ISTIQLOL BERGAN IMKONIYaTLAR MENING FAOLIYaTIMGA KENG YOʻL OChDI

Jannatmakon Oʻzbekistonimizda inson qadr-qimmati ulugʻ va aziz. Ayniqsa, istiqlol bergan imkoniyatlar cheksiz. Bu dorilomon kunlarga qancha shukrona aytsak ham kam. 

Oʻz hayotim misolida aytishim mumkinki, istiqlolimiz barcha qatori tadbirkorlar uchun ham juda keng imkoniyatlar eshigini ochib berdi. Mustaqillik bergan barcha imkoniyatlardan samarali foydalangan yurtdoshlarimiz qatori biz ham oilaviy tadbirkorlikni yoʻlga qoʻydik. Avvaldan shunga yaqin faoliyat bilan shugʻullanib kelayotganimiz sababli biz tadbirkorlikni aholining maʼnaviyatini oshirishda juda kerakli boʻlgan kitob va turli qoʻllanmalar, gazeta va jurnallar, oʻquv va koʻrgazmali qurollar kabilar savdosidan boshladik.

Dastlab tumanda “Qoraqalpoqkitobsavdotaʼminot” boshqaruviga qarashli kitob doʻkonini tashkil qildim. Kitoblar turini koʻpaytirish maqsadida “Oʻzkitobsavdotaʼminot” boshqaruvi bilan ham hamkorlikni yoʻlga qoʻyib, turli janrlardagi kitoblar va aholi ehtiyojiga koʻra oʻquv qurollari savdosini  yoʻlga qoʻydim. Shuningdek, oʻtgan asrning 90-yillarida tumanda “Matbuot uyushmasi” MChJga raislik qildim. Oʻtgan davrlarda ish faoliyatim davomida oʻzim orasida boʻlganim: gazeta va jurnallar, turli kitoblardan maʼnaviy ozuqa olardim. Bundan esa boshqalarni ham bahramand qilishni istardim. Shu sababli kitob va bosma mahsulotlari savdosi yoʻnalishida tashkil etgan faoliyatimizni kengaytirib, doʻkonlar sonini koʻpaytirdik. Oʻzlariga kerakli kitoblar va boshqa bosma mahsulotlarni xarid qilayotgan tumanimiz aholisi ham bundan juda mamnun.

Mustaqillik yillaridan to hozirgi kunlargacha tadbirkor davlat tomonidan qoʻllab-quvvatlanmoqda. Bu borada qabul qilinayotgan davlat rahbari va hukumat qarorlari, berilayotgan imtiyozlardan foydalanayotgan tadbirkorlar qatori biz ham elimizga, davlatimizga va oilamizga naf keltirishga harakat qilmoqdamiz.

Mazkur yilda faoliyatimizni yanada kengaytirib, yurtdoshlarimizning hordiq chiqarishlari uchun Vaxum aholi punkti hududida “Ozodboy Amirxon” MChJga qarashli “Arena” koʻngilochar maskanini tashkil qildik. Yoz mavsumi boshidan buyon tashrif buyurganlar bu yerda tennis, bilyard, kompyuter oʻyinlari bilan band boʻlib, boʻsh vaqtlarini mazmunli oʻtkazishmoqda, turli chiroqlar bilan bezatilgan joylarimizda oʻtirib, xushxoʻr muzqaymoqlarimizdan bahramand boʻlishmoqda. Shuningdek, hudud aholisi tozalangan suv, kitob doʻkoni va binoda joylashgan Agrobankning tuman filiali tomonidan tashkil etilgan kassa xizmatlaridan foydalanishmoqda.

Shuni alohida taʼkidlashni istardimki, istiqlol bergan imkoniyatlar tufayli turmushimiz yanada farovon boʻldi. Davlatimiz rahbarining soʻnggi yillardagi biz tadbirkorlarga qilayotgan gʻamxoʻrliklaridan ilhomlanib, faoliyatimizni yanada kengaytirish niyatidamiz. Nasib qilsa, zamonaviy koʻrinishdagi bino qurib, yangidan kitob va bosma mahsulotlari savdosi doʻkonini tashkil qilish harakatidamiz.

Mustaqillik bayrami barchamizga muborak boʻlsin. Bunday goʻzal bayramlarimiz, odamlarimizdagi koʻtarinki kayfiyat, eng avvalo, yurtimizdagi osoyishtalik bilan chambarchas bogʻliq. Shuning uchun obod va ozod Vatanimizda tinchlik barqaror boʻlishini tilab qolaman.

Ozod Davletov, tadbirkor.