Президент таълим муассасалари агентлиги тизимидаги Амударё туман ихтисослаштирилган мактаби иш бошлади
Бу галги янги ўқув йилининг илк кунида Амударё туманида яна бир қувончли воқеа – Президент таълим муассасалари агентлиги тизимидаги Амударё туман ихтисослаштирилган мактабининг очилиш маросими бўлиб ўтди.
Ушбу таълим масканининг очилиш марсимида туман ҳокими Султонбой Йўлдашев қатнашди ва нутқ сўзлади. Туман ҳокими ушбу қувончли воқеа билан ихтисослаштирилган мактаб маъмуриятини, ўқитувчилар жамоасини, бу даргоҳга илк бор қабул қилинган барча ўқувчиларни ва бутун туманимиз аҳлини самимий табриклади.
Шуни алоҳида таъкидлаш керакки, ушбу бинодан шу вақтга қадар кўплаб иқтидорли ўқувчилар учирма бўлди. Нукус давлат педагогика институти қошидаги собиқ Амударё академик лицейини юзлаб билимли ёшлар тамомлаб, олий ўқув юртларида таҳсил олиб, юртимиз тараққиётига муносиб ҳисса қўшмоқдалар. Кейинчалик академик лицей негизида ташкил қилинган ихтисослаштирилган мактаб-интернати жамоаси ҳам катта натижаларни қўлга киритди.
Эндиликда муҳтарам Президентимизнинг таълим соҳасига қаратаётган эътибори натижасида ушбу юқув юрти Президент таълим муассасалари агентлиги тизимидаги Амударё туман ихтисослаштирилган мактабига айлантирилди.
Тадбирда таълим фахрийси Шавкат Чаршамов сўзга чиқиб, янги ўқув масканига илк бора қадам қўйган барча ўқитувчи-ю, ўқувчиларни “Билимлар куни” билан самимий табриклади. Таълим фахрийси бугунги кунда соҳага қаратилаётган эътибор, ўзлари таълим олган даврдаги қийинчиликлар, пахта далаларида ўтган кунлар ҳақида гапириб, ёшларни яратилаётган имконият ва шароитларнинг қадрига етиб, қунт билан ўқиб, билим олишга чорлади.
Тадбир давомида мазкур таълим масканининг 10-“А” синфига энг юқори кўрсаткич билан қабул қилинган, инглиз, рус тилларида ҳеч қандай қийинчиликларсиз сўзлаша оладиган иқтидорли ўқувчи Отабек Янгибоев тенгдошларини рус ва инглиз тилларида табриклади.
Ихтисослаштирилган мактабга педагоглар ҳамда ўқувчилар адолатли ва шаффоф тизим асосида танлаб олинди. 80 дан ортиқ мактаб ўқувчилари орасидан тест синовлари натижаларига кўра саралаб олинган ўқувчилар бугун ушбу масканда илк маротаба дарсларни бошлашади. Ушбу таълим масканида аниқ ва табиий йўналишда 16 синфда 384 нафар ўқувчи таълим олади. Уларга олий тоифали, юқори малакали 34 нафар педагоглар таълим-тарбия беришади.
10- ва 11-синф ўқувчилари келгусида туманимизда жойлашган ишлаб чиқариш ва хизмат кўрсатиш корхоналарида амалий машғулотлар ўташи уларнинг малакали кадрлар бўлиб етишишига замин яратади.
Президент таълим муассасалари агентлиги тизимидаги янгидан ташкил қилинган Амударё туман ихтисослаштирилган мактабининг ўқитувчилари ва ўқувчиларига бошланаётган янги ўқув йили омад ва муваффақиятлар тилаймиз.
Туман ҳокимлигининг Ахборот хизмати.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
