Tuman boʻyicha yil boshidan buyon 2 672 nafar fuqaroga identifikatsiya ID kartasi, 7 841 nafar fuqaroga esa xorijga chiqish biometrik pasporti rasmiylashtirildi

Amudaryo tumani ichki ishlar boʻlimining migratsiya va fuqarolikni rasmiylashtirish boʻlinmasi zimmasiga migratsiya va fuqarolikni rasmiylashtirish, pasport tizimi qoidalariga va Oʻzbekiston Respublikasida boʻlish tartibiga rioya etilishini taʼminlash, sohaga doir huquqbuzarliklar sodir etilishining oldini olish va sabablarini aniqlab, bartaraf etish kabi masʼuliyatli vazifalar yuklangan.

Boʻlinma xodimlari oʻzlarining zimmasidagi sharafli burchini sidqidildan ado etishga intilmoqdalar. Sohaga doir meʼyoriy huquqiy hujjatlar asosida migratsiya va fuqarolikni rasmiylashtirish ishlari olib borilayotir. Shuningdek, tumanimiz hududida pasport rejimi qoidalariga, mamlakatimizda boʻlish qoidalariga amal qilinishi nazorat qilinib, aniqlangan kamchiliklar bartaraf etilmoqda.

Xususan “Oʻzbekiston Respublikasi fuqarolarining chet elga chiqish tartibi toʻgʻrisida”gi Prezident qaroriga muvofiq boʻlinmaga sentyabr oyida murojaat etgan 582 nafar fuqarolarning maʼlumotlari qabul qilinib, xorijga chiqish biometrik pasport rasmiylashtirildi. Joriy yil boshidan beri esa 7 841 nafar fuqarolarga ana shunday hujjat topshirildi.

Oʻzbekiston Respublikasi Prezidentining 2020-yil 22-sentyabr kungi “Oʻzbekiston Respublikasida identifikatsiya ID kartalarini joriy qilish chora-tadbirlari toʻgʻrisida”gi qaroriga muvofiq biometrik pasport oʻrniga joriy etilayotgan identifikatsiya ID kartalarini olish va almashtirish uchun boʻlinmaga murojaat qilgan fuqarolarga shu kunning oʻzida ID karta rasmiylashtirib berilayotir. Bu boʻyicha 2022-yil davomida 2 672 nafar fuqarolar murojaat qildi va ularga toʻliq ID karta rasmiylashtirib berildi.

Tuman hududida Ichki ishlar boʻlimi, tuman prokuraturasi, davlat xavfsizlik xizmati tuman boʻlimi hamkorligida oʻtkazilgan “Pasport-viza” tadbirlarida yil boshidan beri 245 nafar fuqaro, avgust oyi ichida esa 16 nafar fuqaro pasport tizimi qoidalarini buzib yashab yurganligi aniqlandi va bular haqida maʼmuriy bayonnomalar toʻldirilib, davlat foydasiga jarimalar undirildi va mazkur fuqarolarning barchasiga ID karta rasmiylashtirilib berildi.

Shuningdek, tumanimizning chet davlatlarga ishlash istagida borib, oʻziga tegishli boʻlgan pasportini yoʻqotib qoʻygan yo amal qilish muddati tugagan, yaroqsiz holga keltirib qoʻyib, “Vatanga qaytish guvohnomasi” bilan kelgan 4 nafar fuqarolarning roʻyxati koʻrib chiqish uchun tuman Ichki ishlar boʻlimining tegishli guruhlariga berildi. Davlatdan qarzdor, oilasi bilan aloqasini yoʻqotgan fuqarolarni izlab topish, soʻrab-surishtirish boʻyicha ham tizimli ishlar olib borilayapti.

Tuman aholisiga pasport rejimiga amal qilish lozimligi, ID karta va chet elga chiqish biometrik pasportining qulayliklari, pasport olish tartibi haqida ovul va mahallalarda, korxona-tashkilotlarda, taʼlim muassasalarida keng targʻib qilinayotgani oʻzining samaralarini bermoqda.

Haftaning har payshanba kunida “Pasport-viza” tadbirlari oʻtkazilib, ushbu jarayonlarda tumanimizda sentyabr oyi davomida 2 nafar, yil boshidan beri 8 nafar Oʻzbekistonda boʻlish qoidalariga amal qilmasdan yashab kelayotgan shaxslar aniqlanib, tegishli chora-tadbirlar amalga oshirildi.

Pasport – har bir fuqaroning shaxsini tasdiqlovchi hujjatidir. Pasport rejimiga amal qilish esa har birimizning burchimiz.

Abdurahmon UMAROV, Amudaryo tumani IIB migratsiya va fuqarolikni rasmiylashtirish boʻlinmasi boshligʻi, kapitan.