Qoraqalpogʻiston Respublikasi prokurori oʻrinbosari ishtirokida sayyor qabul oʻtkazildi

Mamlakatimiz boʻylab turli korxona, tashkilot rahbarlari tomonidan oʻtkazilib kelinayotgan sayyor qabullar ovoragarchiliklarning oldini olish, muammolarni imkon qadar tezkor hal etishda muhim ahamiyat kasb etayotir.

26-oktyabr kuni Amudaryo tumanining Amir Temur nomli ovul fuqarolar yigʻinida Qoraqalpogʻiston Respublikasi prokurori oʻrinbosari, adliya katta maslahatchisi Yerpoʻlat Kaipbergenov ishtirokida sayyor qabul boʻlib oʻtdi.

Unda tuman prokurori Aziz Roʻzmetov, tuman hokimining birinchi oʻrinbosari Rashid Salayev, hokim oʻrnbosari Nodirbek Kamolov, tegishli korxona, tashkilot rahbarlari, ovul va mahalla fuqarolar yigʻinlari masʼullari, “Ayollar daftari”ga kiritilgan xotin-qizlar, “Yoshlar daftari”ga kiritilgan yoshlar hamda aholi vakillari ishtirok etdilar.

Sayyor qabulda tuman hokimining birinchi oʻrinbosari Rashid Salayev fuqarolarga tuman aholisining tomorqa yerlaridan unumli foydalanib, yuqori daromadga ega boʻlayotganligini taʼkidladi. Shuningdek, ovul va mahallalarda zamonaviy arxitektura talablariga javob beradigan maishiy xizmat va savdo nuqtalari qurilayotganligini taʼkidlab, mahallalarning infratuzilmasi, kelajakdagi qiyofasi borasida amalga oshirilishi belgilangan vazifalar toʻgʻrisida maʼlumot berarib oʻtdi.

Shundan soʻng, Qoraqalpogʻiston Respublikasi prokurori oʻrinbosari, katta adliya maslahatchisi Yerpoʻlat Kaipbergenov sayyor qabul davomida kelib tushgan hech bir murojaat eʼtibordan chetda qolmasligini, imkon qadar ijobiy hal qilinishini aytib oʻtdi.

Shu bilan birga Oʻzbekiston Respublikasi Prezidenti tomonidan 2022-yil 31-avgust kuni imzolangan “Qoraqalpogʻiston Recpublikasida tadbirkorlik, innovatsion texnologiyalar va infratuzilmalarni jadal surʼatlarda rivojlantirish orqali aholi farovonligini oshirishning qoʻshimcha chora-tadbirlari toʻgʻrisida”gi farmonining mazmun-mohiyati haqida batafsil tushuntirishlar berdi.

Sayyor qabulda fuqarolardan turli mazmundagi murojaatlar kelib tushdi.

Jumladan, fuqaro Fayzulla Bobojanov toʻyxona va mini futbol maydonchasi qurish uchun yer maydoni ajratilishi boʻyicha, fuqaro Erkin Sobirov oqova suv muammosi boʻicha, Ravshanbek Bobojanov hamda Norgul Mamutovalar tabiiy gaz bilan bogʻliq muammolar boʻyicha murojaat qildilar.

Kelib tushgan barcha murojaat tegishli tartibda qayd qilinib, tegishli korxona, tashkilot rahbarlariga yoʻnaltirildi va muddatlar belgilanib, ijrosi nazoratga olindi.

Sayyor qabulda fuqaro Zafar Yoʻldashevning imtiyozli kredit olish masalasida qilgan murojaati boʻyicha uning yashash sharoiti oʻrganib chiqildi hamda mahallaning hokim yordamchisiga 5 ish kuni ichida ushbu fuqaroga imtiyozli kredit ajratish boʻyicha koʻrsatmalar berildi.

Shuningdek, fuqaro Fazilat Norimova farzandi oliy taʼlim mussasasida toʻlov-kontark asosida taʼlim olayotganligi, ammo kontrakt toʻlovini toʻlashga oilaviy sharoiti toʻgʻri kelmayotganini aytib murojaat qildi. Ushbu fuqaroning ham yashash sharoiti oʻrganib chiqilib, Yoshlar ishlari agentligi tuman boʻlimi boshligʻi Sardor Ismoilovga tez fursatda kontrakt toʻlovi boʻyicha talabaning roʻyxatga olinishi va yordam koʻrsatish boʻyicha koʻrsatmalar berildi.

Shu oʻrinda qayd etish lozimki, bugun har bir fuqaro uchun barcha davlat organlari va tashkilotlarining eshiklari ochiq. Davlat idoralari rahbarlari fuqarolarning murojaatlarini ish xonalarida emas, balki joyiga borib, haqiqiy holatni koʻrgan va oʻrgangan holda koʻrib chiqmoqdalar.

Aytish kerakki, sayyor qabullar aholi muammolarini joyida, tez va samarali hal etish imkonini berayotgani, hududlarda yigʻilib qolgan muammolarni aniqlash va bartaraf etilishida davlat organlari va tashkilotlari oldiga vazifalar qoʻyayotgani bilan muhim ahamiyat kasb etmoqda.

Tuman hokimligining Axborot xizmati.