Oʻzbekiston Yoshlar ittifoqi Amudaryo tuman Kengashi konferentsiyasi boʻlib oʻtdi

Maʼlumki, Oʻzbekiston Yoshlar ittifoqi “Kamolot” yoshlar ijtimoiy harakatining 2017-yil 30-iyun kuni boʻlib oʻtgan IV qurultoyi qaroriga muvofiq tashkil etilib, shu kundan eʼtiboran jismonan sogʻlom, maʼnan yetuk va intellektual rivojlangan, mustaqil fikrlaydigan yosh avlodni shakllantirish, ularni “ommaviy madaniyat”ning zararli taʼsiridan muhofaza qilish, yoshlarning huquq va manfaatlarini himoya qilishga har tomonlama koʻmaklashuvchi, bir soʻz bilan aytganda Oʻzbekiston yoshlarini yagona maqsad yoʻlida birlashtiruvchi tashkilot sifatida faoliyat yuritib kelmoqda.

10-oktyabr kuni Amudaryo tumanining Olmazor mahallasi hududidagi 82-sonli maktabda Oʻzbekiston Yoshlar ittifoqi tuman Kengashining navbatdagi konferentsiyasi boʻlib oʻtdi.

Konferentsiyada 110 nafar delegatdan 98 nafari ishtirok etdi.

Konferentsiyani tuman hokimligining Axborot xizmati rahbari Fotima Eshimbetova boshqarib bordi.

Yigʻilishda dastlab, konferentsiya hayʼati aʼzolari hamda kotiblar saylab olindi.

Hayʼat azolari sifatida tuman hokimining oʻrinbosari Mahmud Shermetov, tuman hokimligining Axborot xizmati rahbari Fotima Eshimbetova, ijodkor yoshlardan Barno Samandarovalar saylandi.

Shundan soʻng, Oʻzbekiston Yoshlar ittifoqi Amudaryo tuman Kengashining 2017-2022-yillardagi umumiy faoliyati boʻyicha hisoboti tinglandi.

Hisobotda keltirilganidek, Yoshlar ittifoqi tuman Kengashi tomonidan yoshlarning intilish va qobiliyatlarini roʻyobga chiqarishda, ularning muammolarini hal qilish borasida samarali ishlar amalga oshirilib kelinmoqda.

Yigʻilish davomida Yoshlar ittifoqi tuman Kengashi faoliyatining natijadorligi boʻyicha Amudaryo tumani Yoshlar ittifoqi nazorat-taftish komissiyasining hisoboti tinglandi. Hisobotda joriy yilning 9 oyi davomida 2 148 nafar yoshlarga amaliy yordamlar koʻrsatilgani, hozirda tuman boʻyicha 193 nafar yoshlar “Yoshlar daftari”da ekani qayd etildi.

Shuningdek, yoshlarni madaniyat, sanʼat, jismoniy tarbiya va sportga keng jalb etish, yoshlarda axborot texnologiyalaridan foydalanish koʻnikmalarini shakllantirish, ular oʻrtasida kitobxonlikni targʻib qilishga qaratilgan 5 bosqichni oʻz ichiga olgan “Besh tashabbus olimpiadasi”da tumanimiz yoshlari ulkan muvaffaqiyatlarga erishgani taʼkidlab oʻtildi.

Konferentsiya davomida Yoshlar ittifoqi tuman Kengashi raisi lavozimiga Dilmurod Rahimovning nomzodi bir ovozdan maqullandi.

Shundan soʻng tuman hokimi oʻrinbosari Mahmud Shermetov Oʻzbekiston Yoshlar ittifoqi faoliyati hususida oʻz fikrlarini bayon qildi.

Qayd etilganidek, tashkilot mustaqil fikrlaydigan, mamlakatimiz istiqboli uchun masʼuliyatni oʻz zimmasiga olishga qodir, tashabbuskor, xalq manfaati yoʻlida bor salohiyatini safarbar qiladigan, shijoatli yoshlarni tarbiyalash, ularning intellektual va ijodiy salohiyatini roʻyobga chiqarish yoʻlida samarali tarzda faoliyat yuritmoqda.

Konferentsiya kun tartibida Oʻzbekiston Yoshlar ittifoqi hududiy Kengashi konferentsiyasiga delegatlarni saylash masalasi ham koʻrib chiqilib, 10 nafar delegat saylandi.

Shuning bilan Oʻzbekiston Yoshlar ittifoqi tuman Kengashining navbatdagi konferentsiyasi nihoyasiga yetdi.

Tuman hokimligining Axborot xizmati.