ҲАРБИЙЛАР ИШТИРОКИДА “АСКАР ОНАЛАРИНИ ШАРАФЛАЙМИЗ” ДЕБ НОМЛАНГАН ТАДБИР ЎТКАЗИЛДИ
6 январь куни Амударё туманидаги 76-сонли мактабда “Миллий армиямиз – Янги Ўзбекистоннинг мустаҳкам қалқонидир” шиори остида ҳарбийлар ва ёшлар иштирокида “Аскар оналарини шарафлаймиз” деб номланган маънавий-маърифий тадбир бўлиб ўтди.
Тадбирда туман ҳудудидаги ҳарбий қисм командири, подполковник Руҳиддин Ғаниев, ҳарбий қисм командирининг тарбиявий ва мафкуравий ишлар бўйича ўринбосари капитан Алибек Қодиров, шу ҳарбий қисмда муддатли хизмат бурчини ўтаётган аскарлар, туман Мудофаа бўлими, Ёшлар агентлиги туман бўлими масъуллари қатнашишди. Шунингдек, турли вилоятлардаги ҳарбий қисмларда муддатли хизматда бўлган туманимиздаги аскар йигитларнинг оналари, мактаблардаги ёшларни чақириққа тайёрлаш фани ўқитувчилари, ўқувчи-ёшлар ҳам иштирок этишди.
Ҳарбий қисм командирининг тарбиявий ва мафкуравий ишлар бўйича ўринбосари капитан Алибек Қодиров олиб борган ушбу тадбирда 14248-ҳарбий қисм командири Руҳиддин Ғаниев сўзга чиқди ва Президентимизнинг 2022 йил 14 декабрдаги “Ўзбекистон Республикаси Қуролли Кучлари ташкил этилганининг 31 йиллигини ҳамда Ватан ҳимоячилари кунини нишонлашга тайёргарлик кўриш ва ўтказиш чора-тадбирлари тўғрисида”ги фармойишига асосан, мамлакатимизда “Миллий армиямиз – Янги Ўзбекистоннинг мустаҳкам қалқонидир!” шиори остида жойларда маданий-маърифий, ҳарбий ватанпарварлик ва бошқа тадбирлар ўтказилаётгани ҳақида гапирди.
Шунингдек, ёшларга Қуролли Кучларимиз фаолияти, мамлакатимиз мудофаа салоҳиятини кучайтириш ва ҳарбий хизматнинг нуфузини ошириш бўйича амалга оширилаётган ишлар хусусида тўхталди. Ундан ташқари, аскар оналарини шарафлашга бағишланган ушбу тадбир яхши анъанага айланиб бораётгани, бугунги тинч ва осойишта ҳаётимизни, сарҳадларимиз дахлсизлигини таъминлаётган Ватан посбонлари оналари эъзоз ва ҳурматга лойиқлигини эътироф этиб, уларнинг номига илиқ сўзлар айтди.
Тадбир давомида ҳарбий қисмда муддатли ҳарбий хизмат бурчини ўтаётган аскар йигитлар ҳам Ватан ҳимоячиси, деган шарафли номга лойиқ бўлиш ҳар бир йигитнинг орзуси, айни пайтда муқаддас бурчи эканлигини айтиб, шу шарафли бурчини ўташ чоғида Миллий армия мудофаа салоҳиятини, Қуролли Кучларимизнинг қудратини ҳис қилганини сўзлаб беришди. Гитарада Ватан, она ҳақида қўшиқлар куйлаб, тадбирга янада жўшқинлик бахш этдилар. Улар ижросидаги шўх қўшиқлар дилрабо рақсларга уланди. Қувончдан тўлиб-тошган оналар ҳамда аскарлар, тадбир иштирокчилари даврани тўлдириб рақсга тушдилар.
Шундан сўнг, аскар оналари Умида Мавлонова, Ширин Отажонова, Хосият Сафарбоева, Дилдора Авезбоевалар ҳам сўзга чиқиб, Ватанимиз тинчлигини ҳимоя қилаётган мард аскарлар сафида ўғли борлигидан фахрланишини, ўзларини дунёдаги энг бахтли она, деб ҳис қилишини ҳаяжон билан ифода этишди. Президентимиз раҳнамолигида профессионал Миллий армияни шакллантириш, ҳарбий хизматчилар ва уларнинг оила аъзоларига муносиб турмуш шароити яратиш борасида амалга оширилаётган изчил ишлар самарасида Қуролли Кучларимиз сафида хизмат қилиш ҳар бир йигитнинг муқаддас бурчига, фарзандини армия сафларида кўриш эса ота-оналарнинг эзгу орзусига айланаётганини таъкидлашди.
Таассуротларга тўла бўлган тадбирда ўқувчи-ёшларнинг Миллий армия, Қуролли Кучларимиз салоҳияти, олий ҳарбий таълим ўқув юртлари тўғрисидаги саволларига ҳам батафсил жавоблар берилди.
О.Худойберганова.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
