КЎЧАТ ЭКИБ БОҒ ЯРАТСАК, ТАБИАТ МУСАФФО БЎЛАДИ
Яхши ният билан кўчат экиш, боғ-роғлар яратиш ота-боболаримиздан келаётган яхши удумлардан бири, миллий қадриятлардан бири ҳисобланади. Дунё миқёсидаги глобал муаммога айланиб бораётган айни пайтдаги экологик вазиятда ерга ниҳол қадаш ҳар қачонгидан ҳам долзарб аҳамият касб этаётганини бугун даврнинг ўзи кўрсатмоқда.
Шу кунларда юртимиз бўйлаб, Президентимиз Шавкат Мирзиёев ташаббуслари билан бошланган эзгу анъана – “Яшил макон” умуммиллий лойиҳаси доирасидаги кўчат экиш ишлари яна давом этмоқда.
Туманимизда «Яшил макон» умуммиллий лойиҳаси доирасида 2021 йил куз ва 2022 йил баҳор мавсумида 1 млн. 159 минг дона манзарали ва мевали дарахтлар кўчатлари экиш режалаштирилган. Шунга кўра 2021 йил ноябрь ва декабрь ойларида 434 минг 600 дона манзарали ва мевали дарахтлар кўчатлари экилди. Жорий йил баҳор мавсумида эса 724 минг 400 дона манзарали ва мевали дарахтлар кўчатлари экилди. Куз мавсуми давомида эса 412 минг 800 дона манзарали ва мевали дарахтлар кўчатлари экилиши кўзда тутилган сабабли тумандаги барча корхона-ташкилотлар фуқаролар йиғинлари, қишлоқ хўжалиги корхоналари, фермер хўжаликлари бу эзгу ишларда фаол қатнашишмоқда.
Туман ҳудудига Қорақалпоғистон иқлим шароитига мос келувчи дарахт кўчатлари танлаб олиниб экилмоқда. Кўчатлар асосан тумандаги Ўрмон хўжалиги иссиқхонасида етиштирилмоқда. Туман Ободонлаштириш бошқармаси томонидан ҳам махсус иссиқхоналарда 10 000 дона терак қаламчалари парвариш қилиниб, келгуси йилги баҳор мавсуми учун тайёрланмоқда. Ушбу дарахт кўчатларининг ўсишига, ривожланишига, суғориш ва агротехник ишловларига катта эътибор қаратилмоқда.
Лойиҳа доирасидаги мевали ва манзарали дарахт кўчатларининг экилишини ва ҳисоботини юритиш бўйича махсус штаб ташкил этилган. Ушбу штаб масъуллари томонидан барча экилган кўчатлар «Яшил макон» платформасига киритилиб, ҳисоботи юритилиб борилмоқда.
Ҳозирда атмосфера асосан, автотранспорт воситалари, турли завод-фабрикалар ва шу каби қурилмалар чиқараётган чиқинди газлар сабабидан ифлосланмоқда. Биз атмосферани тозалайдиган, қайта ҳаво ишлаб чиқариб берадиган табиий имкониятлардан кенг фойдаланишимиз лозим. Барчага маълумки, ўсимлик ва дарахтлар кислород ишлаб чиқарувчи энг қулай ва зарарсиз воситадир.
Шундай экан, кўчат экиб, боғ яратишга, атроф-муҳитни ободонлаштириш ва кўкаламзорлаштиришга ҳар биримиз имкон борича ҳисса қўшишимиз даркор.
Ғ.Искандаров. И.Кенжабоев, Амударё тумани экология бўлими инспекторлари.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
