65-сонли мактабда бошланғич таълим фан ойлиги якунига бағишланган тадбир ўтказилди

Психологларнинг хулосаларига кўра, боланинг 5-10 ёшгача бўлган даврида олган таълим-тарбияси унинг кейинги ҳаётига мустаҳкам асос бўлар экан. Шу жиҳатдан олиб қараганда, бошланғич синфлар ўқитувчиларининг бу борадаги фаолияти муҳим аҳамиятга эга. Чунки боланинг бошланғич таълимни нечоғлик қунт билан ўзлаштириши айнан унга илк таълим берган, алифбони ўргатган устозининг фидойилигига боғлиқ.

Сентябрь ойи умумтаълим мактабларида бошланғич таълим фан ойлиги сифатида белгиланиши ҳам мактабга илк қадам қўйган болалар билан ўқиш ва ёзишни пухта ўрганиш, илм-ирфон сирларини пухта эгаллаш учун интилаётган бошланғич синф ўқувчиларининг алоҳида қобилият ва интилишларини қўллаб-қувватлашга қаратилганлиги билан муҳим аҳамият касб этади.

Амударё туманидаги 65-сонли умумтаълим мактабида ҳам ўқувчиларнинг бошланғич таълим бўйича дарслар мажмуини ўқувчиларнинг пухта ўзлаштиришларини таъминлашга алоҳида эътибор қаратилади. Шу боис, сентябрь – бошланғич таълим фан ойлиги доирасида 1-2-3-4-синфлар ўқувчилари ўртасида ҳар бир синфда, аввало, гуруҳлараро, кейинчалик синфлараро турли хил мавзуларда баҳс-мунозарали ва фикрни чархловчи беллашувлар, кўрик-танловлар, илғор ўқитувчиларнинг маҳорат дарслари ташкил этилди. Маҳорат дарсларида алоҳида қобилиятга эга ўқувчилар аниқланди ва улар рағбатлантириб борилди. Бу эса уларнинг ҳар бир дарсни ўзлаштиришга бўлган интилишларини ошириш имконини берди.

Мактабда фан ойлиги доирасида бири-биридан қизиқарли тадбирлар ташкил этилди. Сентябрь ойининг биринчи ҳафтасида 1-2-синфлар ўртасида “Кимнинг хати чиройли” танлови ўтказилиб, унда болалар диктантлар ёзишди. 1-синф ўқувчилари илк ўрганган ҳарфлар қаторини чиройли қилиб ёзишга интилишди. Энг чиройли ҳуснихат эгалари тақдирландилар. Шунингдек, 2-4-синфлар ўқувчиларидан кириш тестлари олинди. Тест саволарига аниқ ва тўғри жавоб берган ўқувчилар тенгдошларига ибрат қилиб кўрсатилди. Табиий фанлар бўйича 2-синф ўқувчилари ўртасида ўтказилган “Мен изланувчиман” кўрик-танлови ўқувчиларнинг ташаббус ва интилишлари, шахсий фикрларини ифода этишларида муҳим омил бўлди.

Фан ойлиги давомида сентябрь ойининг ҳар бир ҳафтаси ўқувчилар ва бошланғич синфлар ўқитувчилари учун қизиқарли таассуротларга бой тарзда ўтди. 20 сентябрь куни фан ойлиги доирасида амалга оширилган барча маънавий-маърифий тадбирлар умумлаштирилиб, “Мен – Ўзбекистон бунёдкориман” мавзусида кенгайтирилган адабий-мусиқий ва маърифий тадбир ўтказилди.

Фан ойлигининг якунига бағишланган мазкур тадбирда 2-а синф ўқувчилари “Кўйлагим” рақсини маҳорат билан ижро этишди. 2-б синф қизлари ижросидаги куй-қўшиқ ва рақслар, 3-синф ўқувчиларининг “Ўзбекистон” қўшиғига рақслари барчага хушкайфият бағишлади.

Бошланғич таълим фан ойлигининг якунида 3-ва 4-синфлар ўқувчиларининг “Ҳосил байрамига” бағишланган тадбири ҳам намойиш этилиб, инсон ва табиатнинг ўзаро уйғунлиги кўргазмали чиқишлар орқали кўрсатиб берилди.

Хусусан, бободеҳқонларимиз томонидан етиштирилган ноз-неъматларга алоҳида-алоҳида таърифлар берилди. Мевалар, полиз ва сабзавот, дуккакли дон экинларининг инсон саломатлиги учун фойдалари, шунингдек, миллий бойлигимиз – пахтадан олинадиган маҳсулотлар ва уларнинг халқ фаровонлигини таъминлашдаги аҳамияти ҳақида ўқувчилар ўз фикрларини баён этишди.

Робия Йўлдошева