65-sonli maktabda boshlangʻich taʼlim fan oyligi yakuniga bagʻishlangan tadbir oʻtkazildi

Psixologlarning xulosalariga koʻra, bolaning 5-10 yoshgacha boʻlgan davrida olgan taʼlim-tarbiyasi uning keyingi hayotiga mustahkam asos boʻlar ekan. Shu jihatdan olib qaraganda, boshlangʻich sinflar oʻqituvchilarining bu boradagi faoliyati muhim ahamiyatga ega. Chunki bolaning boshlangʻich taʼlimni nechogʻlik qunt bilan oʻzlashtirishi aynan unga ilk taʼlim bergan, alifboni oʻrgatgan ustozining fidoyiligiga bogʻliq.

Sentyabr oyi umumtaʼlim maktablarida boshlangʻich taʼlim fan oyligi sifatida belgilanishi ham maktabga ilk qadam qoʻygan bolalar bilan oʻqish va yozishni puxta oʻrganish, ilm-irfon sirlarini puxta egallash uchun intilayotgan boshlangʻich sinf oʻquvchilarining alohida qobiliyat va intilishlarini qoʻllab-quvvatlashga qaratilganligi bilan muhim ahamiyat kasb etadi.

Amudaryo tumanidagi 65-sonli umumtaʼlim maktabida ham oʻquvchilarning boshlangʻich taʼlim boʻyicha darslar majmuini oʻquvchilarning puxta oʻzlashtirishlarini taʼminlashga alohida eʼtibor qaratiladi. Shu bois, sentyabr – boshlangʻich taʼlim fan oyligi doirasida 1-2-3-4-sinflar oʻquvchilari oʻrtasida har bir sinfda, avvalo, guruhlararo, keyinchalik sinflararo turli xil mavzularda bahs-munozarali va fikrni charxlovchi bellashuvlar, koʻrik-tanlovlar, ilgʻor oʻqituvchilarning mahorat darslari tashkil etildi. Mahorat darslarida alohida qobiliyatga ega oʻquvchilar aniqlandi va ular ragʻbatlantirib borildi. Bu esa ularning har bir darsni oʻzlashtirishga boʻlgan intilishlarini oshirish imkonini berdi.

Maktabda fan oyligi doirasida biri-biridan qiziqarli tadbirlar tashkil etildi. Sentyabr oyining birinchi haftasida 1-2-sinflar oʻrtasida “Kimning xati chiroyli” tanlovi oʻtkazilib, unda bolalar diktantlar yozishdi. 1-sinf oʻquvchilari ilk oʻrgangan harflar qatorini chiroyli qilib yozishga intilishdi. Eng chiroyli husnixat egalari taqdirlandilar. Shuningdek, 2-4-sinflar oʻquvchilaridan kirish testlari olindi. Test savolariga aniq va toʻgʻri javob bergan oʻquvchilar tengdoshlariga ibrat qilib koʻrsatildi. Tabiiy fanlar boʻyicha 2-sinf oʻquvchilari oʻrtasida oʻtkazilgan “Men izlanuvchiman” koʻrik-tanlovi oʻquvchilarning tashabbus va intilishlari, shaxsiy fikrlarini ifoda etishlarida muhim omil boʻldi.

Fan oyligi davomida sentyabr oyining har bir haftasi oʻquvchilar va boshlangʻich sinflar oʻqituvchilari uchun qiziqarli taassurotlarga boy tarzda oʻtdi. 20-sentyabr kuni fan oyligi doirasida amalga oshirilgan barcha maʼnaviy-maʼrifiy tadbirlar umumlashtirilib, “Men – Oʻzbekiston bunyodkoriman” mavzusida kengaytirilgan adabiy-musiqiy va maʼrifiy tadbir oʻtkazildi.

Fan oyligining yakuniga bagʻishlangan mazkur tadbirda 2-a sinf oʻquvchilari “Koʻylagim” raqsini mahorat bilan ijro etishdi. 2-b sinf qizlari ijrosidagi kuy-qoʻshiq va raqslar, 3-sinf oʻquvchilarining “Oʻzbekiston” qoʻshigʻiga raqslari barchaga xushkayfiyat bagʻishladi.

Boshlangʻich taʼlim fan oyligining yakunida 3-va 4-sinflar oʻquvchilarining “Hosil bayramiga” bagʻishlangan tadbiri ham namoyish etilib, inson va tabiatning oʻzaro uygʻunligi koʻrgazmali chiqishlar orqali koʻrsatib berildi.

Xususan, bobodehqonlarimiz tomonidan yetishtirilgan noz-neʼmatlarga alohida-alohida taʼriflar berildi. Mevalar, poliz va sabzavot, dukkakli don ekinlarining inson salomatligi uchun foydalari, shuningdek, milliy boyligimiz – paxtadan olinadigan mahsulotlar va ularning xalq farovonligini taʼminlashdagi ahamiyati haqida oʻquvchilar oʻz fikrlarini bayon etishdi.

Robiya Yoʻldosheva