ИИБ ПРОБАЦИЯ ГУРУҲИДА ЖАЗО МУДДАТИНИ ЎТАЁТГАН 15 НАФАР МАҲКУМ МУДДАТИДАН ИЛГАРИ ШАРТЛИ РАВИШДА ОЗОД ЭТИЛДИ НЕГА?

Халқимизнинг кечиримлилик, бағрикенглик каби ўзига хос хислатлари  давлатимиз ҳуқуқий – меъёрий ҳужжатларида ҳам ўз ифодасини топган.

Яқинда жиноят ишлари бўйича  Амударё туман судининг Дурунки маҳалласида бўлиб ўтган сайёр суд мажлисида туман Ички ишлар бўлими Пробация гуруҳи ҳисобида турган ва тузалиш йўлига ўтган 15 нафар маҳкумларга нисбатан киритилган  тақдимномаларни кўриб чиқиб, уларнинг ўталмаган жазо муддатидан Ўзбекистон Республикаси Жиноят Кодексининг тегишли моддасига асосан муддатидан илгари шартли равишда озод қилингани ҳам бунга мисол бўла олади.

Туманимизнинг маҳаллаларидан бирида яшовчи фуқаро йигитлик ёшидан ўтиб, оқ қорани танийдиган вақтида ўз-ўзига масъулиятсизлиги оқибатида жиноят кўчасига кириб қолди. Унга жиноят ишлари бўйича туман суди бу қилмиши учун салкам 9 йил озодликдан маҳрум қилиш жазосини тайинлади. У шундагина ўз оиласи бағрида эмин-эркин, бахтиёр яшаб юрган кунларининг қадрини англаб етди. Яқинлари соғинчи, қилмишидан пушаймонлик уни тузалиш йўлига ўтишига сабаб бўлди. Жазони ижро этиш муассасасидаги ўзини тутиши, хулқ-атвори ва меҳнатга иштиёқи, энг муҳими, қилмишидан сидқидилдан пушаймонлиги сабаб, бир йилдан ортиқ вақт ўтиб, унга белгиланган озодликдан маҳрум этиш жазосининг ўталмай қолган қисми ахлоқ тузатиш ишлари жазосига алмаштирилди.

У оиласи бағрида, ойлик маошининг 20 фоизини давлат фойдасига ўтказиб, ўзи тайинланган касбида ҳалол меҳнат қилиб содир этган жиноятидан чин кўнгилдан пушаймонлигини  исботлади, намунали хулқ-атворда бўлди. Туман Ички ишлар бўлими Пробация гуруҳи ҳисобида юриб, белгиланган тартибга қатъий амал қилди. Маҳалласида, меҳнат жамоасида булар ҳақли равишда эътироф этилди.

Шу боисдан суд мажлисида унинг ахлоқ тузатиш ишлари жазосининг ўталмаган 2 йил 8 ой жазо муддатидан Ўзбекистон Республикаси Жиноят Кодексининг  тегишли моддасига асосан муддатидан илгари шартли равишда озод қилиш масаласини кўриб чиқишлик учун судга киритган тақдимномаси ижобий ҳал бўлди.

Шу мажлисда мазкур фуқаро каби билиб-билмай жиноят кўчасига кириб қолган, қилмишига яраша жазо олиб, бундан тегишли хулоса чиқарган ва тузалиш йўлига ўтган, туман Ички ишлар бўлими Пробация гуруҳи ҳисобида туриб, жазо муддатини ўтаётган яна 14 нафар маҳкумнинг судга киритган тақдимномаси кўриб чиқилди.

Улар жазо ўташ тартиб-қоидаларига тўла амал қилгани, суд томонидан зиммасига юклатилган мажбуриятларни тўла бажаргани ва меҳнатга ҳалол муносабатда  бўлганлиги учун ўталмаган жазо муддатидан Ўзбекистон Республикаси Жиноят Кодексининг тегишли моддасига асосан муддатидан илгари шартли равишда озод қилинди.

Инсониятга озодлик – сув ва ҳаво каби зарур. У озодликдагина чинакам бахтиёр бўла олади. Буни эса ўз вақтида қадрлаш керак.

Ойгул РАЖАБОВА.