ВАТАН ҲИМОЯЧИЛАРИ КУНИГА БАҒИШЛАНГАН ТАДБИРЛАР ЎТКАЗИЛДИ

Халқимиз тинчлиги, осойишталигини кўз қорачиғидай асраётган армиямиз нуфузи ва обрўси тобора ошиб бормоқда. Ҳар йили масъулиятли  соҳа ходимлари байрами 14 январь – Ватан ҳимоячилари кунини муносиб нишонлаш анъанага айланган.

Сана муносабати билан туманимизда ҳам  турли тадбирлар ўтказилмоқда, фахрий ҳарбий хизматчилар билан учрашувлар ташкил этилмоқда ва Ўзбекистон Республикаси Қуролли кучлари жанговар қобилияти тобора кучайиб, ҳар қандай таҳдидларни бартараф эта оладиган мустаҳкам кўрғонга айлангани муносиб эътироф этилмоқда.

Шу йилнинг 7 январида Тўлқин овулида овул фуқаролар йиғини  маъмурий биносида ҳарбий ватанпарварлик ойлиги доирасида овул ёшлари етакчиси Фозилбек Қурбонбоев ташаббуси билан “Ватан ҳимояси – муқаддас бурч” деб  номланган тадбир бўлиб ўтди. Унда ҳудуддаги мактаблар чақириққа қадар тайёргарлик фани ўқитувчилари  Тўлибой Йўлдошев, Нодир Ҳайитбоевлар, заҳирадаги подполковник  Баҳодир Отамуродов, “Темурбеклар мактаби” тарбияланувчиси  Алибек Ўрозбоевлар ва овулнинг  фаол ёшлари иштирок этдилар.

Тадбирда меҳмонлар Ватан ҳимояси муқаддас бурч эканлиги, Ватан хизматига шай бўлиш учун ҳам маънан, ҳам жисмонан етук бўлмоқ лозимлигини таъкидладилар, ҳарбий соҳадаги фаолиятига доир қизиқарли воқеалардан гапириб бердилар.

Тадбирда ёшлар уларга ўзларини қизиқтирган саволларни бериб, жавоблар олдилар.

***

Шу йилнинг 9 январида Арна бўйи маҳалласида жойлашган 27-сонли мактабда маҳалла ёшлар етакчиси Шаҳзод Нуратдинов ташаббуси билан 14 январь – Ватан ҳимоячилари кунига бағишлаб юқори синфлар ўқувчилари ўртасида “Посбониман муқаддас юртнинг” деган мавзуда иншолар танлови ўтказилди.

Танлов иштирокчилари ўз она юртини севишини, корига яраш учун, элга нафи тегадиган инсон бўлиб вояга етиш учун қунт билан ўқиб-ўрганаётганликларини, шунингдек, спорт билан мунтазам шуғулланиб жисмонан етук бўлишга интилаётганликларини равон ва ўқишли тарзда баён этишган.

Ҳакамлар ҳайъати аъзолари қарорига кўра Т.Жиямуродова, Р.Сафарбоева, С.Ғофурова, У.Аширбоеваларнинг ёзган иншолари энг бадиий жиҳатдан пишиқ, мазмунли деб топилди.

Танлов ғолиблари рағбатлантирилди.

Севара Исмоилова.