ҚУТУРИШ КАСАЛЛИГИНИНГ ОЛДИНИ ОЛИШ ЧОРАЛАРИ ТАРҒИБ ЭТИЛДИ

Қутуриш – ўткир юқумли касаллик бўлиб, марказий асаб тизимининг зарарланиши билан таърифланади. Ушбу хавфли касалликдан сақланиш борасида аҳоли орасида туман Санитария эпидемиологик осойишталик ва жамоат саломатлиги бўлими томонидан кенг тарғибот ишлари олиб борилмоқда. Кўчаларда болаларнинг дайди, эгасиз итлар билан ўйнашига йўл қўймаслик хусусида огоҳлантирилмоқда. Чунки эгасиз итларнинг қутурган ё қутурмаганлигини аниқлашнинг имкони йўқ.

12 декабрь куни туман Санитария-эпидемиологик осойишталик ва жамоат саломатлиги маркази эпидемиолог шифокори Дурбек Бобожонов шу ҳақда тушунтириш-тарғибот ишларини олиб бориш мақсадида 40-мактаб ўқитувчилари, ўқувчилари ҳузурида бўлди. Иштирокчиларга қутуриш касаллигининг олдини олиш, бунга сабаб бўлувчи ёввойи ҳайвонларнинг жароҳат етказишидан эҳтиёт бўлиш лозимлиги хусусида батафсил гапириб берди.

Мазкур касаллик инфекцияси манбаи қутурган уй ва ёввойи ҳайвонлардир. Итнинг сўлагида вирус қутуриш белгилари маълум бўлишидан 7-10 кун илгари пайдо бўла бошлайди. Итдан қутуриш касаллиги юқиши учун итнинг одамни тишлаши шарт эмас, унинг сўлаги одам терисидаги шилинган ёки тирналган жойига тушса ҳам касаллик юқади.

Яраланган одам терисига тушган ит сўлагидаги вирус асаб толалари бўйлаб, бош ва орқа мияга етиб боради ва уларда кўпайиб, чуқур ўзгаришлар юз беришига сабаб бўлади.

Касалликнинг инкубацион, яъни яширин даври 1-2 ой давом этади, баъзан 2 ҳафтагача қисқариши ёки 1 йилгача узайиши мумкин. Шунинг учун ҳам ит тишлашидан сақланиш, эҳтиёткорлик жуда муҳим.

Шунингдек, шу куни Беруний маҳалла фуқаролар йиғинида ҳам оқибати ўлим билан тугайдиган қутуриш касаллиги, унинг профилактикаси хусусида маъруза қилди. Янгиобод маҳалласи хонадонларида ҳам бу ҳақда фуқароларга кенг тушунчалар берди. Бу бежиз эмас. Чунки туманимизда ит тишлаши каби нохуш воқеалар тез-тез содир бўлиб турибди.

Бўлимга жорий йилнинг ўтган 11 ойи давомида 119 нафар фуқаролар ёввойи ҳайвонлар тишлаши оқибатида мурожаат қилганлар. Шуларнинг кўпчилиги эгасиз итлар бўлиб чиқмоқда. Агар жароҳат етказган ит эгаси маълум бўлса ит дарров назоратга олинади.

Ёввойи ҳайвонлар тишлаб, бўлимга мурожаат қилган фуқароларнинг барчаси тўлиқ даволанди ва қутуриш касаллигидан ҳимоя қилинди. Жароҳат етказган итларда эпидемиологик текширишлар ўтказилиб, зарур чора-тадбирлар амалга оширилди.

Шуни алоҳида таъкидлаш жоизки, фуқароларнинг ёввойи ҳайвонлардан жабрланишдан сақланиши жуда муҳим. Агар шундай кўнгилсиз ҳолат содир бўлса, шу заҳотиёқ тиббиёт муассасасига мурожаат қилиши лозим.

Инсон ҳаёти азиз. Арзимаган бахтсиз тасодифларга, хусусан, ёввойи ҳайвонлар тишлаши натижасида етказилган жароҳатларга эътиборсиз қарамаслик лозим.

Қутуришнинг давоси йўқ. Профилактикаси – дайди ит ва ҳайвонлардан эҳтиёт бўлиш-дир. Ит тишлаган одамларни ўз вақтида эҳтиётдан эмлаш орқалигина ҳаётини сақлаб қолиш мумкин.

Ойгул РАЖАБОВА.