ET BILAN TIRNOQ XALQLARMIZ

Xalqimiz hayotiga goʻzallik, fayz bagʻishlovchi anʼanalar koʻp. Milliy-tarixiy mezonlarimizni oʻzida mujassam etgan bunday anʼanalar koʻp millatli mamlakatimiz xalqlari uchun intellektual mulk sifatida juda qadrli. 2017-yildan beri yangidan hayotimizga kirib kelgan yana bir anʼana – bu har yilning yakunida  Prezidentimizning Oliy Majlisga, xalqimizga Murojaatnomasidir. Mamlakatimiz hayotidagi eng muhim siyosiy voqea boʻlgan Murojaatnomada tarixga aylanayotgan yildagi asosiy koʻrsatkichlar, yangi yilga moʻljallangan maqsad va vazifalar oʻz aksini topgani uchun bu muhim tadbirni har birimiz hayajon bilan kutamiz.

Bu yilgi Murojaatnomada Prezidentimiz yakuniga yetayotgan 2022-yil gʻoyat murakkab va sinovli yil boʻlganini taʼkidlarkan, barcha sohalarda erishilgan yutuq va kamchiliklarni birma-bir tilga olib oʻtdilar. Ayniqsa, globallashuv jarayonida xalqaro munosabatlarning chigallashib, oʻzaro ishonch kamayib, qarama-qarshilik va mojarolarning ortib borayotgani “barqarorlik va rivojlanishga jiddiy xavf solmoqda”, - dedi Prezidentimiz.

Shuningdek, mafkuraviy xurujlar oqibatida Qoraqalpogʻistonda shu yil yoz oyida sodir boʻlgan noxush voqealar butun el-yurtimiz uchun qattiq qaygʻu, tashvish olib kelganiga alohida toʻxtaldi.

“Qoraqalpogʻistonning yutugʻi – butun Oʻzbekistonning yutugʻi, Qoraqalpogʻistonning tashvishi – butun Oʻzbekistonning tashvishi”, - degan gʻoya doimiy harakat dasturi boʻlib qolishini alohida qayd etdilar.

Haqiqatan ham ming yillar davomida  et bilan tirnoq kabi ajralmas qon-qarindosh xalqlar – oʻzbek bilan qoraqalpoqni birini-biridan ajrataman, deganlar yanglishadilar. Chunki Oʻzbekistonning qaysi tumani yoki viloyatiga bormang, har oʻzbekning bir qoraqalpoq qondoshi, har bitta qoraqalpoqning bir oʻzbek qarindoshi va qurdoshi bor. Birining otasi yoki onasi, yana birlarining enasi va momosi qoraqalpoq, yo oʻzbek boʻlgan bu bagʻrikeng, oʻzaro ahil-inoq, totuv ikki millatga bugun mojaro emas, tinchlik, xotirjamlik, farovon hayot kerak. Prezidentimiz aytganlariday: “bu ikki xalqning ezgu maqsadi – birgalikda mehnat qilib, Yangi Oʻzbekistonda har tomonlama rivojlangan, obod va farovon Yangi Qoraqalpogʻistonni bunyod etishdir”.

Men Prezidentimizning Qoraqalpogʻistonning buguni, kelajagi va et bilan tirnoq kabi ajralmas millatlar doʻstligi haqidagi soʻzlarini hayajon bilan tinglarkanman, koʻz oʻngimda kun sayin oʻzgarib, yangilanib borayotgan Qoraqalpogʻistonning eng olis tuman va qishloqlari, bu oʻzgarishlardan, oʻz  hayotlariga kirib kelayotgan yangilanishlar, farovonlikdan rozi qoraqalpoq doʻstlarim, ularning toʻkin-sochin hayoti gavdalandi. Ana shu toʻkislikda farzandlari, nevaralari bilan tonglarni xotirjam, osuda qarshilayotgan xalq uchun tinchlik neʼmatidan boshqa yana nima kerak? Hech narsa! Chunki, tinchlik hokim boʻlgan joyda taraqqiyot bor, yangilanish bor. Taraqqiyot esa har qanday xalqni maʼnan yuksaltiradi. Maʼnaviyati yuksak xalqni esa hech qanday kuch yenga olmaydi. Bugungi Qoraqalpogʻiston xalqi – biz ana shunday maʼnaviy yuksaklik sari qadam qoʻyayotgan, Yangi Qoraqalpogʻistonni bunyod etishga qodir kuchli xalqmiz. Koʻpmillatli Yangi Oʻzbekistonning eng teran, metin va mustahkam ildizimiz.

Robiya YOʻLDOShEVA, Qoraqalpogʻistonda xizmat koʻrsatgan jurnalist.