ТОШ ЁП ОВУЛИ АҲОЛИСИ ЧУҚУРЛАШТИРИЛГАН ТИББИЙ КЎРИКДАН ЎТКАЗИЛДИ

Аҳоли соғлигини мустаҳкамлаш, келиб чиқиши мумкин бўлган касалликларни эрта аниқлаш ва олдини олиш, саломатликни доимий назоратдан ўтказиш каби мақсадларда овул ва маҳаллаларда сайёр тиббий кўриклар ташкил этилмоқда. Қолаверса, бундай тадбирлар давомида фуқароларнинг тиббий маданияти оширилиб, улар ўртасида соғлом турмуш тарзи тамойиллари кенг тарғиб қилинмоқда.

19 сентябрь куни Амударё туманининг Тош ёп овулида ҳам туман давлат Солиқ инспекцияси бошлиғи, 4-сектор раҳбари ташаббуси билан ҳудуд аҳолиси учун чуқурлаштирилган тиббий кўрик ташкил этилди. Тиббий кўрикка туман Тиббиёт бирлашмасининг тиббий ходимлари, кўп тармоқли поликлиниканинг тор доирадаги мутахассислари жалб қилинди.

Тош ёп овули ҳудудида 596 та хонадонда 3505 нафар аҳоли истиқомат қилади. Шу куни ҳудуддаги “Темир дафтар”, “Ёшлар дафтари”, “Аёллар дафтари”га киритилганлар, ногиронлар, диспансер назоратида турган сурункали касаллик билан рўйхатда турувчиларни тиббий кўрикдан ўтказишга алоҳида эътибор қаратилди.

Кўрик давомида аҳолининг 125 нафари УЗИ, ЭКГ ускуналари, 132 нафари клиник лаборатория текширувларидан ўтказилиб, натижалари маълум қилинди. Ундан ташқари, 3 та хонадондаги 4-гуруҳга мансуб уйда ётиб қолган, ногиронлиги бор шахсларнинг уйларига тор доирадаги мутахассислар ва 4-сектор аъзолари ташриф буюриб, ҳолидан хабар олдилар ва беморлар тиббий кўрикдан ўтказилди.

Тиббий кўриклар натижасида беморларнинг 2 нафарига бирлашма шифокорларининг жарроҳлик бўйича маслаҳати берилди, 95 нафар 3-гуруҳга мансуб “Д” назоратда турган беморларга амбулатор даво муолажалари берилиб, оилавий поликлиника ҳисобидан дори-дармонлар билан таьминланди. Шунингдек, 5 нафар бемор соғлом турмуш тарзи ва тўғри овқатланиш тартиби бўйича кенг тушунчаларга эга бўлишди.

Кўрик натижаларига кўра қандли диабет касаллигига гумон қилинган 1 нафар беморга эндокринолог шифокор тавсиялари берилди, юрак қон-томир касаллиги бўлган 15 нафар беморга, тери-таносил касалликлари бўлган 1 нафар, лор касалликлари бўлган 1 нафар беморга амбулатор шароитда даволаниш буюрилди. Ундан ташқари, миопия касаллигига чалинган 5 нафар беморга мос кўзойнаклар тавсия қилинди. Турли хил касалликлар аниқланган 102 нафар беморга амбулатор муолажалар берилди.

Тиббий кўрик давомида 70 ёшдан ошган 74 нафар нуронийларга “Кальций Д-3” таблеткаси, туғиш ёшидаги 927 нафар аёлларга фолий кислотаси тарқатилди. Шу билан бирга тиббий кўрикка жалб қилинган аҳолига туман Тиббиёт бирлашмасининг Саломатлик бўлими шифокорлари томонидан шахсий гигиенага риоя қилиш ва соғлом турмуш тарзи, жисмоний фаоллик, тўғри овқатланиш тамойиллари тўғрисида суҳбатлар ўтказилди ҳамда мавзуга оид буклетлар тарқатилди.

Тош ёп овулида 4-сектор ташаббуси билан туман Тиббиёт бирлашмаси тиббиёт ходимлари иштирокида ташкил этилган тиббий кўрикдан ҳудуд аҳолиси жуда мамнун бўлишди. Саломатликларини назорат қилиб, касалликларнинг олдини олишга имконият яратиб берган ташаббускорларга ўз миннатдорчиликларини билдиришди.

Бу каби тадбирлар аҳоли орасида учрайдиган касалликларни эрта аниқлашга, асоратсиз даволашга ва халқимиз соғлигини сақлашга ёрдам беради.

О.Худойберганова.