НУРОНИЙЛАРНИНГ ҲАЁТИЙ ТАЖРИБАЛАРИ ЁШЛАР УЧУН ИБРАТ МАКТАБИ БЎЛМОҚДА

Халқимизда азалдан ёши улуғ, кекса отахон ва онахонларга эҳтиром кўрсатилиб, уларнинг умри давомидаги эзгу иш ва амалларидан ибрат олинади. Зеро, йиллар давомида элига хизмат қилган, эндиликда бой меҳнат тажрибаси, ҳаётий ҳикматлари, пурмаъно сўзлари билан жамият тараққиётига ҳисса қўшаётган нуронийларнинг панд-насиҳатлари эртанги кунга пойдевор десак, асло муболаға бўлмайди. Дарҳақиқат, ҳар бир юртнинг тараққиёти, аввало, ана шу ҳудудда яшовчи аҳолининг билими, тажрибаси, тарбияси ва маънавий юксаклигига боғлиқ. Ёшлар тарбиясида кексаларнинг бой ҳаётий тажрибаларидан кенг фойдаланиш муҳим аҳамиятга эга.

Оқ олтин овулида ҳам фуқаролар йиғини хотин-қизлар фаоли Моҳира Якубова ҳамда туман Маҳалла ва нуронийларни қўллаб-қувватлаш бўлими қошидаги “Бувижонлар мактаби” жамоатчилик кенгаши раиси Хонимжон Ражабова ташаббуси билан “Бувижоним кийган либослар”, “Замонавий ўзбек қизининг кўрки – узун соч ва миллий либос”, “Мустаҳкам оила жамият кўрки” мавзуларидаги давра суҳбатлари, маънавий-маърифий тадбирлар ташкил этилиб, ўсмир қизлар, ёш оила соҳибалари, келинларнинг тушунчалари, дунёқарашлари кенгайтирилмоқда. Ҳудудда муаммоли оилаларни аниқлаб, улардаги оилавий келишмовчиликларни, қайнона-келин, келин-куёвлар, шунингдек, қўни-қўшнилар ўртасидаги муаммоларни бартараф этишга қаратилган тадбирлар мунтазам ўтказиб келинаётгани, тарғибот-ташвиқот ишларига 85 ёшли Олламберган ота Ражабов ҳамда 82 ёшли Турсуной момо Ражабова каби овулдаги нуронийлар жалб этилаётгани, уларнинг ўгит-насиҳатларига амал қилиниб келинаётгани натижасида деярли барча хонадонларда тинчлик, тотувлик ҳукмрон. Ўтган йил мобайнида фуқаролар йиғини ҳудудида оилавий ажримларнинг олди олиниб, бирорта ҳам бундай ҳолат қайд этилмади.

Ҳаёт йўли ёшлар учун ибрат мактабига айланган, ярим асрдан зиёд умрини бирга кечириб келаётган Олламберган ота Ражабов ҳамда Турсуной момо Ражабовалар биргаликда 2 ўғил ва 2 қизни деҳқончилик қилиб топган даромади билан улғайтиришди. Турмуш қийинчиликларини сабр-у бардош билан енгиб, фарзандларини эл корига ярайдиган, одоб-икромли қилиб тарбиялашди. Ўғилларни уйлантириб, келинлар олишди, қизларни эса узатишди, уйли-жойли қилишди. Ҳатто невара келинлар тушириб, невара қизларни ҳам узатишди. Ҳозирги кунда 30 нафарга яқин невара, 17 нафар чевараларнинг севимли бобо-бувилари бўлган бу пиру-бадавлатлар нафақат ўз хонадонларидаги, балки овулдаги бошқа оилалардаги келинларга, йигит-қизларга ўгитлар, насиҳатлар бериб, ёшларнинг имон-эътиқодли, миллий одоб ва урф-одатлар руҳида тарбияланишига ўз ҳиссаларини қўшиб келишмоқда. Овул аҳолиси ҳам ёши улуғларнинг тўй ва бошқа оилавий тадбирларни ихчам, кам чиқим тарзда, белгиланган тартиб-қоидалар асосида ўтказиш, миллий урф-одат, анъана ва маросимларни тартибли ташкил этиш кабилар бўйича бой ҳаётий тажрибаларидан келиб чиқиб бераётган қимматли маслаҳатларига амал қилишгани натижасида бундай тадбирлар ҳамжиҳатликда, тинч-тотувликда файзли ўтади.

Донишмандлар, энг катта бойлик — бу ақл-заковат ва илм, энг катта мерос — бу яхши тарбия, энг катта қашшоқлик – бу билимсизликдир, дея бежизга айтишмаган. Шу боис туман Маҳалла ва нуронийларни қўллаб-қувватлаш бўлими қошида ташкил этилган “Бувижонлар мактаби” жамоатчилик кенгаши томонидан ёшларни оилавий ҳаётга руҳий-маънавий жиҳатдан тайёрлаш, оилавий ажримларнинг олдини олиш кабилар борасида нуроний отахонлар ва бувижонларнинг ҳаётий тажрибаларидан унумли фойдаланилмоқда.

Ўзининг ибратли ҳаёти билан бошқаларга ўрнак бўлиб, ёшларга тарбиявий аҳамиятга эга фикрларини сингдира оладиган нуроний онахонларни ўз атрофига бирлаштирган “Бувижонлар мактаби” жамоатчилик кенгаши раиси Хонимжон Ражабова фуқаролар йиғинларидаги кенгаш масъуллари билан ҳамкорликда бу борада айтишга арзигулик ишларни амалга оширмоқда. Бой ҳаётий тажрибага эга бўлган ёши улуғларни ижтимоий ҳаётга жалб этиб, оилалардаги маънавий муҳитни яхшилашга ўз ҳиссасини қўшмоқда.

Озода Худойберганова.