“XIZMAT – BEMINNAT” LOYIHASI FAOLI AZIMBOY SAFARBOYeVGA OʻZMTDP MARKAZIY KENGAShI RAISINING TAShAKKURNOMASI TOPShIRILDI

Oʻzbekiston “Milliy tiklanish” demokratik partiyasi tashabbusi bilan oʻtkazilayotgan qator loyihalar bugun juda koʻplab yoshlarni oʻz atrofiga jamlab, ularning iqtidor va qobiliyatlarini namoyon etishlarida, kasb-hunar egallashlarida muhim ahamiyat kasb etmoqda. Ayniqsa, partiya tashabbusi bilan yoshlarning boʻsh vaqtlarini mazmunli oʻtkazishlari, kam taʼminlangan oilalar farzandlarini turli xil fan va hunar toʻgaraklariga jalb qilish maqsadida tashkil etilgan “Xizmat – beminnat” loyihasi amalda oʻz samarasini bermoqda.

Shu yil 1-noyabr kuni Oʻzbekiston “Milliy tiklanish” demokratik partiyasi Amudaryo tuman Kengashi ijrochi kotibi Shirin Yangiboyeva mazkur loyiha doirasida tashkil etilgan matematika fani boʻyicha oʻquv kursida oʻquvchilarga taʼlim berib kelayotgan fidoyi oʻqituvchi hamda partiya faoli Azimboy Safarboyevga Oʻzbekiston “Milliy tiklanish” demokratik partiyasi Markaziy Kengashi raisi Alisher Qodirovning tashakkurnomasini topshirdi.

Shuningdek, Oʻzbekiston xalq taʼlimi aʼlochisi koʻkrak nishoni, “Qoraqalpogʻistonda xizmat koʻrsatgan xalq taʼlimi xodimi” faxriy unvoni sohibi Azimboy Safarboyevning yoshlarga taʼlim-tarbiya berishdek ezgu ishlardagi jonkuyarligi, fidoyiligini tilga olib oʻtdi.

Mazkur loyiha doirasida koʻp yillardan buyon umumtaʼlim maktablaridagi kam taʼminlangan oilalar farzandlarini beminnat oʻqitib, taʼlim-tarbiya berib kelayotgan fidoyi ustozlardan biri Azimboy Safarboyev “Xizmat – beminnat” loyihasi doirasida matematika fanidan bepul oʻquv kursini tashkil etib, har yili kam taʼminlangan oilalar farzandlari boʻlgan oʻquvchi-yoshlarga taʼlim-tarbiya berib kelmoqda.

Ushbu oʻquv kursida fanni mukammal oʻzlashtirgan yoshlar turli oliy oʻquv yurtlari talabalari boʻlishmoqda. Jonkuyar va talabchan ustoz Azimboy Safarboyevning ana shunday fidoyiliklari inobatga olinib, Oʻzbekiston “Milliy tiklanish” demokratik partiyasi Markaziy Kengashi raisi Alisher Qodirov tomonidan tashakkurnoma bilan taqdirlandi.

Taʼkidlanganidek, Partiyaning “Xizmat – beminnat” loyihasi partiya dasturiy vazifalari hamda Oʻzbekiston Respublikasini yanada rivojlantirish boʻyicha Harakatlar strategiyasida yoshlarga oid belgilangan vazifalarni amalga oshirish, shuningdek, “Ijtimoiy sheriklik toʻgʻrisida”gi va “Yoshlarga oid davlat siyosati toʻgʻrisida”gi qonunlar ijrosini taʼminlash maqsadida tashkil etilgan. Mazkur loyiha bilim va kasb-hunar oʻrganish istagida boʻlgan yoshlarni oʻz atrofiga birlashtirib kelmoqda.

Loyiha doirasida partiyaning tuman Kengashi tomonidan joriy yil hisobiga jami 5 ta bepul oʻquv kurslari tashkil etildi. Mazkur loyiha boʻyicha 60 dan ziyod yoshlar bepul taʼlim va kasb-hunarga jalb qilinib, ularga koʻngilli oʻqituvchi va murabbiylar rahbarlik qilgan boʻlsa, joriy yilda ham ushbu ishlar davom ettirilmoqda.

Tadbir davomida yoshlarning hayotga boʻlgan qatʼiy ishonch va qarashlarini shakllantirish, ularni milliy va umuminsoniy qadriyatlarga hurmat ruhida tarbiyalash, kasbga yoʻnaltirish va hayotda oʻz oʻrinlariga ega boʻlishlarida ustozlarning xizmati katta ekanligi tilga olinib, fidoyi oʻqituvchi Azimboy Safarboyevga alohida minnatdorchilik bildirildi.

Partiyaning ushbu loyihani tashkil etishidan asosiy maqsadi yoshlarning ijtimoiy jihatdan shakllanishi, intellektual, ijodiy, jismoniy, axloqiy va boshqa yoʻnalishdagi salohiyatlarini yuzaga chiqarishlariga, ularning yetuk avlod boʻlib kamol topishiga koʻmaklashish va shart-sharoitlar yaratishdan iborat. Shu bilan birga ularning tafakkurlarini kengaytirish, dunyoqarashini buzishga olib keladigan xatti-harakatlar va gʻoyalardan himoya qilish borasidagi vazifalarni amalga oshirish, yurt kelajagini yaratishga qodir yoshlar voyaga yetishiga hissa qoʻshishdir.

Ozoda Xudoyberganova.