VATAN HIMOYaChILARI KUNIGA BAGʻIShLANGAN TADBIRLAR OʻTKAZILDI

Xalqimiz tinchligi, osoyishtaligini koʻz qorachigʻiday asrayotgan armiyamiz nufuzi va obroʻsi tobora oshib bormoqda. Har yili masʼuliyatli  soha xodimlari bayrami 14-yanvar – Vatan himoyachilari kunini munosib nishonlash anʼanaga aylangan.

Sana munosabati bilan tumanimizda ham  turli tadbirlar oʻtkazilmoqda, faxriy harbiy xizmatchilar bilan uchrashuvlar tashkil etilmoqda va Oʻzbekiston Respublikasi Qurolli kuchlari jangovar qobiliyati tobora kuchayib, har qanday tahdidlarni bartaraf eta oladigan mustahkam koʻrgʻonga aylangani munosib eʼtirof etilmoqda.

Shu yilning 7-yanvarida Toʻlqin ovulida ovul fuqarolar yigʻini  maʼmuriy binosida harbiy vatanparvarlik oyligi doirasida ovul yoshlari yetakchisi Fozilbek Qurbonboyev tashabbusi bilan “Vatan himoyasi – muqaddas burch” deb  nomlangan tadbir boʻlib oʻtdi. Unda hududdagi maktablar chaqiriqqa qadar tayyorgarlik fani oʻqituvchilari  Toʻliboy Yoʻldoshev, Nodir Hayitboyevlar, zahiradagi podpolkovnik  Bahodir Otamurodov, “Temurbeklar maktabi” tarbiyalanuvchisi  Alibek Oʻrozboyevlar va ovulning  faol yoshlari ishtirok etdilar.

Tadbirda mehmonlar Vatan himoyasi muqaddas burch ekanligi, Vatan xizmatiga shay boʻlish uchun ham maʼnan, ham jismonan yetuk boʻlmoq lozimligini taʼkidladilar, harbiy sohadagi faoliyatiga doir qiziqarli voqealardan gapirib berdilar.

Tadbirda yoshlar ularga oʻzlarini qiziqtirgan savollarni berib, javoblar oldilar.

***

Shu yilning 9-yanvarida Arna boʻyi mahallasida joylashgan 27-sonli maktabda mahalla yoshlar yetakchisi Shahzod Nuratdinov tashabbusi bilan 14-yanvar – Vatan himoyachilari kuniga bagʻishlab yuqori sinflar oʻquvchilari oʻrtasida “Posboniman muqaddas yurtning” degan mavzuda insholar tanlovi oʻtkazildi.

Tanlov ishtirokchilari oʻz ona yurtini sevishini, koriga yarash uchun, elga nafi tegadigan inson boʻlib voyaga yetish uchun qunt bilan oʻqib-oʻrganayotganliklarini, shuningdek, sport bilan muntazam shugʻullanib jismonan yetuk boʻlishga intilayotganliklarini ravon va oʻqishli tarzda bayon etishgan.

Hakamlar hayʼati aʼzolari qaroriga koʻra T.Jiyamurodova, R.Safarboyeva, S.Gʻofurova, U.Ashirboyevalarning yozgan insholari eng badiiy jihatdan pishiq, mazmunli deb topildi.

Tanlov gʻoliblari ragʻbatlantirildi.

Sevara Ismoilova.