ВАТАНПАРВАР ЁШЛАРНИ ТАРБИЯЛАШДА ТАШАББУСКОР ТАШКИЛОТ

Юртимиздаги Мудофаага кўмаклашувчи “Ватанпарвар” ташкилоти ўз фаолияти давомида ёшларни ҳарбий-ватанпарварлик руҳида тарбиялаш, улар орасида спортни оммалаштириш ҳамда касбга ўқитиш билан бир қаторда аҳолининг эҳтиёжманд қатламини ҳам ҳар томонлама қўллаб-қувватлаш борасида ҳам бор куч ва имкониятини сафарбар этиб келмоқда.

Ташкилотнинг Амударё туман Кенгаши ўқув-спорт техника клубида ҳам жорий йилги “Инсон қадрини улуғлаш ва фаол маҳалла йили” Давлат дастурида белгиланган вазифалар ўз муддатларида, юқори савияда ташкил этилиб, самарали ишлар амалга оширилмоқда.

Ўқув-спорт техника клубида меҳнат бозорида талаб катта бўлаётган автоэлектрик, газ ва электр пайвандчиси, аккумуляторчи, двигателларни таъмирловчи уста ва тракторчи йўналишлари бўйича курслар ташкил этилган. Машғулотлар ўтказиладиган хоналар замонавий ўқитиш воситаларидан компьютерлар, интерактив доскалар билан жиҳозланган. Дарсларни ҳозирги замон талаблари асосида олиб бориш мақсадида синфхоналар аудио ва видео техника жиҳозлари билан ҳам таъминланган. Шунингдек, проектор ва телевизорлар, автотренажёр, шаҳар кўринишидаги макетлар, янги намунадаги қирқимли автомобиль двигатели ҳамда енгил автомобилнинг электрлаштирилган қирқимли ҳаракатланувчи стенди ўрнатилган. Ёшларнинг мукаммал билим олишларини таъминлаш мақсадида машғулотларга олий маълумотли мутахассис ўқитувчилар жалб этилган.

Ташкилот томонидан туманимиз ёшлари бандлигини таъминлаш, умуман келажагимиз эгаларининг ватанпарвар, юртга содиқ, ҳар томонлома етук ва баркамол бўлиб вояга етишига муносиб ҳисса қўшиб келинмоқда.

Жорий йилнинг шу даврига қадар “Ёшлар дафтари”да турувчиларни касбга йўналтириш мақсадида Ёшлар агентлиги туман бўлими тавсияси ва кўмаги билан 102 нафар ёшлар “В” тоифали ҳайдовчилик дастури бўйича ўқитилди ва мутахассисликка эга бўлишига эришилди. Ундан ташқари, ўқув курслари машғулотларини тугатган 250 нафари ўқувчига “В” тоифали, 100 нафар ўқувчига “ВС” тоифали ҳайдовчилик гувоҳномалар топширилди. Айни пайтда “В” тоифа бўйича 25 ўқувчи ва “ВС” тоифа бўйича 75 нафар ўқувчи машғулотларга иштирок этмоқда. Уларга 3 нафар олий маьлумотли ўқитувчи дарс машғулотларини ўтказиб келмоқда. Амалий машғулотларда эса 12 нафар таълим усталари ўқувчиларга 14 та енгил, 5 та юк автомобиллари ёрдамида бошқаришни ўргатишмоқда.

Ўқув спорт техника клубида спорт тўгараклари ҳам йўлга қўйилган. Муассасада барча қулайликларга эга хоналарда ўтилаётган ўқ отиш тўгарагида туман ёшлари мунтазам шуғулланиб келмоқда. Шунингдек, спортнинг техник ва амалий турлари бўйича мусобақалари ташкил этилиб, ёшларнинг фаол иштирок этишлари ва фахрли ўринлар ғолиблари бўлишларига кенг имконият ва етарли шароитлар яратилишига алоҳида эътибор қаратилмоқда.

Бир сўз билан айтилганда, “Ватанпарвар” ташкилотининг туман Кенгаши ўқув-спорт техника клуби жамоаси ёшларни Ватанни ҳимоя қилишга тайёрлаш, улар қалбида ватанпарварлик, юртга содиқлик, жасурлик ва мардлик туйғуларини мустаҳкамлаш каби шарафли вазифаларни бажаришда ташаббускорлик кўрсатиб келмоқда.

О.Худойберганова.