Respublika ishchi guruhi tumanimizga tashrif buyurdi

Maʼlumki, Vazirlar Mahkamasi tomonidan 2022-2023-yillarda mahallalar infratuzilmasini rivojlantirish dasturini shakllantirish maqsadida joylarda ishchi guruhlar tashkil qilingan edi. Ishchi guruhlar hududlarda boʻlib, muammo va takliflarni oʻrganadi hamda dastur loyihasini tayyorlaydi.

10-sentyabr kuni tumanimizga Respublika ishchi guruhi aʼzolari − Oʻzbekiston Respublikasi investitsiyalar va tashqi savdo Vaziri oʻrinbosari, Qoraqalpogʻiston Respublikasida tashkil qilingan shtab rahbari Badriddin Abidov, Qoraqalpogʻiston Respublikasi Vazirlar Kengashi Raisi oʻrinbosari Baxitjan Xabibullayev va boshqa masʼullar tashrif buyurdi.

Dastlab, ishchi guruh vakillari Jumurtov shaharcha fuqarolar yigʻinida boʻlib, aholi hamda mahalliy Kengash deputatlari bilan suhbatlashdi.

Shundan soʻng, tuman hokimligi binosida mahalla raislari, hokim yordamchilari ishtirokida yigʻilish boʻlib oʻtdi.

Yigʻilishda, “Inson qadrini ulugʻlash va faol mahalla yili”da mamlakatimiz boʻylab amalga oshirilayotgan ezgu ishlar zamirida eng avvalo, inson manfaati mujassam ekanligi, shu nuqtai nazardan odamlarning dardini eshitish, muammolarini hal etish, yashash sharoitini yaxshilash, bir soʻz bilan aytganda ularning oʻtayotgan har bir kunidan rozi boʻlib yashashlari uchun qulay sharoit va imkoniyatlar yaratish borasida koʻplab ijobiy ishlar olib borilayotganligi taʼkidlandi.

Jumladan, “Inson qadri uchun” ezgu tamoyili asosida ishlarni tashkil etish boʻyicha uy-joy, maktab, bogʻcha, tibbiyot, madaniyat, sport muassasalari ichki yoʻllar, ichimlik suv, elektr, gaz taʼminoti hamda obodonlashtirish masalalari bilan bogʻliq ishlar tezkor va yuqori surʼatlarda amalga oshirilayotganligi, bu boradagi ishlarni yanada jadallashtirish, xususan, aholi kayfiyatiga bevosita taʼsir koʻrastuvchi eng dolzarb muammolarni oʻrganish orqali 2022-2023-yillarda mahallalar infratuzilmasini rivojlantirish dasturini shakllantirish maqsad qilinganligi aytib oʻtildi.

Shuningdek, Dastur doirasida ishlar boshlanganidan soʻng unga kiritilgan obʼektlarda qurilish, taʼmirlash ishlarining borishi joyiga chiqqan holda nazorat qilish va muvofiqlashtirish respublika shtabi tomonidan amalga oshirilishi taʼkidlandi. Yigʻilishda aholi bilan toʻgʻridan-toʻgʻri muloqotni kengaytirish, mavjud dolzarb muammolarni aniqlash, ularni bevosita joyida bartaraf etish yuzasidan aniq va tezkor choralar koʻrish lozimligiga alohida urgʻu berildi.

 Shuningdek, “Aholi kayfiyatiga bevosita taʼsir koʻrastuvchi eng dolzarb muammolarni oʻrganish orqali 2022-2023-yillarda mahallalar infratuzilmasini rivojlantirish dasturi”da uy-joylar, maktab, bogʻcha, tibbiyot muassasalari, mahalla binosi, ichki yoʻllar, ichimlik suvi, elektr, gaz taʼminoti kabi masalalariga alohida eʼtibor qaratilishi aytib oʻtildi.

Yurtimizda amalga oshirilayotgan har qanday islohot eng avvalo, inson uchundir. Maqsad − aholi farovonligini taʼminlash, yashash sharoitini yaxshilash, ular uchun munosib turmush sharoitini yaratib berishdir.

 Mazkur ishlarni tashkil etishda, mahallalarda faoliyat yuritayotgan mahalla raislari, hokim yordamchilari, xotin-qizlar faoli, yoshlar yetakchilarning aholi bilan yuzma-yuz uchrashib, muammolarini, takliflarini oʻrganishi, tashabbuslarini qoʻllab-quvvatlash muhim ahamiyatga egadir.

Yigʻilishda mahallalarning infratuzilmasini yaxshilash, qambagʻallikni qisqartirish, ishsizlikka barham berish maqsadida har bir mahallaga tayinlangan hokim yordamchilarining ish faoliyatida eʼtibor qaratishlari lozim boʻlgan muhim vazifalarga ham toʻxtalib oʻtildi.

Hokim yordamchilari ham oʻz navbatida oʻzlarini qiziqtirgan savollar bilan murojaat qilib, tegishli javoblar oldilar.

Tuman hokimligining Axborot xizmati