15 октябрь − Халқаро қишлоқ аёллари кунида қишлоқ аёлларининг меҳнатлари эътироф этилди

Бугунги кунда бутун дунёда аёллар ҳуқуқларини ҳимоя қилиш, уларни ҳар томонлама қўллаб-қувватлаш бўйича минтақавий ва халқаро аҳамиятга эга янгидан янги ташаббуслар илгари сурилиб келинмоқда. Жумладан, мамлакатимизда ҳам кейинги олти йилда хотин-қизларни ҳар томонлама қўллаб-қувватлаш, уларнинг ижтимоий-иқтисодий ва сиёсий фаоллигини ошириш, бандлигини таъминлаш, тадбиркорликка кенг жалб этиш борасида эришилган ютуқлар жаҳон ҳамжамияти томонидан муносиб эътироф этилиб келинмоқда.

Амударё туманидаги Боғ маҳалласида ҳам аёллар тадбиркорлигини ривожлантириш, уларнинг бандлигини таъминлашга алоҳида аҳамият берилмоқда.

Ҳудудда 1908 нафар аёл истиқомат қилади. Аёлларнинг ҳаётида учраётган турли хил маиший муаммоларни ҳал этишда маҳалланинг хотин-қизлар фаоли Раъно Абдуллаева маҳалла раиси, ҳоким ёрдмачиси билан биргаликда самарали равишда ҳамкорликни йўлга қўйган.

Бугунги кунда маҳаллада истиқомат қилувчи 68 нафар аёл “Аёллар дафтари”га киритилган бўлиб, улар доимий даромад манбаига эга бўлишлари билан дафтардан чиқарилади.

Қувонарлиси, ушбу аёллларнинг 14 нафарнинг ҳар бирига 5 млн. сўм миқдорида имтиёзли равишда кредитлар ажратилди. Улар ўз хонадонларида супурги тайёрлаш билан шуғулланишмоқда. 1 аёл бир кунда 10 дан ортиқ супурги тайёрлаб, аввало ички бозорларимизни арзон ҳом-ашё билан таъминламоқда. Қолаверса, тайёр маҳсулотлар Тошкент шаҳрига ҳам етказиб берилиб, Қозоғистон Республикасига эса экспорт қилинмоқда.

Ички бозорларимизда 1 та супурги нархи унинг катта-кичиклигига, зич тўқилганлигига қараб 8 минг сўмдан 15 минг сўмгача сотиляпти.

Шундан ҳам билса бўладики, 1 нафар ҳунарманд аёл бир кунда 100 минг. сўмдан ортиқ даромад топиб, оилавий бюджетига ўз хиссасини қўшмоқда.

Боғ маҳалласи қишлоқ ҳудуди ҳисобланса ҳам, қишлоқ аёллари ўтаётган кунларидан асло нолишмайди. Аксинча, қишлоқ хўжалиги махсулотларини етиштириш, чорвачилик, ҳунармандчилик билан шуғилланишга барча қулайликлар мавжудлигини мамнуният билан эътироф этишади.

Яқинда ҳоким ёрдамчиси ҳамда хотин-қизлар фаолининг кўмаги билан “Аёллар дафтари” да турувчи 1 нафар аёлга ўз томорқасида иссиқхона ташкил этиши учун 33 млн. сўм миқдорида субсидия ажратилди. Шунингдек, “Аёллар дафтари”даги 15 нафар аёлга деҳқончилик қилишлари учун ер майдонлари ажратилиб, бандлиги таъминланди. Ундан ташқари, 8 нафар аёллар тикувчилик бўйича касбга ўқитилмоқда.

Маҳаллада аёллар саломатлигини сақлашга ҳам алоҳида эътибор қаратилмоқда. Яқинда 400 нафар аёл тиббий кўрикдан ўтказилиб, зарурий дори-дармонлар билан таъминланди.

Маҳалланинг хотин-қизлар фаоли Раъно Абдуллаева “Оқила аёллар” ҳаракати аъзолари билан биргаликда оилаларда келиб чиққан нотинчлик ва ажримларнинг олдини олиш мақсадида доимий равишда учрашувлар, тарғибот тадбирларини ўтказиб келади.

Шу кунга қадар, маҳаллада турли сабаблар билан келиб чиққан оилавий низолар ўрганиб чиқилиб, ажрим ёқасида турган 9 та оила яраштирилди.

“Оқила аёллар” ҳаракати аъзолари, кўча бошилари маҳаллада янгидан оила қурган ёшлар билан мулоқотни самарали тарзда йўлга қўйишган.

Ёши улуғ онахон ва отахонлар ёш оилаларга ҳаётнинг турли синовларини бирдамликда, ҳамжиҳатликда енгиб ўтиш кераклигини ҳаётий мисоллар орқали тушунтириб берадилар.

Боғ маҳалласида яшовчи аёллар қишлоқ аёли бўлсалар ҳам давлат ва жамоат ташкилотларида, хусусий бизнес соҳасида ишлаб, ишидан ташқари ўз томорқаларида қишлоқ хўжалиги махсуло тларини мунтазам равишда етишитириб, дастурхонларимизни сарҳил мевалар, полиз маҳсулотлари билан таъминлашмоқда.

Ундан ташқари, улар томонидан тайёрланаётган маҳсулотлар оилавий даромадлари юксалишига ҳамда мамлакатимиз иқтисодиётининг гуллаб-яшнашига катта ҳисса бўлиб қўшилмоқда.

15 октябрь − Халқаро қишлоқ аёллари кунида қишлоқ аёлларининг меҳнатлари, жонкуярликлари яна бир бор эътироф этилиб, уларга эҳтиром кўрсатилди.

Туман ҳокимлигининг Ахборот хизмати.