BEShTOM MAHALLASIDA YoNGʻINGA QARShI SUV OLGIChLARNING TEXNIK HOLATI OʻRGANILDI
Yongʻinga qarshi suv olgich, yaʼni gidrantlar yongʻin sodir boʻlganda maxsus avtomashinalarni suv bilan taʼminlash va yongʻinlarni tezda bartaraf etishda muhim oʻrin tutadi. Shu sababli joylardagi yongʻinga qarshi suv olgich gidrantlarning texnik holati muntazam ravishda oʻrganilib, tekshirilib boriladi.
14-dekabr kuni navbatdagi oʻrganish jarayonlari Amudaryo tumanining Beshtom mahallasida oʻtkazildi va hududda joylashgan 16 dona yongʻinga qarshi suv olgichlarning texnik holati tekshirildi. Nazorat ishlari davomida hududdagi “Amudaryo gaz servis” hamda “Amudaryo metan savdo” masʼuliyati cheklangan jamiyati yaqinida joylashgan yongʻinga qarshi suv olgichlarning shtoklari qotib qolganligi aniqlandi va bu nosozliklar Suv tarmoqlari korxonasi xodimi Rustam Oʻrozboyev tomonidan joyida bartaraf qilinib, soz holatga keltirildi.
Aytish joizki, Amudaryo tumani hududida jami 290 ta yongʻinga qarshi suv olgich gidrantlari mavjud boʻlib, tuman Favqulodda vaziyatlar boʻlimining yillik rejasiga asosan yiliga kamida 2 marotaba ularning texnik holati oʻrganiladi. Joriy yilning ikkinchi yarmida ham ushbu yongʻinga qarshi suv olgichlarning texnik holatini amalda oʻrganish boʻyicha Favqulodda vaziyatlar boʻlimining 3- va 4-sonli Kasbiylashtirilgan yongʻin-qutqaruv qismlari va Suv tarmoqlari korxonasi bilan hamkorlikda yoʻl xaritasi ishlab chiqildi. Ushbu yoʻl xaritaga asosan Kasbiylashtirilgan yongʻin-qutqaruv qismlari shaxsiy tarkibi va Suv tarmoqlari korxonasi xodimlari ishtirokida yongʻinga qarshi suv olgichlarning texnik holati muntazam ravishda oʻrganilib borilmoqda.
Darhaqiqat, tumanimizning barcha hududlaridagi yongʻinga qarshi yer osti suv olgichlari texnik soz holatda boʻlishi muhim ahamiyatga ega. Bu orqali favqulodda sodir boʻladigan yongʻinlar kam talafotlar bilan qisqa muddatda bartaraf etiladi, uning keng maydonlarga tarqalib ketishining oldi olinadi. Shuningdek, suv tanqisligi va uzoq masofadan suv tashib kelinishiga, ortiqcha yongʻin oʻchirish avtomobillarining jalb etilishiga chek qoʻyiladi. Shu sababli tuman Favqulodda vaziyatlar boʻlimining Kasbiylashtirilgan yongʻin-qutqaruv qismlari xodimlari tomonidan bu boradagi ishlar izchil davom ettirilmoqda va mahallalar, koʻchalardagi koʻmilib qolgan yongʻinga qarshi yerosti suv olgichlari qayta ochilib, ishchi holatga keltirilmoqda.
Beshtom mahallasi hududida oʻtkazilgan oʻrganish ishlari davomida aniqlangan nosozliklar joyida bartaraf qilinib, yongʻinga qarshi gidrantlarning uzluksiz suv bilan taʼminlanishi yoʻlga qoʻyildi. Undan tashqari, hududda joylashgan idora, korxona-tashkilotlar rahbarlariga hamda aholiga obʼektda, koʻcha boʻylarida joylashgan yongʻinga qarshi suv olgichlarning atroflari muntazam ravishda tozalanib turishi, yongʻin oʻchirish avtomobillari erkin harakatlanishi uchun gidrantlar atrofiga toʻsiqlar qoʻyilmasligi kerakligi tushuntirildi. Shu bilan bir qatorda gidrantlar oʻrnatilgan joyni koʻmib tashlamaslik, koʻrsatuvchi belgilarga zarar yetkazmaslik kabilarni hududdagi har bir fuqaroga tushuntirish lozimligi ham aytib oʻtildi.
M.Yusupov, tuman FVB 3-Kasbiylashtirilgan yongʻin-qutqaruv qismi boshligʻi.
R.Kazakov, tuman FVB 4-Kasbiylashtirilgan yongʻin-qutqaruv qismi boshligʻi.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
