ҲУДУДЛАР ИЧКИ ЙЎЛЛАРИНИ ТАЪМИРЛАШ, ИНФРАТУЗИЛМАСИНИ РИВОЖЛАНТИРИШ МАСАЛАСИДА ЙИҒИЛИШ ЎТКАЗИЛДИ

Жорий йилнинг 25 октябрида қабул қилинган “2022-2023 йилларда маҳаллалар инфратузилмасини янада яхшилаш бўйича қўшимча чора-тадбирлар тўғрисида”ги Президент Қарорида мамлакатимиз ҳудудини обод қилиш, қишлоқ ва маҳаллаларда инфратузилма билан боғлиқ энг долзарб масалаларни тизимли ҳал этиш, хусусан, жойларда Ички йўллар, ичимлик сув, электр энергияси ва газ таъминотини, таълим, соғлиқни сақлаш, маданият, спорт ва бошқа инфратузилма объектларини яхшилаш, шу асосда аҳоли учун муносиб турмуш шароитларини яратиш вазифа қилиб қўйилган эди. Ушбу вазифа ижросини таъминлаш мақсадида барча вилоятларда бўлгани каби Қорақалпоғистон Республикасида ҳам ҳудудий ишчи гуруҳлар тузилиб, улар томонидан овул ва маҳаллалардаги аҳолининг турмуш даражасига бевосита таъсир кўрсатувчи энг долзарб масалалар ўрганилиб, 2022-2023 йилларда инфратузилмасини ривожлантириш лозим бўлган маҳаллалар, бажариладиган ишлар кўламини белгилади.

Туманимизнинг Қипчоқ шаҳарчаси, Бештом, Дарёбўйи маҳаллалари ҳудудларида ҳам таъмирлашга муҳтож ички кўчалар ҳисобга  олиниб, таъмирлаш учун сарфланадиган маблағ миқдори аниқланди.

Шу йил 10 ноябрь куни ҳудуддаги 21-сонли Болалар мусиқа ва санъат мактабида шу масалага бағишланган йиғилиш бўлиб ўтди.

Йиғилишда туман ҳокимлигининг саноат, йирик қурилиш, коммуникация, коммунал хўжалиги ва ободонлаштириш масалалари бўйича мажмуаси бошлиғи Нодирбек Камолов ва мутахассислари, Қипчоқ шаҳарча, Бештом, Дарёбўйи маҳаллалари фуқаролар йиғинлари раислари, ҳоким ёрдамчилари ва фаоллари иштирок этдилар.

Йиғилишда ҳоким ўринбосари Нодирбек Камолов Президентнинг юқорида қайд этилган қарорига асосан туманимиз ҳудудидаги мавжуд муаммоларни бартараф этиш ва инфратузилмасини ривожлантириш учун 22 миллиард 209 миллион сўм пул маблағи ажратилаётганлиги, ушбу маблағдан Қипчоқ шаҳарча, Бештом, Дарёбўйи маҳаллалари ҳудудларидаги ички йўлларни таъмирлаш, электр энергияси, ичимлик суви таъминотини яхшилаш ишлари амалга оширилишини кенг турда тушунтирди.

Ажратилаётган жами маблағнинг 12 миллиард 516 миллион сўми туман ҳудудидаги 19 та овул ва маҳаллалардаги жами 504 километр узунликдаги ички йўлларни таъмирлаш, шунинг 46,7 километрига тош-шағал ётқизиш, 1,6 километрига асфальт қопламасини ётқизиш, 2,1 километрига ШПС қопламасини ётқизиш ишларини амалга ошириш белгиланган. Хусусан, Қипчоқ шаҳарчаси ҳудудида электр таъминотини яхшилаш мақсадида ҳудуддаги 63 та хонадонни сифатли электр энергияси билан таъминлаш учун қиймати 100 миллион сўмлик 2 километр узунликда кабеллар янгидан тортилади ва 57 та таянч устунлар янгидан ўрнатилади.

Йиғилишда аҳолига булар ҳақда батафсил маълумотлар берилди.

Иштирокчилар давлатимиз раҳбарининг халқимиз турмуши сифатини ошириш. муносиб ҳаёт кечиришлари йўлидаги саъй-ҳаракатларини қувонч билан эътироф этдилар.

Юртимизда инсон шаъни, қадри улуғланиб, унинг ўз ҳаётидан рози бўлиб яшашига эришиш йўлида изчил амалга оширилаётган чора-тадбирлар аҳамиятини, моҳиятини ҳар бир фуқаро ўз ҳаётида ҳис қилаётгани мазкур йиғилишда ҳам яққол намоён бўлди.

Ойгул РАЖАБОВА.