ҚЎРИҚЛАШ БЎЛИМИ ТОМОНИДАН 182 ТА ХАЛҚ ХЎЖАЛИГИ ОБЪЕКТЛАРИ, 53 ТА ХОНАДОН ИШОНЧЛИ ҚЎРИҚЛАНМОҚДА

Миллий гвардиянинг Амударё туманидаги Қўриқлаш бўлими ўз фаолиятига доир вазифаларни масъулият ва изчиллик билан амалга ошириб келмоқда. Бўлим ходимлари жисмоний ва юридик шахслар мол-мулки ҳамда объектларини ишончли қўриқлаш билан бирга ҳудудларда жамоат тартибини сақлаш, ҳуқуқбузарликларни профилактика қилиш ва уларга чек қўйиш, қўриқланадиган объектларни назоратдан ўтказиш ва объект ички режимларини таъминлаш кабиларни ҳам сидқидилдан бажаришмоқда.

Амударё тумани Қўриқлаш бўлими томонидан қўриққа олинган объектлар сони янада ортиб, халқ хўжалиги объектлари 182 тага, фуқаро хонадонлари 53 тага етди. Бўлимда ҳарбийлаштирилган соқчилар томонидан қўриқланаётган объектлар сони ўтган йилнинг шу даврига таққосланганда, 1 тадан 3 тага оширилди. Ҳозирги кунда барча объектлар Бўлимдаги техник қўриқлаш маркази томонидан ишончли қўриқланмоқда.

Туман ҳудудидаги 87 та умумтаълим мактабларидан 28 таси, 51 та мактабгача таълим муассасаларидан 18 тасига шартнома асосида хизмат кўрсатилмоқда. Шунингдек, мактабгача таълим муассасаларида майда ташмачиликларнинг олдини олиш мақсадида ташкилот ходимларига ҳуқуқий тушунчалар бериш билан бирга мазкур муассасаларда тактик-амалий ўқув машғулотлари ўтказилиб борилмоқда. Маъмурий ҳуқуқбузарликларнинг олдини олиш мақсадида тумандаги маҳаллалар ва қатор идора-ташкилотларда ҳам мунтазам равишда тарғибот ишларини ўтказиш йўлга қўйилган. Айтиш керакки, қўриқлаш хизматининг самарадорлигини ошириш, қўриқдаги объектлар сонини кўпайтириш ва майда ташмачилик ҳолатларининг олдини олиш, қўриқлаш хизматининг афзалликларини тушунтириш борасида қатор тарғибот-ташвиқот ишлари амалга оширилди.

Ўтган 2022 йил 2 нафар фуқаро содир қилган ҳуқуқбузарлиги учун маъмурий жавобгарликка тортилди. Шунингдек, туман Экология ва атроф-муҳитни муҳофаза қилиш бўлими ходимлари билан ҳамкорликда олиб борилган тадбирлар натижасида ноқонуний равишда ов қилиш ҳолати аниқланган. Бу бўйича ҳам маъмурий баённомалар расмийлаштирилган ва жавобгарларнинг ҳар бирига энг кам иш ҳақининг 5 баравари, яъни 1 млн. 350 минг сўм миқдорида жарима белгиланган.

Хизматга жалб этилган ходимларнинг жанговар шайлигини ошириш ҳамда фавқулодда ҳолатлар содир бўлганда ҳуқуқни муҳофаза қилувчи органлар билан ҳамкорликдаги ҳаракатларни мувофиқлаштириш мақсадида шу пайтга қадар 52 маротаба амалий-тактик ўқув машғулотлар ўтказилди. Ундан ташқари, тумандаги Спорт мактаби билан ҳамкорликда белгиланган режалар асосида ташкил қилинган спортнинг камондан отиш, от спорти, қўл жанги, кураш секциялари фаолият юритиб келмоқда.

Спорт мактабида мазкур спорт турлари бўйича ўқув-амалий машғулотлар ўтказилиб, уларда Бўлим ходимлари билан бир қаторда туман ёшларининг ҳам иштироки таъминланмоқда. Машғулотларда иштирок этган уюшмаган ёшлар сони 514 нафарни, мактаб ўқувчилари сони 846 нафарни ташкил қилади.

Шу ўринда Бўлим ходимлари туман ва Республика миқёсида ўтказилиб келинаётган турли танловларда намунали иштирок этиб, хизмат вазифасини ўташ даврида фидойилик кўрсатиб, барчага ўрнак бўлиб келаётганини ҳам айтиб ўтиш жоиздир. 2022 йил 20-27 октябрь кунлари Бўлим ходими сафдор Фарид Жумабаев Тошкент шаҳрида республика бўйича ўта муҳим ва тоифаланган обьектлар ўртасида ўтказилган кўрик-танловда фаол қатнашиб, фахрли 1-ўринни қўлга киритди ва «Энг яхши қўриқлаш ходими» номинацияси бўйича минтақавий босқич ғолиби деб топилди. 2022 йил 29 апрель куни сафдор Фарид Жумабаев ҳуқуқ-тартибот идоралари ходимлари ўртасида спортнинг триатлон тури бўйича Қорақалпоғистон Республикаси «Динамо» жисмоний тарбия ва спорт қўмитаси биринчилигида иштирок этиб, фахрли 2-ўринни эгаллади. Шунингдек, 2022 йил 23 апрель куни сафдор Жасур Эримбетов тоифаланган объект бўлган Қипчоқ пантон кўпригида хизмат фаолиятини олиб бораётган пайтида жонига қасд қилмоқчи бўлиб, ўзини дарёга ташлаган аёлни хавф-хатарга қарамасдан, сувга тушиб қутқариб қолди.

Қўриқлаш бўлими ходимлари томонидан кеча-ю кундуз туман ҳудудида аҳоли хавфсизлигини таъминлаш, безорилик, ўғирлик, жанжал-тўполон каби кўнгилсиз ҳодисаларнинг олдини олиш кабиларга алоҳида эътибор қаратилмоқда. Ўз хизмат вазифаларини масъулиятни ҳис қилган ҳолда, астойдил бажаришга ҳаракат қилиб, жиноят ва ҳуқуқбузарликлар камайишига, эл-юртда тинчлик-осойишталик барқарор бўлишига муносиб ҳиссаларини қўшишмоқда.

О.Худойберганова.