HARBIYLAR IShTIROKIDA “ASKAR ONALARINI ShARAFLAYMIZ” DEB NOMLANGAN TADBIR OʻTKAZILDI

6-yanvar kuni Amudaryo tumanidagi 76-sonli maktabda “Milliy armiyamiz – Yangi Oʻzbekistonning mustahkam qalqonidir” shiori ostida harbiylar va yoshlar ishtirokida “Askar onalarini sharaflaymiz” deb nomlangan maʼnaviy-maʼrifiy tadbir boʻlib oʻtdi.

Tadbirda tuman hududidagi harbiy qism komandiri, podpolkovnik Ruhiddin Gʻaniyev, harbiy qism komandirining tarbiyaviy va mafkuraviy ishlar boʻyicha oʻrinbosari kapitan Alibek Qodirov, shu harbiy qismda muddatli xizmat burchini oʻtayotgan askarlar, tuman Mudofaa boʻlimi, Yoshlar agentligi tuman boʻlimi masʼullari qatnashishdi. Shuningdek, turli viloyatlardagi harbiy qismlarda muddatli xizmatda boʻlgan tumanimizdagi askar yigitlarning onalari, maktablardagi yoshlarni chaqiriqqa tayyorlash fani oʻqituvchilari, oʻquvchi-yoshlar ham ishtirok etishdi.

Harbiy qism komandirining tarbiyaviy va mafkuraviy ishlar boʻyicha oʻrinbosari kapitan Alibek Qodirov olib borgan ushbu tadbirda 14248-harbiy qism komandiri Ruhiddin Gʻaniyev soʻzga chiqdi va Prezidentimizning 2022-yil 14-dekabrdagi “Oʻzbekiston Respublikasi Qurolli Kuchlari tashkil etilganining 31 yilligini hamda Vatan himoyachilari kunini nishonlashga tayyorgarlik koʻrish va oʻtkazish chora-tadbirlari toʻgʻrisida”gi farmoyishiga asosan, mamlakatimizda “Milliy armiyamiz – Yangi Oʻzbekistonning mustahkam qalqonidir!” shiori ostida joylarda madaniy-maʼrifiy, harbiy vatanparvarlik va boshqa tadbirlar oʻtkazilayotgani haqida gapirdi.

Shuningdek, yoshlarga Qurolli Kuchlarimiz faoliyati, mamlakatimiz mudofaa salohiyatini kuchaytirish va harbiy xizmatning nufuzini oshirish boʻyicha amalga oshirilayotgan ishlar xususida toʻxtaldi. Undan tashqari, askar onalarini sharaflashga bagʻishlangan ushbu tadbir yaxshi anʼanaga aylanib borayotgani, bugungi tinch va osoyishta hayotimizni, sarhadlarimiz daxlsizligini taʼminlayotgan Vatan posbonlari onalari eʼzoz va hurmatga loyiqligini eʼtirof etib, ularning nomiga iliq soʻzlar aytdi.

Tadbir davomida harbiy qismda muddatli harbiy xizmat burchini oʻtayotgan askar yigitlar ham Vatan himoyachisi, degan sharafli nomga loyiq boʻlish har bir yigitning orzusi, ayni paytda muqaddas burchi ekanligini aytib, shu sharafli burchini oʻtash chogʻida Milliy armiya mudofaa salohiyatini, Qurolli Kuchlarimizning qudratini his qilganini soʻzlab berishdi. Gitarada Vatan, ona haqida qoʻshiqlar kuylab, tadbirga yanada joʻshqinlik baxsh etdilar. Ular ijrosidagi shoʻx qoʻshiqlar dilrabo raqslarga ulandi. Quvonchdan toʻlib-toshgan onalar hamda askarlar, tadbir ishtirokchilari davrani toʻldirib raqsga tushdilar.

Shundan soʻng, askar onalari Umida Mavlonova, Shirin Otajonova, Xosiyat Safarboyeva, Dildora Avezboyevalar ham soʻzga chiqib, Vatanimiz tinchligini himoya qilayotgan mard askarlar safida oʻgʻli borligidan faxrlanishini, oʻzlarini dunyodagi eng baxtli ona, deb his qilishini hayajon bilan ifoda etishdi. Prezidentimiz rahnamoligida professional Milliy armiyani shakllantirish, harbiy xizmatchilar va ularning oila aʼzolariga munosib turmush sharoiti yaratish borasida amalga oshirilayotgan izchil ishlar samarasida Qurolli Kuchlarimiz safida xizmat qilish har bir yigitning muqaddas burchiga, farzandini armiya saflarida koʻrish esa ota-onalarning ezgu orzusiga aylanayotganini taʼkidlashdi.

Taassurotlarga toʻla boʻlgan tadbirda oʻquvchi-yoshlarning Milliy armiya, Qurolli Kuchlarimiz salohiyati, oliy harbiy taʼlim oʻquv yurtlari toʻgʻrisidagi savollariga ham batafsil javoblar berildi.

O.Xudoyberganova.