БЕШТОМ МАҲАЛЛАСИДА ЁНҒИНГА ҚАРШИ СУВ ОЛГИЧЛАРНИНГ ТЕХНИК ҲОЛАТИ ЎРГАНИЛДИ

Ёнғинга қарши сув олгич, яъни гидрантлар ёнғин содир бўлганда махсус автомашиналарни сув билан таъминлаш ва ёнғинларни тезда бартараф этишда муҳим ўрин тутади. Шу сабабли жойлардаги ёнғинга қарши сув олгич гидрантларнинг техник ҳолати мунтазам равишда ўрганилиб, текширилиб борилади.

14 декабрь куни навбатдаги ўрганиш жараёнлари Амударё туманининг Бештом маҳалласида ўтказилди ва ҳудудда жойлашган 16 дона ёнғинга қарши сув олгичларнинг техник ҳолати текширилди. Назорат ишлари давомида ҳудуддаги “Амударё газ сервис” ҳамда “Амударё метан савдо” масъулияти чекланган жамияти яқинида жойлашган ёнғинга қарши сув олгичларнинг штоклари қотиб қолганлиги аниқланди ва бу носозликлар Сув тармоқлари корхонаси ходими Рустам Ўрозбоев томонидан жойида бартараф қилиниб, соз ҳолатга келтирилди.

Айтиш жоизки, Амударё тумани ҳудудида жами 290 та ёнғинга қарши сув олгич гидрантлари мавжуд бўлиб, туман Фавқулодда вазиятлар бўлимининг йиллик режасига асосан йилига камида 2 маротаба уларнинг техник ҳолати ўрганилади. Жорий йилнинг иккинчи ярмида ҳам ушбу ёнғинга қарши сув олгичларнинг техник ҳолатини амалда ўрганиш бўйича Фавқулодда вазиятлар бўлимининг 3- ва 4-сонли Касбийлаштирилган ёнғин-қутқарув қисмлари ва Сув тармоқлари корхонаси билан ҳамкорликда йўл харитаси ишлаб чиқилди. Ушбу йўл харитага асосан Касбийлаштирилган ёнғин-қутқарув қисмлари шахсий таркиби ва Сув тармоқлари корхонаси ходимлари иштирокида ёнғинга қарши сув олгичларнинг техник ҳолати мунтазам равишда ўрганилиб борилмоқда.

Дарҳақиқат, туманимизнинг барча ҳудудларидаги ёнғинга қарши ер ости сув олгичлари техник соз ҳолатда бўлиши муҳим аҳамиятга эга. Бу орқали фавқулодда содир бўладиган ёнғинлар кам талафотлар билан қисқа муддатда бартараф этилади, унинг кенг майдонларга тарқалиб кетишининг олди олинади. Шунингдек, сув танқислиги ва узоқ масофадан сув ташиб келинишига, ортиқча ёнғин ўчириш автомобилларининг жалб этилишига чек қўйилади. Шу сабабли туман Фавқулодда вазиятлар бўлимининг Касбийлаштирилган ёнғин-қутқарув қисмлари ходимлари томонидан бу борадаги ишлар изчил давом эттирилмоқда ва маҳаллалар, кўчалардаги кўмилиб қолган ёнғинга қарши ерости сув олгичлари қайта очилиб, ишчи ҳолатга келтирилмоқда.

Бештом маҳалласи ҳудудида ўтказилган ўрганиш ишлари давомида аниқланган носозликлар жойида бартараф қилиниб, ёнғинга қарши гидрантларнинг узлуксиз сув билан таъминланиши йўлга қўйилди. Ундан ташқари, ҳудудда жойлашган идора, корхона-ташкилотлар раҳбарларига ҳамда аҳолига объектда, кўча бўйларида жойлашган ёнғинга қарши сув олгичларнинг атрофлари мунтазам равишда тозаланиб туриши, ёнғин ўчириш автомобиллари эркин ҳаракатланиши учун гидрантлар атрофига тўсиқлар қўйилмаслиги кераклиги тушунтирилди. Шу билан бир қаторда гидрантлар ўрнатилган жойни кўмиб ташламаслик, кўрсатувчи белгиларга зарар етказмаслик кабиларни ҳудуддаги ҳар бир фуқарога тушунтириш лозимлиги ҳам айтиб ўтилди.

М.Юсупов, туман ФВБ 3-Касбийлаштирилган ёнғин-қутқарув қисми бошлиғи.

Р.Казаков, туман ФВБ 4-Касбийлаштирилган ёнғин-қутқарув қисми бошлиғи.