“ХИЗМАТ – БЕМИННАТ” ЛОЙИҲАСИ ФАОЛИ АЗИМБОЙ САФАРБОЕВГА ЎЗМТДП МАРКАЗИЙ КЕНГАШИ РАИСИНИНГ ТАШАККУРНОМАСИ ТОПШИРИЛДИ

Ўзбекистон “Миллий тикланиш” демократик партияси ташаббуси билан ўтказилаётган қатор лойиҳалар бугун жуда кўплаб ёшларни ўз атрофига жамлаб, уларнинг иқтидор ва қобилиятларини намоён этишларида, касб-ҳунар эгаллашларида муҳим аҳамият касб этмоқда. Айниқса, партия ташаббуси билан ёшларнинг бўш вақтларини мазмунли ўтказишлари, кам таъминланган оилалар фарзандларини турли хил фан ва ҳунар тўгаракларига жалб қилиш мақсадида ташкил этилган “Хизмат – беминнат” лойиҳаси амалда ўз самарасини бермоқда.

Шу йил 1 ноябрь куни Ўзбекистон “Миллий тикланиш” демократик партияси Амударё туман Кенгаши ижрочи котиби Ширин Янгибоева мазкур лойиҳа доирасида ташкил этилган математика фани бўйича ўқув курсида ўқувчиларга таълим бериб келаётган фидойи ўқитувчи ҳамда партия фаоли Азимбой Сафарбоевга Ўзбекистон “Миллий тикланиш” демократик партияси Марказий Кенгаши раиси Алишер Қодировнинг ташаккурномасини топширди.

Шунингдек, Ўзбекистон халқ таълими аълочиси кўкрак нишони, “Қорақалпоғистонда хизмат кўрсатган халқ таълими ходими” фахрий унвони соҳиби Азимбой Сафарбоевнинг ёшларга таълим-тарбия беришдек эзгу ишлардаги жонкуярлиги, фидойилигини тилга олиб ўтди.

Мазкур лойиҳа доирасида кўп йиллардан буён умумтаълим мактабларидаги кам таъминланган оилалар фарзандларини беминнат ўқитиб, таълим-тарбия бериб келаётган фидойи устозлардан бири Азимбой Сафарбоев “Хизмат – беминнат” лойиҳаси доирасида математика фанидан бепул ўқув курсини ташкил этиб, ҳар йили кам таъминланган оилалар фарзандлари бўлган ўқувчи-ёшларга таълим-тарбия бериб келмоқда.

Ушбу ўқув курсида фанни мукаммал ўзлаштирган ёшлар турли олий ўқув юртлари талабалари бўлишмоқда. Жонкуяр ва талабчан устоз Азимбой Сафарбоевнинг ана шундай фидойиликлари инобатга олиниб, Ўзбекистон “Миллий тикланиш” демократик партияси Марказий Кенгаши раиси Алишер Қодиров томонидан ташаккурнома билан тақдирланди.

Таъкидланганидек, Партиянинг “Хизмат – беминнат” лойиҳаси партия дастурий вазифалари ҳамда Ўзбекистон Республикасини янада ривожлантириш бўйича Ҳаракатлар стратегиясида ёшларга оид белгиланган вазифаларни амалга ошириш, шунингдек, “Ижтимоий шериклик тўғрисида”ги ва “Ёшларга оид давлат сиёсати тўғрисида”ги қонунлар ижросини таъминлаш мақсадида ташкил этилган. Мазкур лойиҳа билим ва касб-ҳунар ўрганиш истагида бўлган ёшларни ўз атрофига бирлаштириб келмоқда.

Лойиҳа доирасида партиянинг туман Кенгаши томонидан жорий йил ҳисобига жами 5 та бепул ўқув курслари ташкил этилди. Мазкур лойиҳа бўйича 60 дан зиёд ёшлар бепул таълим ва касб-ҳунарга жалб қилиниб, уларга кўнгилли ўқитувчи ва мураббийлар раҳбарлик қилган бўлса, жорий йилда ҳам ушбу ишлар давом эттирилмоқда.

Тадбир давомида ёшларнинг ҳаётга бўлган қатъий ишонч ва қарашларини шакллантириш, уларни миллий ва умуминсоний қадриятларга ҳурмат руҳида тарбиялаш, касбга йўналтириш ва ҳаётда ўз ўринларига эга бўлишларида устозларнинг хизмати катта эканлиги тилга олиниб, фидойи ўқитувчи Азимбой Сафарбоевга алоҳида миннатдорчилик билдирилди.

Партиянинг ушбу лойиҳани ташкил этишидан асосий мақсади ёшларнинг ижтимоий жиҳатдан шаклланиши, интеллектуал, ижодий, жисмоний, ахлоқий ва бошқа йўналишдаги салоҳиятларини юзага чиқаришларига, уларнинг етук авлод бўлиб камол топишига кўмаклашиш ва шарт-шароитлар яратишдан иборат. Шу билан бирга уларнинг тафаккурларини кенгайтириш, дунёқарашини бузишга олиб келадиган хатти-ҳаракатлар ва ғоялардан ҳимоя қилиш борасидаги вазифаларни амалга ошириш, юрт келажагини яратишга қодир ёшлар вояга етишига ҳисса қўшишдир.

Озода Худойберганова.