“Меҳр дафтари”га киритилган болаларга ғамхўрлик кўрсатилмоқда

Кейинги йиллар мобайнида аҳолининг ёрдамга мухтож қатламини манзилли ҳимоялаш, уларнинг ҳолидан хабар олиш ва мақсадли кўмак бериш ишларига жиддий эътибор кучайди. Айниқса, етим болалар ва ота-она қарамоғидан маҳрум бўлган болаларни тарбиялаш, уларни ҳаётга тайёрлаш, йўл-йўриқ кўрсатиш, касб эгаллашлари ва ҳаётда ўз ўрнини топишга ёрдам бериш давлат сиёсати даражасига кўтарилди.

Бу борадаги ишларни тизимлаштириш, натижадорлигини ошириш, молиявий маблағлар ҳажмини ошириш ва аниқ мақсадга йўналтириш ишларини янги даражага кўтариш долзарб вазифага айланди. Ушбу мақсад ва вазифалар ижросини таъминлаш мақсадида муҳтарам Президентимизнинг тегишли Фармонига мувофиқ, “Меҳр дафтари” шакиллантирилди.

Жорий йилнинг 31 август куни Амударё тумани ҳокимлиги биносида “Меҳр дафтари”га киритилган етим, ота-она қарамоғидан маҳрум бўлган 9 нафар болага туман ҳокими ўринбосарлари Маҳмуд Шерметов, Гўзал Сабурова, ҳокимлик Болаларни ҳимоя қилиш шўъбаси раҳбари Жаҳонгир Холмуродовлар Мустақиллигимизнинг 31 йиллик байрами муносабати билан ҳар бирининг қиймати 1 млн. сўмни ташкил этувчи мактаб формалари ва ўқув қуролларини топширишди. Болалар бундай эътибор ва ғамҳўрликдан ниҳоятда ҳурсанд бўлишди.

“Меҳр дафтари-оқибат дафтари”. Дарҳақиқат, ушбу дафтарнинг юритилиши орқали биринчидан, болаларнинг ота-она қарамоғидан маҳрум бўлишининг сабаблари ўрганилади ва аниқланган муаммолар бартараф этилади. Иккинчидан, етим болалар ва ота-она қарамоғидан маҳрум бўлган болаларни фарзандликка оладиган оилалар рағбатлантириб борилади. Учинчидан эса ўқув-тарбия муассасаларида тарбияланувчиларни босқичма-босқич фарзандликка, васийликка оладиган оилаларда тарбиялашга ўтказиш чоралари кўрилади.

Қолаверса, етим болаларга меҳр бериш, улар орасидан қобиятли ёшларни юзага чиқариш, уларни ҳаётга тайёрлаш, касбга ўқитиш ва жамият учун манфаатли қатлам доирасини кенгайтириш билан боғлиқ ишлар тизимли равишда олиб борилади.

Ушбу савобли ишларни ташкил этиш, мониторинг қилиш ва назоратга олишни тизимли йўлга қўйиш мақсадида Маҳалла ва оилани қўллаб-қувватлаш вазирлиги маъсул этиб белгиланган.

Вазирлик “Меҳр дафтари”га киритилган етим болалар ва ота-она қарамоғидан маҳрум бўлган болаларнинг ҳар бир шахсига нисбатан алоҳида ёндошиш, уларнинг жинси, ёши, қарашлари, руҳияти, ахлоқ-одоби, ижтимоий муҳитни ўзлаштиришдаги ёндошувлари ва интилишларини ҳисобга олган ҳолда табақалашган тарзда ўрганиб, тегишли чора-тадбирларни амалга ошириши назарда тутилган.

Масалан, ҳар йили камида икки маротаба ўқув-тарбия муассасаларида тарбияланаётган, васийликка, ҳомийликка ва оилага тарбияга олинган қизларнинг ижтимоий ҳолатини ўрганиб боришга алоҳида эътибор қаратилади.

Бир сўз билан айтганда, етим болалар ва ота-она қарамоғидан маҳрум бўлган болаларни ҳимоялашнинг мамлакатимиз тарихида кўзатилмаган янги тизими яратилди. Чунки, мамлакатимизда ёшларга бўлган эътибор, улар қандай ижтимоий аҳволда бўлишидан қатъий назар, доимо юқоридир.

Туман ҳокимлигининг Ахборот хизмати.