TOSh YoP OVULI AHOLISI ChUQURLAShTIRILGAN TIBBIY KOʻRIKDAN OʻTKAZILDI

Aholi sogʻligini mustahkamlash, kelib chiqishi mumkin boʻlgan kasalliklarni erta aniqlash va oldini olish, salomatlikni doimiy nazoratdan oʻtkazish kabi maqsadlarda ovul va mahallalarda sayyor tibbiy koʻriklar tashkil etilmoqda. Qolaversa, bunday tadbirlar davomida fuqarolarning tibbiy madaniyati oshirilib, ular oʻrtasida sogʻlom turmush tarzi tamoyillari keng targʻib qilinmoqda.

19-sentyabr kuni Amudaryo tumanining Tosh yop ovulida ham tuman davlat Soliq inspektsiyasi boshligʻi, 4-sektor rahbari tashabbusi bilan hudud aholisi uchun chuqurlashtirilgan tibbiy koʻrik tashkil etildi. Tibbiy koʻrikka tuman Tibbiyot birlashmasining tibbiy xodimlari, koʻp tarmoqli poliklinikaning tor doiradagi mutaxassislari jalb qilindi.

Tosh yop ovuli hududida 596 ta xonadonda 3505 nafar aholi istiqomat qiladi. Shu kuni hududdagi “Temir daftar”, “Yoshlar daftari”, “Ayollar daftari”ga kiritilganlar, nogironlar, dispanser nazoratida turgan surunkali kasallik bilan roʻyxatda turuvchilarni tibbiy koʻrikdan oʻtkazishga alohida eʼtibor qaratildi.

Koʻrik davomida aholining 125 nafari UZI, EKG uskunalari, 132 nafari klinik laboratoriya tekshiruvlaridan oʻtkazilib, natijalari maʼlum qilindi. Undan tashqari, 3 ta xonadondagi 4-guruhga mansub uyda yotib qolgan, nogironligi bor shaxslarning uylariga tor doiradagi mutaxassislar va 4-sektor aʼzolari tashrif buyurib, holidan xabar oldilar va bemorlar tibbiy koʻrikdan oʻtkazildi.

Tibbiy koʻriklar natijasida bemorlarning 2 nafariga birlashma shifokorlarining jarrohlik boʻyicha maslahati berildi, 95 nafar 3-guruhga mansub “D” nazoratda turgan bemorlarga ambulator davo muolajalari berilib, oilaviy poliklinika hisobidan dori-darmonlar bilan taminlandi. Shuningdek, 5 nafar bemor sogʻlom turmush tarzi va toʻgʻri ovqatlanish tartibi boʻyicha keng tushunchalarga ega boʻlishdi.

Koʻrik natijalariga koʻra qandli diabet kasalligiga gumon qilingan 1 nafar bemorga endokrinolog shifokor tavsiyalari berildi, yurak qon-tomir kasalligi boʻlgan 15 nafar bemorga, teri-tanosil kasalliklari boʻlgan 1 nafar, lor kasalliklari boʻlgan 1 nafar bemorga ambulator sharoitda davolanish buyurildi. Undan tashqari, miopiya kasalligiga chalingan 5 nafar bemorga mos koʻzoynaklar tavsiya qilindi. Turli xil kasalliklar aniqlangan 102 nafar bemorga ambulator muolajalar berildi.

Tibbiy koʻrik davomida 70 yoshdan oshgan 74 nafar nuroniylarga “Kaltsiy D-3” tabletkasi, tugʻish yoshidagi 927 nafar ayollarga foliy kislotasi tarqatildi. Shu bilan birga tibbiy koʻrikka jalb qilingan aholiga tuman Tibbiyot birlashmasining Salomatlik boʻlimi shifokorlari tomonidan shaxsiy gigiyenaga rioya qilish va sogʻlom turmush tarzi, jismoniy faollik, toʻgʻri ovqatlanish tamoyillari toʻgʻrisida suhbatlar oʻtkazildi hamda mavzuga oid bukletlar tarqatildi.

Tosh yop ovulida 4-sektor tashabbusi bilan tuman Tibbiyot birlashmasi tibbiyot xodimlari ishtirokida tashkil etilgan tibbiy koʻrikdan hudud aholisi juda mamnun boʻlishdi. Salomatliklarini nazorat qilib, kasalliklarning oldini olishga imkoniyat yaratib bergan tashabbuskorlarga oʻz minnatdorchiliklarini bildirishdi.

Bu kabi tadbirlar aholi orasida uchraydigan kasalliklarni erta aniqlashga, asoratsiz davolashga va xalqimiz sogʻligini saqlashga yordam beradi.

O.Xudoyberganova.