Ўзбекистон Ёшлар иттифоқи Амударё туман Кенгаши конференцияси бўлиб ўтди

Маълумки, Ўзбекистон Ёшлар иттифоқи “Камолот” ёшлар ижтимоий ҳаракатининг 2017 йил 30 июнь куни бўлиб ўтган IV қурултойи қарорига мувофиқ ташкил этилиб, шу кундан эътиборан жисмонан соғлом, маънан етук ва интеллектуал ривожланган, мустақил фикрлайдиган ёш авлодни шакллантириш, уларни “оммавий маданият”нинг зарарли таъсиридан муҳофаза қилиш, ёшларнинг ҳуқуқ ва манфаатларини ҳимоя қилишга ҳар томонлама кўмаклашувчи, бир сўз билан айтганда Ўзбекистон ёшларини ягона мақсад йўлида бирлаштирувчи ташкилот сифатида фаолият юритиб келмоқда.

10 октябрь куни Амударё туманининг Олмазор маҳалласи ҳудудидаги 82-сонли мактабда Ўзбекистон Ёшлар иттифоқи туман Кенгашининг навбатдаги конференцияси бўлиб ўтди.

Конференцияда 110 нафар делегатдан 98 нафари иштирок этди.

Конференцияни туман ҳокимлигининг Ахборот хизмати раҳбари Фотима Эшимбетова бошқариб борди.

Йиғилишда дастлаб, конференция ҳайъати аъзолари ҳамда котиблар сайлаб олинди.

Ҳайъат азолари сифатида туман ҳокимининг ўринбосари Маҳмуд Шерметов, туман ҳокимлигининг Ахборот хизмати раҳбари Фотима Эшимбетова, ижодкор ёшлардан Барно Самандаровалар сайланди.

Шундан сўнг, Ўзбекистон Ёшлар иттифоқи Амударё туман Кенгашининг 2017-2022 йиллардаги умумий фаолияти бўйича ҳисоботи тингланди.

Ҳисоботда келтирилганидек, Ёшлар иттифоқи туман Кенгаши томонидан ёшларнинг интилиш ва қобилиятларини рўёбга чиқаришда, уларнинг муаммоларини ҳал қилиш борасида самарали ишлар амалга оширилиб келинмоқда.

Йиғилиш давомида Ёшлар иттифоқи туман Кенгаши фаолиятининг натижадорлиги бўйича Амударё тумани Ёшлар иттифоқи назорат-тафтиш комиссиясининг ҳисоботи тингланди. Ҳисоботда жорий йилнинг 9 ойи давомида 2 148 нафар ёшларга амалий ёрдамлар кўрсатилгани, ҳозирда туман бўйича 193 нафар ёшлар “Ёшлар дафтари”да экани қайд этилди.

Шунингдек, ёшларни маданият, санъат, жисмоний тарбия ва спортга кенг жалб этиш, ёшларда ахборот технологияларидан фойдаланиш кўникмаларини шакллантириш, улар ўртасида китобхонликни тарғиб қилишга қаратилган 5 босқични ўз ичига олган “Беш ташаббус олимпиадаси”да туманимиз ёшлари улкан муваффақиятларга эришгани таъкидлаб ўтилди.

Конференция давомида Ёшлар иттифоқи туман Кенгаши раиси лавозимига Дилмурод Раҳимовнинг номзоди бир овоздан мақулланди.

Шундан сўнг туман ҳокими ўринбосари Маҳмуд Шерметов Ўзбекистон Ёшлар иттифоқи фаолияти ҳусусида ўз фикрларини баён қилди.

Қайд этилганидек, ташкилот мустақил фикрлайдиган, мамлакатимиз истиқболи учун масъулиятни ўз зиммасига олишга қодир, ташаббускор, халқ манфаати йўлида бор салоҳиятини сафарбар қиладиган, шижоатли ёшларни тарбиялаш, уларнинг интеллектуал ва ижодий салоҳиятини рўёбга чиқариш йўлида самарали тарзда фаолият юритмоқда.

Конференция кун тартибида Ўзбекистон Ёшлар иттифоқи ҳудудий Кенгаши конференциясига делегатларни сайлаш масаласи ҳам кўриб чиқилиб, 10 нафар делегат сайланди.

Шунинг билан Ўзбекистон Ёшлар иттифоқи туман Кенгашининг навбатдаги конференцияси ниҳоясига етди.

Туман ҳокимлигининг Ахборот хизмати.