Фаровон маҳалласи ҳудудида янги уйлар қурилиши бошланди

Мамлакатимизда олиб борилаётган халқчил ва оқилона сиёсат юртимизнинг барча ҳудудларида яшовчи аҳоли ҳаётида ўзининг ижобий натижасини кўрсатмоқда. Жумладан, Амударё туманининг маркази, овул ва маҳаллаларида ҳам катта бунёдкорлик ишлари амалга оширилиб, маҳаллалар кўркам қиёфа касб этмоқда. Туманнинг меъморий қиёфасини яхшилаш, янги-янги бинолар барпо қилиш ва ҳудудларни ободонлаштириш ишлари замирида аввало, одамлар учун муносиб турмуш шароити яратиш мақсади мужассамдир.

Давлатимиз раҳбари ташаббуси билан 2017 йилдан бошлаб мамлакатимиз бўйлаб турар жойга муҳтож оилалар учун арзон ва ҳар томонлама қулай уй-жойлар қурилиши бошланган эди. Амударё туманида ҳам ўтган йиллар давомида кенг кўламдаги бунёдкорлик ишлари амалга оширилди. Биргина ўтган 2022 йил давомида Гулзор маҳалласи ҳудудида 15,6 млрд.сўм маблағ эвазига 3 та 5 қаватли, жами 90 та хонадонга мўлжалланган уй-жойлар қурилди. Ушбу иморатларнинг қуриб битказилгани ва фойдаланишга топширилгани уй-жойга муҳтож юртдошларимиз учун катта совға бўлди.

Бунёдкорлик ишларини изчил давом эттириш ҳамда аҳолини арзон уй-жойлар билан таъминлаш мақсадида жорий 2023 йилда Манғит шаҳрининг Фаровон маҳалласи ҳудудида буюртмачи ташкилотлар томонидан 6 та, тадбиркорлар томонидан 4 та, ҳар бирининг қиймати 5,5 млрд. сўмлик бўлган жами 10 та кўп қаватли турар жойлар қуриш режалаштирилган.

6 январь куни тендер савдоларида ғолиб бўлган “Amudaryo maxsus qurilish” масъулияти чекланган жамияти томонидан қурилиши режалаштирилган 4 та 5 қаватли жами 140 хонадондан иборат уй-жойларнинг тамал тошини қўйиш маросими бўлиб ўтди.

Тадбирда Қорақалпоғистон Республикаси қурилиш вазири Азимжон Қурбанбаев, Қорақалпоғистон Республикаси Вазирлар Кенгашининг Қурилиш масалалари бўйича котибият бошлиғи Жахонгир Якубов, туман ҳокими ўринбосари Нодирбек Камолов, маҳалла фуқаролар йиғинлари раислари, имом-хатиблар, нуронийлар ҳамда кенг жамоатчилик вакиллари иштирок этишди.

Қорақалпоғистон Республикаси Қурилиш вазири Азимжон Қурбанбаев кейинги йилларда қурилаётган арзонлаштирилган уй-жойларнинг асосий қисми ижтимоий ҳимояга, уй-жойга муҳтож, кўп болали оилалар фарзандлари учун ажратилаётганини таъкидлаб, бу мамлакатимизда юритилаётган халқчил сиёсатнинг ёрқин намунаси эканлигини айтиб ўтди.

Маҳалла фуқаролар йиғини раиси Мадамин Казаков Фаровон маҳалласида қурилаётган янги уйларнинг автомобиль йўллари, сув, газ ва электр тармоқлари, болалар боғчалари, савдо шохобчалари, спорт майдончалари билан биргаликда қуриб битказилиши аҳолининг қулай шарт-шароитларда яшаши учун комплекс тизим ҳосил қилишини таъкидлади.

Маҳалла нуронийлари ва имом-хатиби тамал тоши қўйилаётган кўп қаватли уйларда одамлар тинч-фаровон яшашини, хонадонларда фақат яхши кунлар, тўйлар бўлишини тилаб дуога қўл очди.

Шундан сўнг, қурилиш ҳудудига рамзий қозиқ қоқиш маросими бўлиб ўтди ва янги уйларнинг тамал тоши қўйилди.

Пудратчи ташкилот вакиллари Фаровон маҳалласида бунёд этилажак мазкур уй-жойларни сифатли тарзда, қисқа муддатларда қуриб битказиш учун бор куч ва имкониятлларини сафарбар қилишларини таъкидлаб, қурилиш ишларини бошлаб юбордилар.

Туман ҳокимлигининг Ахборот хизмати