Туман бўйича йил бошидан буён 2 672 нафар фуқарога идентификация ID картаси, 7 841 нафар фуқарога эса хорижга чиқиш биометрик паспорти расмийлаштирилди

Амударё тумани ички ишлар бўлимининг миграция ва фуқароликни расмийлаштириш бўлинмаси зиммасига миграция ва фуқароликни расмийлаштириш, паспорт тизими қоидаларига ва Ўзбекистон Республикасида бўлиш тартибига риоя этилишини таъминлаш, соҳага доир ҳуқуқбузарликлар содир этилишининг олдини олиш ва сабабларини аниқлаб, бартараф этиш каби масъулиятли вазифалар юкланган.

Бўлинма ходимлари ўзларининг зиммасидаги шарафли бурчини сидқидилдан адо этишга интилмоқдалар. Соҳага доир меъёрий ҳуқуқий ҳужжатлар асосида миграция ва фуқароликни расмийлаштириш ишлари олиб борилаётир. Шунингдек, туманимиз ҳудудида паспорт режими қоидаларига, мамлакатимизда бўлиш қоидаларига амал қилиниши назорат қилиниб, аниқланган камчиликлар бартараф этилмоқда.

Хусусан “Ўзбекистон Республикаси фуқароларининг чет элга чиқиш тартиби тўғрисида”ги Президент қарорига мувофиқ бўлинмага сентябрь ойида мурожаат этган 582 нафар фуқароларнинг маълумотлари қабул қилиниб, хорижга чиқиш биометрик паспорт расмийлаштирилди. Жорий йил бошидан бери эса 7 841 нафар фуқароларга ана шундай ҳужжат топширилди.

Ўзбекистон Республикаси Президентининг 2020 йил 22 сентябрь кунги “Ўзбекистон Республикасида идентификация ID карталарини жорий қилиш чора-тадбирлари тўғрисида”ги қарорига мувофиқ биометрик паспорт ўрнига жорий этилаётган идентификация ID карталарини олиш ва алмаштириш учун бўлинмага мурожаат қилган фуқароларга шу куннинг ўзида ID карта расмийлаштириб берилаётир. Бу бўйича 2022 йил давомида 2 672 нафар фуқаролар мурожаат қилди ва уларга тўлиқ ID карта расмийлаштириб берилди.

Туман ҳудудида Ички ишлар бўлими, туман прокуратураси, давлат хавфсизлик хизмати туман бўлими ҳамкорлигида ўтказилган “Паспорт-виза” тадбирларида йил бошидан бери 245 нафар фуқаро, август ойи ичида эса 16 нафар фуқаро паспорт тизими қоидаларини бузиб яшаб юрганлиги аниқланди ва булар ҳақида маъмурий баённомалар тўлдирилиб, давлат фойдасига жарималар ундирилди ва мазкур фуқароларнинг барчасига ID карта расмийлаштирилиб берилди.

Шунингдек, туманимизнинг чет давлатларга ишлаш истагида бориб, ўзига тегишли бўлган паспортини йўқотиб қўйган ё амал қилиш муддати тугаган, яроқсиз ҳолга келтириб қўйиб, “Ватанга қайтиш гувоҳномаси” билан келган 4 нафар фуқароларнинг рўйхати кўриб чиқиш учун туман Ички ишлар бўлимининг тегишли гуруҳларига берилди. Давлатдан қарздор, оиласи билан алоқасини йўқотган фуқароларни излаб топиш, сўраб-суриштириш бўйича ҳам тизимли ишлар олиб борилаяпти.

Туман аҳолисига паспорт режимига амал қилиш лозимлиги, ID карта ва чет элга чиқиш биометрик паспортининг қулайликлари, паспорт олиш тартиби ҳақида овул ва маҳаллаларда, корхона-ташкилотларда, таълим муассасаларида кенг тарғиб қилинаётгани ўзининг самараларини бермоқда.

Ҳафтанинг ҳар пайшанба кунида “Паспорт-виза” тадбирлари ўтказилиб, ушбу жараёнларда туманимизда сентябрь ойи давомида 2 нафар, йил бошидан бери 8 нафар Ўзбекистонда бўлиш қоидаларига амал қилмасдан яшаб келаётган шахслар аниқланиб, тегишли чора-тадбирлар амалга оширилди.

Паспорт – ҳар бир фуқаронинг шахсини тасдиқловчи ҳужжатидир. Паспорт режимига амал қилиш эса ҳар биримизнинг бурчимиз.

Абдураҳмон УМАРОВ, Амударё тумани ИИБ миграция ва фуқароликни расмийлаштириш бўлинмаси бошлиғи, капитан.