Республика ишчи гуруҳи туманимизга ташриф буюрди

Маълумки, Вазирлар Маҳкамаси томонидан 2022-2023 йилларда маҳаллалар инфратузилмасини ривожлантириш дастурини шакллантириш мақсадида жойларда ишчи гуруҳлар ташкил қилинган эди. Ишчи гуруҳлар ҳудудларда бўлиб, муаммо ва таклифларни ўрганади ҳамда дастур лойиҳасини тайёрлайди.

10 сентябрь куни туманимизга Республика ишчи гуруҳи аъзолари − Ўзбекистон Республикаси инвестициялар ва ташқи савдо Вазири ўринбосари, Қорақалпоғистон Республикасида ташкил қилинган штаб раҳбари Бадриддин Абидов, Қорақалпоғистон Республикаси Вазирлар Кенгаши Раиси ўринбосари Бахытжан Хабибуллаев ва бошқа масъуллар ташриф буюрди.

Дастлаб, ишчи гуруҳ вакиллари Жумуртов шаҳарча фуқаролар йиғинида бўлиб, аҳоли ҳамда маҳаллий Кенгаш депутатлари билан суҳбатлашди.

Шундан сўнг, туман ҳокимлиги биносида маҳалла раислари, ҳоким ёрдамчилари иштирокида йиғилиш бўлиб ўтди.

Йиғилишда, “Инсон қадрини улуғлаш ва фаол маҳалла йили”да мамлакатимиз бўйлаб амалга оширилаётган эзгу ишлар замирида энг аввало, инсон манфаати мужассам эканлиги, шу нуқтаи назардан одамларнинг дардини эшитиш, муаммоларини ҳал этиш, яшаш шароитини яхшилаш, бир сўз билан айтганда уларнинг ўтаётган ҳар бир кунидан рози бўлиб яшашлари учун қулай шароит ва имкониятлар яратиш борасида кўплаб ижобий ишлар олиб борилаётганлиги таъкидланди.

Жумладан, “Инсон қадри учун” эзгу тамойили асосида ишларни ташкил этиш бўйича уй-жой, мактаб, боғча, тиббиёт, маданият, спорт муассасалари ички йўллар, ичимлик сув, электр, газ таъминоти ҳамда ободонлаштириш масалалари билан боғлиқ ишлар тезкор ва юқори суръатларда амалга оширилаётганлиги, бу борадаги ишларни янада жадаллаштириш, хусусан, аҳоли кайфиятига бевосита таъсир кўрастувчи энг долзарб муаммоларни ўрганиш орқали 2022-2023 йилларда маҳаллалар инфратузилмасини ривожлантириш дастурини шакллантириш мақсад қилинганлиги айтиб ўтилди.

Шунингдек, Дастур доирасида ишлар бошланганидан сўнг унга киритилган объектларда қурилиш, таъмирлаш ишларининг бориши жойига чиққан ҳолда назорат қилиш ва мувофиқлаштириш республика штаби томонидан амалга оширилиши таъкидланди. Йиғилишда аҳоли билан тўғридан-тўғри мулоқотни кенгайтириш, мавжуд долзарб муаммоларни аниқлаш, уларни бевосита жойида бартараф этиш юзасидан аниқ ва тезкор чоралар кўриш лозимлигига алоҳида урғу берилди.

 Шунингдек, “Аҳоли кайфиятига бевосита таъсир кўрастувчи энг долзарб муаммоларни ўрганиш орқали 2022-2023 йилларда маҳаллалар инфратузилмасини ривожлантириш дастури”да уй-жойлар, мактаб, боғча, тиббиёт муассасалари, маҳалла биноси, ички йўллар, ичимлик суви, электр, газ таъминоти каби масалаларига алоҳида эътибор қаратилиши айтиб ўтилди.

Юртимизда амалга оширилаётган ҳар қандай ислоҳот энг аввало, инсон учундир. Мақсад − аҳоли фаровонлигини таъминлаш, яшаш шароитини яхшилаш, улар учун муносиб турмуш шароитини яратиб беришдир.

 Мазкур ишларни ташкил этишда, маҳаллаларда фаолият юритаётган маҳалла раислари, ҳоким ёрдамчилари, хотин-қизлар фаоли, ёшлар етакчиларнинг аҳоли билан юзма-юз учрашиб, муаммоларини, таклифларини ўрганиши, ташаббусларини қўллаб-қувватлаш муҳим аҳамиятга эгадир.

Йиғилишда маҳаллаларнинг инфратузилмасини яхшилаш, қамбағалликни қисқартириш, ишсизликка барҳам бериш мақсадида ҳар бир маҳаллага тайинланган ҳоким ёрдамчиларининг иш фаолиятида эътибор қаратишлари лозим бўлган муҳим вазифаларга ҳам тўхталиб ўтилди.

Ҳоким ёрдамчилари ҳам ўз навбатида ўзларини қизиқтирган саволлар билан мурожаат қилиб, тегишли жавоблар олдилар.

Туман ҳокимлигининг Ахборот хизмати