Динимизда Ватанни ҳимоя қилиш - улуғ амал

Она Ватан! Нима учун Ватанни она сўзи билан ёнма-ён ишлатамиз? Чунки, Ватан ҳам онамиз сингари азиз, меҳрибон ва қадрлидир. Инсон дунёга келмасидан аввал онанинг вужудида улғайса, дунёга келганидан кейин эса энди Она Ватанда униб ўсади. Кишининг туғилганда киндик қони тўкилган ер унинг Ватани ҳисобланилади. Мана шу Ватанини асраб-ардоқлаш, химоя қилиш хар бир инсоннинг муқаддас бурчидир.

Бу йил Республикамиз Қуролли Кучлари ташкил топганига 30 йил тўлади. Бундай қисқа вақт давомида миллий армиямиз ҳеч бир мамлакатдан ортда қолмайдиган даражадаги қурол-аслаҳаларга, жанговор ускуналарга эга бўлди. Республикамиз Қуролли Кучларида хизмат қилаётган аскарларнинг савияси эса ҳам маънан, ҳам жисмонан юксак даражага етиб улгирди десак асло муболаға қилмаган бўламиз. Юртитмизда хар йили 14-январь куни «Ватан ҳимоячилари куни» га бағишлаб турли байрам дастурлари, кўрик-танловлар, давра сухбатлари, мусобақалар ўтказилади ва ўз Ватанига чин садоқат билан ҳизмат қилиб келаётган бир қатор харбийларимиз юксак давлат мукофотлари билан тақдирланади. Бундай дастурлар Ватанимиз ҳимоячиларини рағбатлантиришга ҳизмат қилибгина қолмай , атрофдаги ёшларга ватанга меҳр-муҳаббат, ватанимиз ҳимоячиларига нисбатан юксак эҳтиром туйғуларини шакилланиб боришига ёрдам беради ва бўлажак Ватан ҳимоячилари маънавиятларини юқори даражага кўтариб, жисмонан бақувват, ақлан етук, сергак бўлиб камолотга етишишларида катта аҳамият касб этади.

Дархакикат, Ватан - мукаддас макон. Уни ҳимоя килиш, душманлардан асраш, унинг равнаки ва фаровонлиги йўлида хизмат қилиш хар бир инсон учун ҳам фарз, хам  карздир. Динимизда Ватанни химоя қилиш ишига ўзини бахшида этиш энг улуғ савобли амаллардан эканлиги айтилган. Бу тўғрида Пайғамбаримиз саллаллоху алайхи васаллам шундай деганлар: "Икки кўз эгасини дўзах оташи куйдирмас: бири -Аллоҳнинг қўрқиб йиғлаган кўз, иккинчиси - Аллоҳ йўлида қўриқчилик қилиб бедор бўлган кўз" (Имом Термизий ривоятлари). Уламолар "Аллоҳ йўлида қўриқчилик қилиб бедор бўлган кўз" иборасини Аллох таолонинг йўлида Ватан сарҳадларини душманлардан сақлаш, инсонлар тинчлик-осойиштилагини таъминлаш учун қўриқчилик қилган кўз соҳиби деб шархлаганлар. Ҳар бир фукаро ўз Ватанини севса, уни химоя қила олса, ана шундагина Ватан ва унинг халқи ривожланади, тараққий топади. Ватанни қўриқлаш ва уни ҳимоя  қилиш фақат Ватан химоячиларини эмас балки, хар бир юрт вакилининг бурчидир. Шундай экан, ҳар биримиз киндик қониниз тўкилган ушбу Ватанни, шу мустақил юртни кўз қорачиғимиздай асраб-авайлашимиз - оиламиз, шаънимиз, ор-номусимиз ва имон-эътикодимизни химоя қилиш кабидир. Аллох таоло Юртимизни тинчлик осойишталигини абадий қилсин. ОМИН!

Ўктам Қурбаниязов Нўғой эшон жомеъ масжиди имом хатиби