ЭТ БИЛАН ТИРНОҚ ХАЛҚЛАРМИЗ

Халқимиз ҳаётига гўзаллик, файз бағишловчи анъаналар кўп. Миллий-тарихий мезонларимизни ўзида мужассам этган бундай анъаналар кўп миллатли мамлакатимиз халқлари учун интеллектуал мулк сифатида жуда қадрли. 2017 йилдан бери янгидан ҳаётимизга кириб келган яна бир анъана – бу ҳар йилнинг якунида  Президентимизнинг Олий Мажлисга, халқимизга Мурожаатномасидир. Мамлакатимиз ҳаётидаги энг муҳим сиёсий воқеа бўлган Мурожаатномада тарихга айланаётган йилдаги асосий кўрсаткичлар, янги йилга мўлжалланган мақсад ва вазифалар ўз аксини топгани учун бу муҳим тадбирни ҳар биримиз ҳаяжон билан кутамиз.

Бу йилги Мурожаатномада Президентимиз якунига етаётган 2022 йил ғоят мураккаб ва синовли йил бўлганини таъкидларкан, барча соҳаларда эришилган ютуқ ва камчиликларни бирма-бир тилга олиб ўтдилар. Айниқса, глобаллашув жараёнида халқаро муносабатларнинг чигаллашиб, ўзаро ишонч камайиб, қарама-қаршилик ва можароларнинг ортиб бораётгани “барқарорлик ва ривожланишга жиддий хавф солмоқда”, - деди Президентимиз.

Шунингдек, мафкуравий хуружлар оқибатида Қорақалпоғистонда шу йил ёз ойида содир бўлган нохуш воқеалар бутун эл-юртимиз учун қаттиқ қайғу, ташвиш олиб келганига алоҳида тўхталди.

“Қорақалпоғистоннинг ютуғи – бутун Ўзбекистоннинг ютуғи, Қорақалпоғистоннинг ташвиши – бутун Ўзбекистоннинг ташвиши”, - деган ғоя доимий ҳаракат дастури бўлиб қолишини алоҳида қайд этдилар.

Ҳақиқатан ҳам минг йиллар давомида  эт билан тирноқ каби ажралмас қон-қариндош халқлар – ўзбек билан қорақалпоқни бирини-биридан ажратаман, деганлар янглишадилар. Чунки Ўзбекистоннинг қайси тумани ёки вилоятига борманг, ҳар ўзбекнинг бир қорақалпоқ қондоши, ҳар битта қорақалпоқнинг бир ўзбек қариндоши ва қурдоши бор. Бирининг отаси ёки онаси, яна бирларининг энаси ва момоси қорақалпоқ, ё ўзбек бўлган бу бағрикенг, ўзаро аҳил-иноқ, тотув икки миллатга бугун можаро эмас, тинчлик, хотиржамлик, фаровон ҳаёт керак. Президентимиз айтганларидай: “бу икки халқнинг эзгу мақсади – биргаликда меҳнат қилиб, Янги Ўзбекистонда ҳар томонлама ривожланган, обод ва фаровон Янги Қорақалпоғистонни бунёд этишдир”.

Мен Президентимизнинг Қорақалпоғистоннинг бугуни, келажаги ва эт билан тирноқ каби ажралмас миллатлар дўстлиги ҳақидаги сўзларини ҳаяжон билан тингларканман, кўз ўнгимда кун сайин ўзгариб, янгиланиб бораётган Қорақалпоғистоннинг энг олис туман ва қишлоқлари, бу ўзгаришлардан, ўз  ҳаётларига кириб келаётган янгиланишлар, фаровонликдан рози қорақалпоқ дўстларим, уларнинг тўкин-сочин ҳаёти гавдаланди. Ана шу тўкисликда фарзандлари, неваралари билан тонгларни хотиржам, осуда қаршилаётган халқ учун тинчлик неъматидан бошқа яна нима керак? Ҳеч нарса! Чунки, тинчлик ҳоким бўлган жойда тараққиёт бор, янгиланиш бор. Тараққиёт эса ҳар қандай халқни маънан юксалтиради. Маънавияти юксак халқни эса ҳеч қандай куч енга олмайди. Бугунги Қорақалпоғистон халқи – биз ана шундай маънавий юксаклик сари қадам қўяётган, Янги Қорақалпоғистонни бунёд этишга қодир кучли халқмиз. Кўпмиллатли Янги Ўзбекистоннинг энг теран, метин ва мустаҳкам илдизимиз.

Робия ЙЎЛДОШЕВА, Қорақалпоғистонда хизмат кўрсатган журналист.