“ХАВФСИЗ ТУН” ҚЎШМА РЕЙДИ ЎТКАЗИЛДИ

Амударё тумани Ички ишлар бўлими ҳуқуқбузарликлар профилактикаси бўлинмаси, Вояга етмаганлар ва ёшлар билан ишлашиш гуруҳи ва Ёшлар ишлари Агентлиги Амударё туман бўлими томонидан тузилган ишчи гуруҳ аъзолари билан биргаликда вояга етмаганларнинг назоратсиз ва қаровсиз қолишининг олдини олиш мақсадида интернет клублар, умумий овқатланиш ошхоналари, автомашина ювиш шохобчалари кўздан кечирилиб, вояга етмаганлар ва ёшларнинг мақсадсиз кўчаларда юришларининг олдини олишга қаратилган кундузги ва тунги рейдлар ўтказилмоқда.

Амударё туманида Ички ишлар бўлими, ҳуқуқбузарликлар профилактикаси бўлинмаси профилактика инспекторлари, вояга етмаганлар ва ёшлар билан ишлашиш гуруҳи катта инспектори ва инспектор-психологлари ҳамда бошқа мутасадди ташкилотлар билан ҳамкорликда Ўзбекистон Республикаси Президентининг 2022 йил 19 январь кунги “Маҳаллада ёшлар билан ишлашиш тизимини тубдан такомиллаштириш чора-тадбирлари тўғрисида”ги Қарорига асосан барча овул ва маҳаллаларда ёшларнинг бўш вақтини мазмунли ташкил этиш, миллий халқ ўйинлари ва спорт турларини ёшлар орасида кенг оммалаштириш, “Беш муҳим ташаббус” лойиҳалари, ёшлар фестиваллари ва бошқа маданий-маърифий тадбирларни амалга ошириш бўйича овул ва маҳаллалар ёшлар етакчилари иштирокида кенг қамровли ишлар олиб борилмоқда.

Тумандаги ўқув масканларида вояга етмаганларнинг ҳуқуқ ва қонуний манфаатларини ҳимоя қилиш, улар ўртасида ҳуқуқбузарликка қарши кураш, ватанпарварликни тарғиб қилиш, ёшларнинг “Оммавий маданият” таъсирига тушишнинг олдини олиш борасида мунтазам равишда давра суҳбатлари ва очиқ мулоқотлар ўтказилиб, профилактик тадбирлар ташкил этилмоқда.

Айни пайтда туманда вояга етмаганлар 70 минг 662 нафарни ташкил этади. 85 та умумтаълим муассасаларида ҳозирги кунда 37 минг 912 нафар ўқувчи, 51 та мактабгача муассасаларида 9 минг 612 нафар болалар таълим-тарбия олишмоқда.

2022 йилнинг сентябрь ойига қадар вояга етмаганлар орасида 213 та ҳолатда ҳуқуқбузарликлар аниқланиб, уларга нисбатан Ўзбекистон Республикаси Маъмурий жавобгарлик тўғрисидаги Кодексининг 47-моддасида кўрсатилган ҳуқуқбузарликлар бўйича вояга етмаганларнинг ота-оналарига маъмурий чоралар қўлланилди.

Мутасадди ташкилотлар иштирокида ўтказилган рейдлар жараёнида назоратсиз ва қаровсиз қолган 102 нафар вояга етмаган ўсмирлар аниқланиб, Қорақалпоғистон Республикаси Ички ишлар вазирлиги Ҳуқуқбузарликлар профилактикаси бўлимининг Вояга етмаган шахсга ижтимоий-ҳуқуқий ёрдам кўрсатиш марказига жойлаштирилди.

Амударё тумани Манғит шаҳри ҳудудида мунтазам равишда ўтказилаётган “Хавфсиз тун” тадбири давомида ҳам тунги пайтда бемақсад кўчада юрган 256 нафар вояга етмаганлар ИИБ ва таянч пунктларга олиб келинди ва профилаклик суҳбат ўтказилиб, ота-оналарига топширилди.

Бундан ташқари, интернет клубларда 9 та ҳолатда вояга етмаганлар шуғулланаётгани аниқланиб, мазкур клубларнинг эгаларига нисбатан базавий ҳисоблаш миқдорининг 10 баравари, яъни 3 миллион сўм миқдорида жарима солинди.

Халқимизда бир бола етти маҳалланинг юзи ва бир болага етти маҳалла ота-онадир, деган ҳикматлар бежизга яратилмаган. Чунки бир ноқобил боланинг одобсизлиги ёки ҳуқуқбузарлиги ўша бола яшайдиган бутун маҳалла болаларининг шаънига, обрўли оилаларнинг фарзандлари одоб-ахлоқига нисбатан салбий фикрлар туғилишига сабабчи бўлади. Ҳуқуқбузарликни содир этган боланинг қайси маҳалладан эканлигини айтишса, дарҳол умумий баҳо беришиб: “улар тўполончи ёки одобсиз, ҳуқуқбузар болалар”, - деб қўяқолишади. Шунинг учун бир ёмон бузоқ бутун подани булғагани каби бир тарбияси оғир боланинг касрига бошқа маҳалладошлари ҳам гирифтор бўлиб қолаверишади. Ота-оналардан илтимос қилардикки, фарзандларингизнинг юриш-туришидан, кимлар билан бирга ўйнаб, қаерларга бораётганларидан огоҳ бўлинг.

Ярим тунларгача интернет клублари эшигини очиб ўтирган, ўзини тадбиркорман, деб ҳисоблаб, вояга етмаганларнинг интернет тармоқлари орқали турли порнографик маълумотлар билан танишишларига шароит яратиб беришаётган шахсларга нисбатан тегишли тартибда маъмурий чоралар кўрилишига қарамасдан бу каби салбий ҳолатлар, афсуски, учраб турибди. Шу боис, “Хавфсиз тун” тадбирини йил давомида тизимли равишда ўтказиш, тадбирнинг қамров майдонини янада кенгайтириш, олис қишлоқ ҳудудларигача кириб бориб, вояга етмаганлар ва уюшмаган ёшларнинг тунлари бемақсад кўчада юришларининг олдини олиш ҳар биримизнинг зиммамиздаги масъулиятли вазифа эканлигини унутмаслигимиз керак.

Расул ХОЛМУРОДОВ, Амударё туман ИИБ вояга етмаганлар ва ёшлар билан ишлашиш гуруҳи катта инспектори.