“XAVFSIZ TUN” QOʻShMA REYDI OʻTKAZILDI

Amudaryo tumani Ichki ishlar boʻlimi huquqbuzarliklar profilaktikasi boʻlinmasi, Voyaga yetmaganlar va yoshlar bilan ishlashish guruhi va Yoshlar ishlari Agentligi Amudaryo tuman boʻlimi tomonidan tuzilgan ishchi guruh aʼzolari bilan birgalikda voyaga yetmaganlarning nazoratsiz va qarovsiz qolishining oldini olish maqsadida internet klublar, umumiy ovqatlanish oshxonalari, avtomashina yuvish shoxobchalari koʻzdan kechirilib, voyaga yetmaganlar va yoshlarning maqsadsiz koʻchalarda yurishlarining oldini olishga qaratilgan kunduzgi va tungi reydlar oʻtkazilmoqda.

Amudaryo tumanida Ichki ishlar boʻlimi, huquqbuzarliklar profilaktikasi boʻlinmasi profilaktika inspektorlari, voyaga yetmaganlar va yoshlar bilan ishlashish guruhi katta inspektori va inspektor-psixologlari hamda boshqa mutasaddi tashkilotlar bilan hamkorlikda Oʻzbekiston Respublikasi Prezidentining 2022-yil 19-yanvar kungi “Mahallada yoshlar bilan ishlashish tizimini tubdan takomillashtirish chora-tadbirlari toʻgʻrisida”gi Qaroriga asosan barcha ovul va mahallalarda yoshlarning boʻsh vaqtini mazmunli tashkil etish, milliy xalq oʻyinlari va sport turlarini yoshlar orasida keng ommalashtirish, “Besh muhim tashabbus” loyihalari, yoshlar festivallari va boshqa madaniy-maʼrifiy tadbirlarni amalga oshirish boʻyicha ovul va mahallalar yoshlar yetakchilari ishtirokida keng qamrovli ishlar olib borilmoqda.

Tumandagi oʻquv maskanlarida voyaga yetmaganlarning huquq va qonuniy manfaatlarini himoya qilish, ular oʻrtasida huquqbuzarlikka qarshi kurash, vatanparvarlikni targʻib qilish, yoshlarning “Ommaviy madaniyat” taʼsiriga tushishning oldini olish borasida muntazam ravishda davra suhbatlari va ochiq muloqotlar oʻtkazilib, profilaktik tadbirlar tashkil etilmoqda.

Ayni paytda tumanda voyaga yetmaganlar 70 ming 662 nafarni tashkil etadi. 85 ta umumtaʼlim muassasalarida hozirgi kunda 37 ming 912 nafar oʻquvchi, 51 ta maktabgacha muassasalarida 9 ming 612 nafar bolalar taʼlim-tarbiya olishmoqda.

2022-yilning sentyabr oyiga qadar voyaga yetmaganlar orasida 213 ta holatda huquqbuzarliklar aniqlanib, ularga nisbatan Oʻzbekiston Respublikasi Maʼmuriy javobgarlik toʻgʻrisidagi Kodeksining 47-moddasida koʻrsatilgan huquqbuzarliklar boʻyicha voyaga yetmaganlarning ota-onalariga maʼmuriy choralar qoʻllanildi.

Mutasaddi tashkilotlar ishtirokida oʻtkazilgan reydlar jarayonida nazoratsiz va qarovsiz qolgan 102 nafar voyaga yetmagan oʻsmirlar aniqlanib, Qoraqalpogʻiston Respublikasi Ichki ishlar vazirligi Huquqbuzarliklar profilaktikasi boʻlimining Voyaga yetmagan shaxsga ijtimoiy-huquqiy yordam koʻrsatish markaziga joylashtirildi.

Amudaryo tumani Mangʻit shahri hududida muntazam ravishda oʻtkazilayotgan “Xavfsiz tun” tadbiri davomida ham tungi paytda bemaqsad koʻchada yurgan 256 nafar voyaga yetmaganlar IIB va tayanch punktlarga olib kelindi va profilaklik suhbat oʻtkazilib, ota-onalariga topshirildi.

Bundan tashqari, internet klublarda 9 ta holatda voyaga yetmaganlar shugʻullanayotgani aniqlanib, mazkur klublarning egalariga nisbatan bazaviy hisoblash miqdorining 10 baravari, yaʼni 3 million soʻm miqdorida jarima solindi.

Xalqimizda bir bola yetti mahallaning yuzi va bir bolaga yetti mahalla ota-onadir, degan hikmatlar bejizga yaratilmagan. Chunki bir noqobil bolaning odobsizligi yoki huquqbuzarligi oʻsha bola yashaydigan butun mahalla bolalarining shaʼniga, obroʻli oilalarning farzandlari odob-axloqiga nisbatan salbiy fikrlar tugʻilishiga sababchi boʻladi. Huquqbuzarlikni sodir etgan bolaning qaysi mahalladan ekanligini aytishsa, darhol umumiy baho berishib: “ular toʻpolonchi yoki odobsiz, huquqbuzar bolalar”, - deb qoʻyaqolishadi. Shuning uchun bir yomon buzoq butun podani bulgʻagani kabi bir tarbiyasi ogʻir bolaning kasriga boshqa mahalladoshlari ham giriftor boʻlib qolaverishadi. Ota-onalardan iltimos qilardikki, farzandlaringizning yurish-turishidan, kimlar bilan birga oʻynab, qayerlarga borayotganlaridan ogoh boʻling.

Yarim tunlargacha internet klublari eshigini ochib oʻtirgan, oʻzini tadbirkorman, deb hisoblab, voyaga yetmaganlarning internet tarmoqlari orqali turli pornografik maʼlumotlar bilan tanishishlariga sharoit yaratib berishayotgan shaxslarga nisbatan tegishli tartibda maʼmuriy choralar koʻrilishiga qaramasdan bu kabi salbiy holatlar, afsuski, uchrab turibdi. Shu bois, “Xavfsiz tun” tadbirini yil davomida tizimli ravishda oʻtkazish, tadbirning qamrov maydonini yanada kengaytirish, olis qishloq hududlarigacha kirib borib, voyaga yetmaganlar va uyushmagan yoshlarning tunlari bemaqsad koʻchada yurishlarining oldini olish har birimizning zimmamizdagi masʼuliyatli vazifa ekanligini unutmasligimiz kerak.

Rasul XOLMURODOV, Amudaryo tuman IIB voyaga yetmaganlar va yoshlar bilan ishlashish guruhi katta inspektori.