Қорақалпоғистон Республикаси прокурори ўринбосари иштирокида сайёр қабул ўтказилди

Мамлакатимиз бўйлаб турли корхона, ташкилот раҳбарлари томонидан ўтказилиб келинаётган сайёр қабуллар оворагарчиликларнинг олдини олиш, муаммоларни имкон қадар тезкор ҳал этишда муҳим аҳамият касб этаётир.

26 октябрь куни Амударё туманининг Амир Темур номли овул фуқаролар йиғинида Қорақалпоғистон Республикаси прокурори ўринбосари, адлия катта маслаҳатчиси Ерпўлат Каипбергенов иштирокида сайёр қабул бўлиб ўтди.

Унда туман прокурори Азиз Рўзметов, туман ҳокимининг биринчи ўринбосари Рашид Салаев, ҳоким ўрнбосари Нодирбек Камолов, тегишли корхона, ташкилот раҳбарлари, овул ва маҳалла фуқаролар йиғинлари масъуллари, “Аёллар дафтари”га киритилган хотин-қизлар, “Ёшлар дафтари”га киритилган ёшлар ҳамда аҳоли вакиллари иштирок этдилар.

Сайёр қабулда туман ҳокимининг биринчи ўринбосари Рашид Салаев фуқароларга туман аҳолисининг томорқа ерларидан унумли фойдаланиб, юқори даромадга эга бўлаётганлигини таъкидлади. Шунингдек, овул ва маҳаллаларда замонавий архитектура талабларига жавоб берадиган маиший хизмат ва савдо нуқталари қурилаётганлигини таъкидлаб, маҳаллаларнинг инфратузилмаси, келажакдаги қиёфаси борасида амалга оширилиши белгиланган вазифалар тўғрисида маълумот берариб ўтди.

Шундан сўнг, Қорақалпоғистон Республикаси прокурори ўринбосари, катта адлия маслаҳатчиси Ерпўлат Каипбергенов сайёр қабул давомида келиб тушган ҳеч бир мурожаат эътибордан четда қолмаслигини, имкон қадар ижобий ҳал қилинишини айтиб ўтди.

Шу билан бирга Ўзбекистон Республикаси Президенти томонидан 2022 йил 31 август куни имзоланган “Қорақалпоғистон Реcпубликасида тадбиркорлик, инновацион технологиялар ва инфратузилмаларни жадал суръатларда ривожлантириш орқали аҳоли фаровонлигини оширишнинг қўшимча чора-тадбирлари тўғрисида”ги фармонининг мазмун-моҳияти ҳақида батафсил тушунтиришлар берди.

Сайёр қабулда фуқаролардан турли мазмундаги мурожаатлар келиб тушди.

Жумладан, фуқаро Файзулла Бобожанов тўйхона ва мини футбол майдончаси қуриш учун ер майдони ажратилиши бўйича, фуқаро Эркин Собиров оқова сув муаммоси бўича, Равшанбек Бобожанов ҳамда Норгул Мамутовалар табиий газ билан боғлиқ муаммолар бўйича мурожаат қилдилар.

Келиб тушган барча мурожаат тегишли тартибда қайд қилиниб, тегишли корхона, ташкилот раҳбарларига йўналтирилди ва муддатлар белгиланиб, ижроси назоратга олинди.

Сайёр қабулда фуқаро Зафар Йўлдашевнинг имтиёзли кредит олиш масаласида қилган мурожаати бўйича унинг яшаш шароити ўрганиб чиқилди ҳамда маҳалланинг ҳоким ёрдамчисига 5 иш куни ичида ушбу фуқарога имтиёзли кредит ажратиш бўйича кўрсатмалар берилди.

Шунингдек, фуқаро Фазилат Норимова фарзанди олий таълим муссасасида тўлов-контарк асосида таълим олаётганлиги, аммо контракт тўловини тўлашга оилавий шароити тўғри келмаётганини айтиб мурожаат қилди. Ушбу фуқаронинг ҳам яшаш шароити ўрганиб чиқилиб, Ёшлар ишлари агентлиги туман бўлими бошлиғи Сардор Исмоиловга тез фурсатда контракт тўлови бўйича талабанинг рўйхатга олиниши ва ёрдам кўрсатиш бўйича кўрсатмалар берилди.

Шу ўринда қайд этиш лозимки, бугун ҳар бир фуқаро учун барча давлат органлари ва ташкилотларининг эшиклари очиқ. Давлат идоралари раҳбарлари фуқароларнинг мурожаатларини иш хоналарида эмас, балки жойига бориб, ҳақиқий ҳолатни кўрган ва ўрганган ҳолда кўриб чиқмоқдалар.

Aйтиш керакки, сайёр қабуллар аҳоли муаммоларини жойида, тез ва самарали ҳал этиш имконини бераётгани, ҳудудларда йиғилиб қолган муаммоларни аниқлаш ва бартараф этилишида давлат органлари ва ташкилотлари олдига вазифалар қўяётгани билан муҳим аҳамият касб этмоқда.

Туман ҳокимлигининг Ахборот хизмати.