Tuman Ichki ishlar boʻlimi xodimlari “Yashil makon” umummilliy loyihasida faol ishtirok etishmoqda

Bugun yurtimizda keng tus olgan “Yashil makon” umummilliy harakatining maʼno-mazmuni, maqsadi yurtimizda yashillikni kengaytirish barobarida tabiatni asrash, ekologiya musaffoligini saqlashga qaratilgani bilan nihoyatda ahamiyatlidir.

Joriy yilning 11-oktyabr kuni davlatimiz rahbari raisligida “Yashil makon” umummilliy loyihasini amalga oshirishga bagʻishlangan videoselektor yigʻilishi boʻlib oʻtgan edi. Unda 20-oktyabrdan 1-dekabrga qadar daraxt ekish boʻyicha “dolzarb 40 kunlik” eʼlon qilindi. Ushbu loyiha doirasida yiliga 200 million tup daraxt va buta koʻchatlarini ekish orqali shaharlardagi yashil maydonlarni amaldagi 8 foizdan 30 foizga oshirish reja qilingan.

Davlatimiz rahbarining bevosita tashabbusi bilan hayotga tatbiq etilayotgan ushbu xayrli tadbirlarda barcha yurtdoshlarimiz faol ishtirok etishmoqda. Amudaryo tumani Ichki ishlar boʻlimi ham bu jarayonda soha vakillarining munosib hissasini taʼminlash maqsadida “Yashil makon” umummilliy loyihasi doirasida koʻchat ekish tadbirini oʻtkazish tashabbusi bilan chiqdi.

Ushbu tadbirda Ichki ishlar organlarining rahbar xodimlari, shaxsiy tarkibi, yoʻl-patrul xizmati xodimlari faol ishtirok etishdi. Tuman Ichki ishlar boʻlimi binosi atrofidagi maydonga turli mevali va manzarali daraxt koʻchatlari ekilib, atrof obodonlashtirildi.

Xalqimizda bogʻ yaratish, ekilgan nihollarni parvarishlab, atrof-muhitni ozoda saqlash ota-bobolarimizdan qolgan azaliy qadriyatdir. Bugungi kunda mana shunday ezgu anʼana davom etayotganiga barchamiz guvoh boʻlib, uning bevosita ishtirokchisiga aylanmoqdamiz.

Butun mamlakatimizda boʻlgani singari Amudaryo tumanida ham uyushqoqlik bilan davom etayotgan “Yashil makon” umummilliy loyihasi doirasida nafaqat ekilayotgan koʻchatlar soni, balki ularning turi va sifatiga ham alohida eʼtibor berilmoqda.

Xususan, daraxt va oʻsimliklar gullaganida allergiyaga moyil ayrim kishilarning aziyat chekmasligini uchun shamol orqali changlanuvi oʻsimliklar deyarli ekilmay, tumanning infratuzilmasi, iqlimi va tuproq sharoiti, shaharsozlik meʼyorlariga va avtomobil qatnovi koʻchalari uchun mos keladigan koʻchatlar ekilmoqda.

Keyingi paytlarda Oʻzbekistonda kuzatilgan chang boʻronlari va noodatiy ob-havo iqlim oʻzgarishining nishonalaridir. Bu esa daraxt ekish va yashil hududlar maydonini koʻpaytirishning naqadar dolzarbligini, bu xayrli ishga katta masʼuliyat va alohida eʼtibor bilan yondashish zarurligini koʻrsatmoqda.

Aytish kerakki, yashil oʻrmonlar, daraxtzorlar tashkil etilishi Orolning qurishi oqibatida mintaqamizda yuzaga kelgan ogʻir ekologik muammolarni yumshatishda, atrof-muhit musaffoligini saqlashda ham muhim oʻrin tutadi.

Darhaqiqat, tabiatda yashil hududlar kengaysa, yashil qalqonlar shakllantirilsa, bundan faqat foyda koʻramiz, rohatlanamiz, bashariyat kelajagi mustahkamlanadi. Demakki, yurtimizda keng quloch yoygan “Yashil makon” umummilliy loyihasi nafaqat bugunimizga, balki, yaqin va uzoq kelajagimizga daxldor hayotiy harakatdir.

Shunday ekan, barcha yurtdoshlarimizni daraxt ekish boʻyicha “dolzarb 40 kunlik” tadbirlarida faol ishtirok etib, yashil maydonlar koʻlamini kengaytirish ishlariga oʻz hissalarini qoʻshishga chaqirib qolamiz.

Tuman hokimligining Axborot xizmati.