“Mehr daftari”ga kiritilgan bolalarga gʻamxoʻrlik koʻrsatilmoqda

Keyingi yillar mobaynida aholining yordamga muxtoj qatlamini manzilli himoyalash, ularning holidan xabar olish va maqsadli koʻmak berish ishlariga jiddiy eʼtibor kuchaydi. Ayniqsa, yetim bolalar va ota-ona qaramogʻidan mahrum boʻlgan bolalarni tarbiyalash, ularni hayotga tayyorlash, yoʻl-yoʻriq koʻrsatish, kasb egallashlari va hayotda oʻz oʻrnini topishga yordam berish davlat siyosati darajasiga koʻtarildi.

Bu boradagi ishlarni tizimlashtirish, natijadorligini oshirish, moliyaviy mablagʻlar hajmini oshirish va aniq maqsadga yoʻnaltirish ishlarini yangi darajaga koʻtarish dolzarb vazifaga aylandi. Ushbu maqsad va vazifalar ijrosini taʼminlash maqsadida muhtaram Prezidentimizning tegishli Farmoniga muvofiq, “Mehr daftari” shakillantirildi.

Joriy yilning 31-avgust kuni Amudaryo tumani hokimligi binosida “Mehr daftari”ga kiritilgan yetim, ota-ona qaramogʻidan mahrum boʻlgan 9 nafar bolaga tuman hokimi oʻrinbosarlari Mahmud Shermetov, Goʻzal Saburova, hokimlik Bolalarni himoya qilish shoʻʼbasi rahbari Jahongir Xolmurodovlar Mustaqilligimizning 31 yillik bayrami munosabati bilan har birining qiymati 1 mln. soʻmni tashkil etuvchi maktab formalari va oʻquv qurollarini topshirishdi. Bolalar bunday eʼtibor va gʻamhoʻrlikdan nihoyatda hursand boʻlishdi.

“Mehr daftari-oqibat daftari”. Darhaqiqat, ushbu daftarning yuritilishi orqali birinchidan, bolalarning ota-ona qaramogʻidan mahrum boʻlishining sabablari oʻrganiladi va aniqlangan muammolar bartaraf etiladi. Ikkinchidan, yetim bolalar va ota-ona qaramogʻidan mahrum boʻlgan bolalarni farzandlikka oladigan oilalar ragʻbatlantirib boriladi. Uchinchidan esa oʻquv-tarbiya muassasalarida tarbiyalanuvchilarni bosqichma-bosqich farzandlikka, vasiylikka oladigan oilalarda tarbiyalashga oʻtkazish choralari koʻriladi.

Qolaversa, yetim bolalarga mehr berish, ular orasidan qobiyatli yoshlarni yuzaga chiqarish, ularni hayotga tayyorlash, kasbga oʻqitish va jamiyat uchun manfaatli qatlam doirasini kengaytirish bilan bogʻliq ishlar tizimli ravishda olib boriladi.

Ushbu savobli ishlarni tashkil etish, monitoring qilish va nazoratga olishni tizimli yoʻlga qoʻyish maqsadida Mahalla va oilani qoʻllab-quvvatlash vazirligi maʼsul etib belgilangan.

Vazirlik “Mehr daftari”ga kiritilgan yetim bolalar va ota-ona qaramogʻidan mahrum boʻlgan bolalarning har bir shaxsiga nisbatan alohida yondoshish, ularning jinsi, yoshi, qarashlari, ruhiyati, axloq-odobi, ijtimoiy muhitni oʻzlashtirishdagi yondoshuvlari va intilishlarini hisobga olgan holda tabaqalashgan tarzda oʻrganib, tegishli chora-tadbirlarni amalga oshirishi nazarda tutilgan.

Masalan, har yili kamida ikki marotaba oʻquv-tarbiya muassasalarida tarbiyalanayotgan, vasiylikka, homiylikka va oilaga tarbiyaga olingan qizlarning ijtimoiy holatini oʻrganib borishga alohida eʼtibor qaratiladi.

Bir soʻz bilan aytganda, yetim bolalar va ota-ona qaramogʻidan mahrum boʻlgan bolalarni himoyalashning mamlakatimiz tarixida koʻzatilmagan yangi tizimi yaratildi. Chunki, mamlakatimizda yoshlarga boʻlgan eʼtibor, ular qanday ijtimoiy ahvolda boʻlishidan qatʼiy nazar, doimo yuqoridir.

Tuman hokimligining Axborot xizmati.