойишталик билан чамбарчас боғлиқ. Шунинг учун обод ва озод Ватанимизда тинчлик барқарор бўлишини тилаб қоламан.
Озод Давлетов, тадбиркор.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
