“ЁНҒИН ХАВФСИЗЛИГИ ОЙЛИГИ” ДОИРАСИДАГИ ТАДБИРЛАР САМАРАЛИ АМАЛГА ОШИРИЛМОҚДА

Иситиш мосламалари кўп ишлатиладиган қиш мавсумида ёнғин хавфсизлиги қоидаларига риоя этилмаслиги оқибатида ёнғинлар билан боғлиқ бахтсиз ҳодисаларнинг рўй бериши сезиларли равишда ортади. Шу сабабдан Фавқулодда вазиятларнинг олдини олиш ва уларни бартараф этиш бўйича Ҳукумат комиссиясининг жорий йил 10 ноябрдаги, Қорақалпоғистон Республикаси Вазирлар Кенгашининг ҳамда Амударё тумани ҳокимининг тегишли баёнлари ижросини таъминлаш мақсадида жорий йилнинг 15 ноябрдан 15 декабригача “Ёнғин хавфсизлиги ойлиги” ўтказилиши белгиланиб, тадбирлар бошлаб юборилди.

Шу кунларда юртимизда иқтисодиёт тармоқлари ва ижтимоий соҳа объектлари, шу билан бирга уй-жой фондини ёнғин хавфсизлиги талабларига мувофиқ ҳолга келтириш ҳамда ўта муҳим давлат аҳамиятига молик, ёнғин хавфи юқори бўлган объектларда ёнғин хавфсизлиги бўйича комплекс чора-тадбирларни амалга ошириш мақсадида ўтказилаётган мазкур ойлик ёнғинлар билан боғлиқ кўнгилсиз ҳодисаларнинг олдини олишга қаратилган кенг қамровли чора-тадбирларни ўз ичига олган. Ушбу ойлик доирасида тумандаги барча корхона, муассаса ва ташкилотлар, шунингдек, аҳоли турар жойларида ёнғин хавфсизлигини таъминлаш ишлари олиб борилмоқда.

Тадбирлар давомида ёнғин хавфсизлиги қодалари бузилиш ҳолатларини аниқлаш ва дарҳол бартараф этиш мақсадида ишчи гуруҳлар фаолияти йўлга қўйилган. Ишчи гуруҳларга туман Фавқулодда вазиятлар бўлими, Ички ишлар бўлими, газ таъминоти, электр тармоқлари ва бошқа мутасадди ташкилотлар ходимлари жалб этилган.

Ойлик доирасида аҳоли турар жойларида ёнғин хавфсизлигини таъминлаш мақсадида ўтказилган рейд тадбирлари давомида қўлбола электр сақлагичлардан фойдаланиш, эвакуация йўлларини тўсиб қўйиш, енгил алангаланувчи ва ёнувчи суюқликларни сақлаш қоидаларини бузиш, носоз дудбўронлардан фойдаланиш, газ таъминотига резина шланглар орқали уланиш, вентиляция тизимларини тўсиб қўйиш, қўлбола иситиш печларидан фойдаланиш каби камчиликлар аниқланиб, тегишли идоралар билан ҳамкорликда бартараф этилмоқда. Ундан ташқари, фуқароларга ёнғин хавфсизлиги қоидалари кўрсатилган эслатмалар тарқатилмоқда.

Ундан ташқари, туманимизда ёнғин ёки оғир оқибатли фавқулодда ҳолатлар содир бўлишининг олдини олиш мақсадида янги объектларни қуришда меъёрий қоидалар ва шаҳарсозлик нормаларига амал қилиш бўйича ҳам назорат ва тарғибот тадбирлари ўтказилиб, керакли йўриқномалар берилиб борилмоқда.

“Ёнғин хавфсизлиги ойлиги” доирасида туман Фавқулодда вазиятлар бўлими томонидан Навоий номли маҳалла ҳудудида янгидан кўп қаватли хонадон қураётган қурувчи ташкилот масъуллари ва қурувчи-ишчилари билан тушунтириш-тарғибот ишлари ўтказилди. Шунингдек, туман Тиббиёт бирлашмаси ҳудудида “PAYTAXT MEGA PROEKT” томонидан ишланган лойиҳа асосида янгидан туғруқхона биносини қураётган ташкилот “Темир бетон” масъулияти чекланган жамияти томонидан амалга оширилаётган қурилиш ишлари назорат ва текширувдан ўтказилиб, хавфсизлик қоидалари ҳақида тушунчалар берилди.

Майдони 1 минг 217 метр квадратга тенг, 4 қаватли 90 ўринли мазкур туғруқхона биноси лойиҳасида фавқулодда вазиятларнинг олдини олиш ва ёнғин хавфсизлигини таъминлаш мақсадидаги 50 метр куб ҳажмга эга 2 та сув ҳовузи, 3 та зинапоя, 1 та лифт, ёнғиндан ва тутундан огоҳлантирувчи ташвишгоҳлар ўрнатилиш кераклиги алоҳида кўрсатилган. Текширишлар давомида замонавий кўринишдаги янги туғруқхона биносидаги қурилиш ишларида лойиҳада кўрсатилган хавфсизлик чораларини эътиборга олган ҳолда олиб борилаётгани маълум бўлди.

Ойлик доирасида амалга оширилаётган бу каби чора-тадбирлар ўз самарасини кўрсатиб, ёнғин содир бўлиш ҳолатлари сезиларли равишда камайишига эришишда муҳим аҳамият касб этмоқда.

С.Бердекеев, туман ФВБ бошлиғи.

Б.Аллабергенов, туман ФВБ НТБ бошлиғи.

Б.Тажибаев, туман ФВБ бўлинмаси бошлиғи.