“YoNGʻIN XAVFSIZLIGI OYLIGI” DOIRASIDAGI TADBIRLAR SAMARALI AMALGA OShIRILMOQDA

Isitish moslamalari koʻp ishlatiladigan qish mavsumida yongʻin xavfsizligi qoidalariga rioya etilmasligi oqibatida yongʻinlar bilan bogʻliq baxtsiz hodisalarning roʻy berishi sezilarli ravishda ortadi. Shu sababdan Favqulodda vaziyatlarning oldini olish va ularni bartaraf etish boʻyicha Hukumat komissiyasining joriy yil 10-noyabrdagi, Qoraqalpogʻiston Respublikasi Vazirlar Kengashining hamda Amudaryo tumani hokimining tegishli bayonlari ijrosini taʼminlash maqsadida joriy yilning 15-noyabrdan 15-dekabrigacha “Yongʻin xavfsizligi oyligi” oʻtkazilishi belgilanib, tadbirlar boshlab yuborildi.

Shu kunlarda yurtimizda iqtisodiyot tarmoqlari va ijtimoiy soha obʼektlari, shu bilan birga uy-joy fondini yongʻin xavfsizligi talablariga muvofiq holga keltirish hamda oʻta muhim davlat ahamiyatiga molik, yongʻin xavfi yuqori boʻlgan obʼektlarda yongʻin xavfsizligi boʻyicha kompleks chora-tadbirlarni amalga oshirish maqsadida oʻtkazilayotgan mazkur oylik yongʻinlar bilan bogʻliq koʻngilsiz hodisalarning oldini olishga qaratilgan keng qamrovli chora-tadbirlarni oʻz ichiga olgan. Ushbu oylik doirasida tumandagi barcha korxona, muassasa va tashkilotlar, shuningdek, aholi turar joylarida yongʻin xavfsizligini taʼminlash ishlari olib borilmoqda.

Tadbirlar davomida yongʻin xavfsizligi qodalari buzilish holatlarini aniqlash va darhol bartaraf etish maqsadida ishchi guruhlar faoliyati yoʻlga qoʻyilgan. Ishchi guruhlarga tuman Favqulodda vaziyatlar boʻlimi, Ichki ishlar boʻlimi, gaz taʼminoti, elektr tarmoqlari va boshqa mutasaddi tashkilotlar xodimlari jalb etilgan.

Oylik doirasida aholi turar joylarida yongʻin xavfsizligini taʼminlash maqsadida oʻtkazilgan reyd tadbirlari davomida qoʻlbola elektr saqlagichlardan foydalanish, evakuatsiya yoʻllarini toʻsib qoʻyish, yengil alangalanuvchi va yonuvchi suyuqliklarni saqlash qoidalarini buzish, nosoz dudboʻronlardan foydalanish, gaz taʼminotiga rezina shlanglar orqali ulanish, ventilyatsiya tizimlarini toʻsib qoʻyish, qoʻlbola isitish pechlaridan foydalanish kabi kamchiliklar aniqlanib, tegishli idoralar bilan hamkorlikda bartaraf etilmoqda. Undan tashqari, fuqarolarga yongʻin xavfsizligi qoidalari koʻrsatilgan eslatmalar tarqatilmoqda.

Undan tashqari, tumanimizda yongʻin yoki ogʻir oqibatli favqulodda holatlar sodir boʻlishining oldini olish maqsadida yangi obʼektlarni qurishda meʼyoriy qoidalar va shaharsozlik normalariga amal qilish boʻyicha ham nazorat va targʻibot tadbirlari oʻtkazilib, kerakli yoʻriqnomalar berilib borilmoqda.

“Yongʻin xavfsizligi oyligi” doirasida tuman Favqulodda vaziyatlar boʻlimi tomonidan Navoiy nomli mahalla hududida yangidan koʻp qavatli xonadon qurayotgan quruvchi tashkilot masʼullari va quruvchi-ishchilari bilan tushuntirish-targʻibot ishlari oʻtkazildi. Shuningdek, tuman Tibbiyot birlashmasi hududida “PAYTAXT MEGA PROEKT” tomonidan ishlangan loyiha asosida yangidan tugʻruqxona binosini qurayotgan tashkilot “Temir beton” masʼuliyati cheklangan jamiyati tomonidan amalga oshirilayotgan qurilish ishlari nazorat va tekshiruvdan oʻtkazilib, xavfsizlik qoidalari haqida tushunchalar berildi.

Maydoni 1 ming 217 metr kvadratga teng, 4 qavatli 90-oʻrinli mazkur tugʻruqxona binosi loyihasida favqulodda vaziyatlarning oldini olish va yongʻin xavfsizligini taʼminlash maqsadidagi 50 metr kub hajmga ega 2 ta suv hovuzi, 3 ta zinapoya, 1 ta lift, yongʻindan va tutundan ogohlantiruvchi tashvishgohlar oʻrnatilish kerakligi alohida koʻrsatilgan. Tekshirishlar davomida zamonaviy koʻrinishdagi yangi tugʻruqxona binosidagi qurilish ishlarida loyihada koʻrsatilgan xavfsizlik choralarini eʼtiborga olgan holda olib borilayotgani maʼlum boʻldi.

Oylik doirasida amalga oshirilayotgan bu kabi chora-tadbirlar oʻz samarasini koʻrsatib, yongʻin sodir boʻlish holatlari sezilarli ravishda kamayishiga erishishda muhim ahamiyat kasb etmoqda.

S.Berdekeyev, tuman FVB boshligʻi.

B.Allabergenov, tuman FVB NTB boshligʻi.

B.Tajibayev, tuman FVB boʻlinmasi boshligʻi.