VATANPARVAR YoShLARNI TARBIYaLAShDA TAShABBUSKOR TAShKILOT

Yurtimizdagi Mudofaaga koʻmaklashuvchi “Vatanparvar” tashkiloti oʻz faoliyati davomida yoshlarni harbiy-vatanparvarlik ruhida tarbiyalash, ular orasida sportni ommalashtirish hamda kasbga oʻqitish bilan bir qatorda aholining ehtiyojmand qatlamini ham har tomonlama qoʻllab-quvvatlash borasida ham bor kuch va imkoniyatini safarbar etib kelmoqda.

Tashkilotning Amudaryo tuman Kengashi oʻquv-sport texnika klubida ham joriy yilgi “Inson qadrini ulugʻlash va faol mahalla yili” Davlat dasturida belgilangan vazifalar oʻz muddatlarida, yuqori saviyada tashkil etilib, samarali ishlar amalga oshirilmoqda.

Oʻquv-sport texnika klubida mehnat bozorida talab katta boʻlayotgan avtoelektrik, gaz va elektr payvandchisi, akkumulyatorchi, dvigatellarni taʼmirlovchi usta va traktorchi yoʻnalishlari boʻyicha kurslar tashkil etilgan. Mashgʻulotlar oʻtkaziladigan xonalar zamonaviy oʻqitish vositalaridan kompyuterlar, interaktiv doskalar bilan jihozlangan. Darslarni hozirgi zamon talablari asosida olib borish maqsadida sinfxonalar audio va video texnika jihozlari bilan ham taʼminlangan. Shuningdek, proyektor va televizorlar, avtotrenajyor, shahar koʻrinishidagi maketlar, yangi namunadagi qirqimli avtomobil dvigateli hamda yengil avtomobilning elektrlashtirilgan qirqimli harakatlanuvchi stendi oʻrnatilgan. Yoshlarning mukammal bilim olishlarini taʼminlash maqsadida mashgʻulotlarga oliy maʼlumotli mutaxassis oʻqituvchilar jalb etilgan.

Tashkilot tomonidan tumanimiz yoshlari bandligini taʼminlash, umuman kelajagimiz egalarining vatanparvar, yurtga sodiq, har tomonloma yetuk va barkamol boʻlib voyaga yetishiga munosib hissa qoʻshib kelinmoqda.

Joriy yilning shu davriga qadar “Yoshlar daftari”da turuvchilarni kasbga yoʻnaltirish maqsadida Yoshlar agentligi tuman boʻlimi tavsiyasi va koʻmagi bilan 102 nafar yoshlar “V” toifali haydovchilik dasturi boʻyicha oʻqitildi va mutaxassislikka ega boʻlishiga erishildi. Undan tashqari, oʻquv kurslari mashgʻulotlarini tugatgan 250 nafari oʻquvchiga “V” toifali, 100 nafar oʻquvchiga “VS” toifali haydovchilik guvohnomalar topshirildi. Ayni paytda “V” toifa boʻyicha 25 oʻquvchi va “VS” toifa boʻyicha 75 nafar oʻquvchi mashgʻulotlarga ishtirok etmoqda. Ularga 3 nafar oliy malumotli oʻqituvchi dars mashgʻulotlarini oʻtkazib kelmoqda. Amaliy mashgʻulotlarda esa 12 nafar taʼlim ustalari oʻquvchilarga 14 ta yengil, 5 ta yuk avtomobillari yordamida boshqarishni oʻrgatishmoqda.

Oʻquv sport texnika klubida sport toʻgaraklari ham yoʻlga qoʻyilgan. Muassasada barcha qulayliklarga ega xonalarda oʻtilayotgan oʻq otish toʻgaragida tuman yoshlari muntazam shugʻullanib kelmoqda. Shuningdek, sportning texnik va amaliy turlari boʻyicha musobaqalari tashkil etilib, yoshlarning faol ishtirok etishlari va faxrli oʻrinlar gʻoliblari boʻlishlariga keng imkoniyat va yetarli sharoitlar yaratilishiga alohida eʼtibor qaratilmoqda.

Bir soʻz bilan aytilganda, “Vatanparvar” tashkilotining tuman Kengashi oʻquv-sport texnika klubi jamoasi yoshlarni Vatanni himoya qilishga tayyorlash, ular qalbida vatanparvarlik, yurtga sodiqlik, jasurlik va mardlik tuygʻularini mustahkamlash kabi sharafli vazifalarni bajarishda tashabbuskorlik koʻrsatib kelmoqda.

O.Xudoyberganova.