Prezident taʼlim muassasalari agentligi tizimidagi Amudaryo tuman ixtisoslashtirilgan maktabi ish boshladi
Bu galgi yangi oʻquv yilining ilk kunida Amudaryo tumanida yana bir quvonchli voqea – Prezident taʼlim muassasalari agentligi tizimidagi Amudaryo tuman ixtisoslashtirilgan maktabining ochilish marosimi boʻlib oʻtdi.
Ushbu taʼlim maskanining ochilish marsimida tuman hokimi Sultonboy Yoʻldashev qatnashdi va nutq soʻzladi. Tuman hokimi ushbu quvonchli voqea bilan ixtisoslashtirilgan maktab maʼmuriyatini, oʻqituvchilar jamoasini, bu dargohga ilk bor qabul qilingan barcha oʻquvchilarni va butun tumanimiz ahlini samimiy tabrikladi.
Shuni alohida taʼkidlash kerakki, ushbu binodan shu vaqtga qadar koʻplab iqtidorli oʻquvchilar uchirma boʻldi. Nukus davlat pedagogika instituti qoshidagi sobiq Amudaryo akademik litseyini yuzlab bilimli yoshlar tamomlab, oliy oʻquv yurtlarida tahsil olib, yurtimiz taraqqiyotiga munosib hissa qoʻshmoqdalar. Keyinchalik akademik litsey negizida tashkil qilingan ixtisoslashtirilgan maktab-internati jamoasi ham katta natijalarni qoʻlga kiritdi.
Endilikda muhtaram Prezidentimizning taʼlim sohasiga qaratayotgan eʼtibori natijasida ushbu yuquv yurti Prezident taʼlim muassasalari agentligi tizimidagi Amudaryo tuman ixtisoslashtirilgan maktabiga aylantirildi.
Tadbirda taʼlim faxriysi Shavkat Charshamov soʻzga chiqib, yangi oʻquv maskaniga ilk bora qadam qoʻygan barcha oʻqituvchi-yu, oʻquvchilarni “Bilimlar kuni” bilan samimiy tabrikladi. Taʼlim faxriysi bugungi kunda sohaga qaratilayotgan eʼtibor, oʻzlari taʼlim olgan davrdagi qiyinchiliklar, paxta dalalarida oʻtgan kunlar haqida gapirib, yoshlarni yaratilayotgan imkoniyat va sharoitlarning qadriga yetib, qunt bilan oʻqib, bilim olishga chorladi.
Tadbir davomida mazkur taʼlim maskanining 10-“A” sinfiga eng yuqori koʻrsatkich bilan qabul qilingan, ingliz, rus tillarida hech qanday qiyinchiliklarsiz soʻzlasha oladigan iqtidorli oʻquvchi Otabek Yangiboyev tengdoshlarini rus va ingliz tillarida tabrikladi.
Ixtisoslashtirilgan maktabga pedagoglar hamda oʻquvchilar adolatli va shaffof tizim asosida tanlab olindi. 80 dan ortiq maktab oʻquvchilari orasidan test sinovlari natijalariga koʻra saralab olingan oʻquvchilar bugun ushbu maskanda ilk marotaba darslarni boshlashadi. Ushbu taʼlim maskanida aniq va tabiiy yoʻnalishda 16-sinfda 384 nafar oʻquvchi taʼlim oladi. Ularga oliy toifali, yuqori malakali 34 nafar pedagoglar taʼlim-tarbiya berishadi.
10- va 11-sinf oʻquvchilari kelgusida tumanimizda joylashgan ishlab chiqarish va xizmat koʻrsatish korxonalarida amaliy mashgʻulotlar oʻtashi ularning malakali kadrlar boʻlib yetishishiga zamin yaratadi.
Prezident taʼlim muassasalari agentligi tizimidagi yangidan tashkil qilingan Amudaryo tuman ixtisoslashtirilgan maktabining oʻqituvchilari va oʻquvchilariga boshlanayotgan yangi oʻquv yili omad va muvaffaqiyatlar tilaymiz.
Tuman hokimligining Axborot xizmati.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
