ЎТГАН ЙИЛИ ТУМАН ДХМ ТОМОНИДАН 60105 ТА ДАВЛАТ ХИЗМАТИ КЎРСАТИЛГАН

Юртимизнинг барча ҳудудларида давлат хизматлари марказлари жадал суръатларда ривожланиб, кўрсатиладиган хизматлар сони ҳам тобора ортиб бормоқда. Мазкур соҳада давлат органлари ва бошқа ташкилотлар билан ўзаро яқин ҳамкорлик тизими ўрнатилиб, давлат органлари ва бошқа ташкилотлар ўртасида электрон ҳужжат айланиши тартиби жорий қилингани, соддалаштирилган ҳолда тезкор давлат хизматлари кўрсатилаётгани натижасида фуқаролар ва тадбиркорларга жуда катта қулайликлар яратилмоқда.

Амударё туманида ҳам Давлат хизматлари маркази ва Ягона интерактив давлат хизматлари портали орқали ўтган йил давомида жисмоний ва юридик шахслар 60105 та давлат хизматидан фойдаланишган. Шунингдек, 355 та юридик корхоналар, 1276 нафар якка тартибдаги тадбиркорлар янгидан, 280 та юридик корхоналар, 56 нафар якка тартибдаги тадбиркорлар эса қайта давлат рўйхатидан ўтказилган.

Ушбу давр мобайнида кўрсатилган сайёр тартибдаги давлат хизматлари сони 3338 тани ташкил қилади. Давлат хизматлари марказининг Хитой филиали орқали ҳам 5613 та давлат хизмати кўрсатилган.

Маълумки, Вазирлар Маҳкамасининг 2022 йил 28 сентябрь кунги “Фуқаролик ҳолати далолатномаларини ёзиш тартибларини янада такомиллаштириш чора-тадбирлари тўғрисида”ги тегишли Қарори билан туғилганликни тиббиёт муассасалари орқали ФҲДЁ бўлимларида қайд этиш тартиби 2023 йил 1 январдан Тошкент шаҳрида, 2023 йил 1 июндан эса бутун республика ҳудудида жорий этилади. Ўзбекистон Республикаси Адлия вазирлигининг никоҳ тузиш ва никоҳдан ажратишни қайд этиш учун туман Давлат хизматлари марказлари орқали аризаларни қабул қилиш бўйича эса Сирдарё вилоятида ҳуқуқий эксперимент ўтказилмоқда. Ушбу ҳуқуқий эксперимент 2022 йилнинг 1 ноябридан бошланган бўлиб, 2023 йилнинг 1 июлга қадар амалга оширилади.

Таъкидлаш жоизки, жисмоний ва юридик шахсларга кўрсатиладиган давлат хизматлари сони йил сайин ортиб, такомиллашиб бормоқда. Ўтган йил давомида электрон рақамли имзо калитларини бериш – 15 минг 255 та, кадастр соҳасига оид хизматлар – 12 минг 684 та, болани давлат мактабгача таълим муассасасига жойлаштириш – 8 минг 965 та, наркология ва руҳий касалликлар бўйича диспансер ҳисобида туриши ёки турмаслиги тўғрисида маълумотнома беришда – 5 минг 948 та, судланмаганлик ёки судланганлик тўғрисида маълумотнома беришда – 1 минг 602 та, электр тармоқларига уланиш учун техник шартларни беришда – 1 минг 495 та давлат хизматларидан фойдаланилган.

Мамлакатимизда аҳоли ва тадбиркорлик субъектларига шаффофлик, қулайлик ва соддалаштирилган ҳолда тезкор давлат хизматлари кўрсатиш мақсадида бугунги кунда кўрсатилаётган давлат хизматлари сони тобора ортмоқда. Жорий йилда ҳам фуқаро эътибор марказида тамойили асосида туман Давлат хизматлари маркази томонидан аҳоли ва тадбиркорларга қулайлик яратиш мақсадидаги чора-тадбирлар белгилаб олинди.

Айни пайтда туман Давлат хизматлари маркази орқали кўрсатилаётган барча хизматлардан туманимиз аҳолиси ва тадбиркорлар жуда мамнун.

Умида Сапарбоева, туман ДХМ ходими.