УМУМИЙ ЎРТА ТАЪЛИМ МАКТАБИ ЎҚУВЧИЛАРИ ЎРТАСИДА ФАН ОЛИМПИАДАСИНИНГ ТУМАН БОСҚИЧИ ЎТКАЗИЛМОҚДА

Ўзбекистон Республикаси Вазирлар Маҳкамасининг 2021 йил 9 сентябрдаги тегишли қарорига мувофиқ ҳар йили умумий ўрта таълим мактаблари ўқувчилари ўртасида фан олимпиадалари ўтказилиб келинади. Жорий йилда ҳам туман Халқ таълими бўлими томонидан фан олимпиадаларини ташкил этиш ва ўтказишга катта тайёргарлик кўрилди. Олимпиаданинг туман босқичини ўтказиш учун тумандаги 40-сонли умумий ўрта таълим мактаби биносида ўқувчилар учун барча шароит ва қулайликлар яратилди.

Жумладан, фанлар олимпиадаси ўтказиладиган синфхоналар тегишли тартибда зарур жиҳозлар билан таъминланди. Муассасада ҳар бир фан учун алоҳида кўрсаткичлар синфхона эшиклари ва йўлаклар бўйича тақсимланиб, тартиб-интизомни сақлаш мақсадида навбатчилик ташкил қилинди.

12 октябрь куни фан олимпиадаларининг туман босқичига старт берилди. Шу куни 40-сонли умумтаълим мактаби биносида 9-11-синф ўқувчилари ўртасида математика, она тили ва адабиёт, шунингдек, ўзбек тили фанларидан олимпиаданинг туман босқичи бўлиб ўтди. Унда тумандаги барча мактабларнинг 9-11 синф ўқувчилари қатнашиб, устозлари ва ота-оналари ишончини оқлашга ҳаракат қилдилар. Ҳар бир фан учун ажратилган синфхонада ўқувчилар учун барча шароитлар яратиб берилди.

 16 октябрга қадар давом этадиган фан олимпиадаларининг туман босқичида юқорида кўрсатилган фанлардан ташқари информатика ва ахборот технологиялари, биология, кимё, физика, тарих, география, рус тили ва адабиёти, қорақалпоқ тили ва адабиёти, тожик тили, инглиз тили, француз тили, қозоқ тили фанларидан олимпиадалар бўлиб ўтади.

5 кун давом этадиган ушбу жараёнда ўқувчиларинг хавфсизлик қоидаларига риоя қилишлари назорага олиниб, уларнинг келиб-кетиш харажатлари тўлиқ қопланади.

Фан олимпиадаларининг туман босқичи ниҳоясига етгач, натижалар ҳайъат аъолари томонидан умумлаштирилиб Қорақалпоғистон Республикаси Халқ таълими вазирлигига тақдим этилади.

Шунингдек, олимпиада натижаларидан норози бўлган ўқувчилар белгиланган тартибда натижа эълон қилинган куннинг ўзида апелляция комиссиясига мурожаат қилишлари мумкин.

Фан олимпиадалари мамлакатимиз бўйлаб 4 босқичда ўтказилади. Биринчи босқич мактаблар миқёсида сентябрь ойида, иккинчи босқич туманлар миқёсида октябрь ойида, учинчи босқич Қорақалпоғистон Республикаси, вилоят ва Тошкент шаҳри миқёсида ноябрь ойида ҳамда якуний босқич Республика миқёсида барча фанлардан апрель-май ойларида бўлиб ўтади. Олимпиаданинг учинчи босқичида, яъни Қорақалпоғистон Республикаси, вилоят ёки Тошкент шаҳри миқёсида 1-ўринни эгаллаган ўқувчилар базавий ҳисоблаш миқдорининг 6 баробари, 2-ўрин соҳиблари 4 баробари, 3-ўрин эгалари эса 3 баробари миқдорида пул мукофоти билан тақдирланади.

Шунингдек, тўртинчи босқичида 1-, 2-, 3-ўринларни эгаллаган ўқувчиларга Вазирлик томонидан ихтисослик фани бўйича давлат олий таълим муассасаларига кириш имтиҳонларида максимал балл олиш ҳуқуқини берувчи ва уч йил муддат давомида амал қилувчи электрон сертификатлар берилади ҳамда унинг алоҳида электрон реестри юритилади.

Олимпиаданинг туман босқичида қатнашаётган барча ўқувчиларга омад тилаб, кейинги босқичларда ҳам туманимиз шарафини муносиб ҳимоя қилган ҳолда юқори ўринларни эгаллашиларига тилакдошмиз.

Туман ҳокимлигининг Ахборот хизмати.