Туман Ички ишлар бўлими ходимлари “Яшил макон” умуммиллий лойиҳасида фаол иштирок этишмоқда

Бугун юртимизда кенг тус олган “Яшил макон” умуммиллий ҳаракатининг маъно-мазмуни, мақсади юртимизда яшилликни кенгайтириш баробарида табиатни асраш, экология мусаффолигини сақлашга қаратилгани билан ниҳоятда аҳамиятлидир.

Жорий йилнинг 11 октябрь куни давлатимиз раҳбари раислигида “Яшил макон” умуммиллий лойиҳасини амалга оширишга бағишланган видеоселектор йиғилиши бўлиб ўтган эди. Унда 20 октябрдан 1 декабрга қадар дарахт экиш бўйича “долзарб 40 кунлик” эълон қилинди. Ушбу лойиҳа доирасида йилига 200 миллион туп дарахт ва бута кўчатларини экиш орқали шаҳарлардаги яшил майдонларни амалдаги 8 фоиздан 30 фоизга ошириш режа қилинган.

Давлатимиз раҳбарининг бевосита ташаббуси билан ҳаётга татбиқ этилаётган ушбу хайрли тадбирларда барча юртдошларимиз фаол иштирок этишмоқда. Амударё тумани Ички ишлар бўлими ҳам бу жараёнда соҳа вакилларининг муносиб ҳиссасини таъминлаш мақсадида “Яшил макон” умуммиллий лойиҳаси доирасида кўчат экиш тадбирини ўтказиш ташаббуси билан чиқди.

Ушбу тадбирда Ички ишлар органларининг раҳбар ходимлари, шахсий таркиби, йўл-патрул хизмати ходимлари фаол иштирок этишди. Туман Ички ишлар бўлими биноси атрофидаги майдонга турли мевали ва манзарали дарахт кўчатлари экилиб, атроф ободонлаштирилди.

Халқимизда боғ яратиш, экилган ниҳолларни парваришлаб, атроф-муҳитни озода сақлаш ота-боболаримиздан қолган азалий қадриятдир. Бугунги кунда мана шундай эзгу анъана давом этаётганига барчамиз гувоҳ бўлиб, унинг бевосита иштирокчисига айланмоқдамиз.

Бутун мамлакатимизда бўлгани сингари Амударё туманида ҳам уюшқоқлик билан давом этаётган “Яшил макон” умуммиллий лойиҳаси доирасида нафақат экилаётган кўчатлар сони, балки уларнинг тури ва сифатига ҳам алоҳида эътибор берилмоқда.

Хусусан, дарахт ва ўсимликлар гуллаганида аллергияга мойил айрим кишиларнинг азият чекмаслигини учун шамол орқали чанглануви ўсимликлар деярли экилмай, туманнинг инфратузилмаси, иқлими ва тупроқ шароити, шаҳарсозлик меъёрларига ва автомобиль қатнови кўчалари учун мос келадиган кўчатлар экилмоқда.

Кейинги пайтларда Ўзбекистонда кузатилган чанг бўронлари ва ноодатий об-ҳаво иқлим ўзгаришининг нишоналаридир. Бу эса дарахт экиш ва яшил ҳудудлар майдонини кўпайтиришнинг нақадар долзарблигини, бу хайрли ишга катта масъулият ва алоҳида эътибор билан ёндашиш зарурлигини кўрсатмоқда.

Айтиш керакки, яшил ўрмонлар, дарахтзорлар ташкил этилиши Оролнинг қуриши оқибатида минтақамизда юзага келган оғир экологик муаммоларни юмшатишда, атроф-муҳит мусаффолигини сақлашда ҳам муҳим ўрин тутади.

Дарҳақиқат, табиатда яшил ҳудудлар кенгайса, яшил қалқонлар шакллантирилса, бундан фақат фойда кўрамиз, роҳатланамиз, башарият келажаги мустаҳкамланади. Демакки, юртимизда кенг қулоч ёйган “Яшил макон” умуммиллий лойиҳаси нафақат бугунимизга, балки, яқин ва узоқ келажагимизга дахлдор ҳаётий ҳаракатдир.

Шундай экан, барча юртдошларимизни дарахт экиш бўйича “долзарб 40 кунлик” тадбирларида фаол иштирок этиб, яшил майдонлар кўламини кенгайтириш ишларига ўз ҳиссаларини қўшишга чақириб қоламиз.

Туман ҳокимлигининг Ахборот хизмати.