IIB PROBATsIYa GURUHIDA JAZO MUDDATINI OʻTAYoTGAN 15 NAFAR MAHKUM MUDDATIDAN ILGARI ShARTLI RAVIShDA OZOD ETILDI NEGA?

Xalqimizning kechirimlilik, bagʻrikenglik kabi oʻziga xos xislatlari  davlatimiz huquqiy – meʼyoriy hujjatlarida ham oʻz ifodasini topgan.

Yaqinda jinoyat ishlari boʻyicha  Amudaryo tuman sudining Durunki mahallasida boʻlib oʻtgan sayyor sud majlisida tuman Ichki ishlar boʻlimi Probatsiya guruhi hisobida turgan va tuzalish yoʻliga oʻtgan 15 nafar mahkumlarga nisbatan kiritilgan  taqdimnomalarni koʻrib chiqib, ularning oʻtalmagan jazo muddatidan Oʻzbekiston Respublikasi Jinoyat Kodeksining tegishli moddasiga asosan muddatidan ilgari shartli ravishda ozod qilingani ham bunga misol boʻla oladi.

Tumanimizning mahallalaridan birida yashovchi fuqaro yigitlik yoshidan oʻtib, oq qorani taniydigan vaqtida oʻz-oʻziga masʼuliyatsizligi oqibatida jinoyat koʻchasiga kirib qoldi. Unga jinoyat ishlari boʻyicha tuman sudi bu qilmishi uchun salkam 9-yil ozodlikdan mahrum qilish jazosini tayinladi. U shundagina oʻz oilasi bagʻrida emin-erkin, baxtiyor yashab yurgan kunlarining qadrini anglab yetdi. Yaqinlari sogʻinchi, qilmishidan pushaymonlik uni tuzalish yoʻliga oʻtishiga sabab boʻldi. Jazoni ijro etish muassasasidagi oʻzini tutishi, xulq-atvori va mehnatga ishtiyoqi, eng muhimi, qilmishidan sidqidildan pushaymonligi sabab, bir yildan ortiq vaqt oʻtib, unga belgilangan ozodlikdan mahrum etish jazosining oʻtalmay qolgan qismi axloq tuzatish ishlari jazosiga almashtirildi.

U oilasi bagʻrida, oylik maoshining 20 foizini davlat foydasiga oʻtkazib, oʻzi tayinlangan kasbida halol mehnat qilib sodir etgan jinoyatidan chin koʻngildan pushaymonligini  isbotladi, namunali xulq-atvorda boʻldi. Tuman Ichki ishlar boʻlimi Probatsiya guruhi hisobida yurib, belgilangan tartibga qatʼiy amal qildi. Mahallasida, mehnat jamoasida bular haqli ravishda eʼtirof etildi.

Shu boisdan sud majlisida uning axloq tuzatish ishlari jazosining oʻtalmagan 2-yil 8 oy jazo muddatidan Oʻzbekiston Respublikasi Jinoyat Kodeksining  tegishli moddasiga asosan muddatidan ilgari shartli ravishda ozod qilish masalasini koʻrib chiqishlik uchun sudga kiritgan taqdimnomasi ijobiy hal boʻldi.

Shu majlisda mazkur fuqaro kabi bilib-bilmay jinoyat koʻchasiga kirib qolgan, qilmishiga yarasha jazo olib, bundan tegishli xulosa chiqargan va tuzalish yoʻliga oʻtgan, tuman Ichki ishlar boʻlimi Probatsiya guruhi hisobida turib, jazo muddatini oʻtayotgan yana 14 nafar mahkumning sudga kiritgan taqdimnomasi koʻrib chiqildi.

Ular jazo oʻtash tartib-qoidalariga toʻla amal qilgani, sud tomonidan zimmasiga yuklatilgan majburiyatlarni toʻla bajargani va mehnatga halol munosabatda  boʻlganligi uchun oʻtalmagan jazo muddatidan Oʻzbekiston Respublikasi Jinoyat Kodeksining tegishli moddasiga asosan muddatidan ilgari shartli ravishda ozod qilindi.

Insoniyatga ozodlik – suv va havo kabi zarur. U ozodlikdagina chinakam baxtiyor boʻla oladi. Buni esa oʻz vaqtida qadrlash kerak.

Oygul RAJABOVA.