OʻTGAN YILI TUMAN DXM TOMONIDAN 60105 TA DAVLAT XIZMATI KOʻRSATILGAN

Yurtimizning barcha hududlarida davlat xizmatlari markazlari jadal surʼatlarda rivojlanib, koʻrsatiladigan xizmatlar soni ham tobora ortib bormoqda. Mazkur sohada davlat organlari va boshqa tashkilotlar bilan oʻzaro yaqin hamkorlik tizimi oʻrnatilib, davlat organlari va boshqa tashkilotlar oʻrtasida elektron hujjat aylanishi tartibi joriy qilingani, soddalashtirilgan holda tezkor davlat xizmatlari koʻrsatilayotgani natijasida fuqarolar va tadbirkorlarga juda katta qulayliklar yaratilmoqda.

Amudaryo tumanida ham Davlat xizmatlari markazi va Yagona interaktiv davlat xizmatlari portali orqali oʻtgan yil davomida jismoniy va yuridik shaxslar 60105 ta davlat xizmatidan foydalanishgan. Shuningdek, 355 ta yuridik korxonalar, 1276 nafar yakka tartibdagi tadbirkorlar yangidan, 280 ta yuridik korxonalar, 56 nafar yakka tartibdagi tadbirkorlar esa qayta davlat roʻyxatidan oʻtkazilgan.

Ushbu davr mobaynida koʻrsatilgan sayyor tartibdagi davlat xizmatlari soni 3338 tani tashkil qiladi. Davlat xizmatlari markazining Xitoy filiali orqali ham 5613 ta davlat xizmati koʻrsatilgan.

Maʼlumki, Vazirlar Mahkamasining 2022-yil 28-sentyabr kungi “Fuqarolik holati dalolatnomalarini yozish tartiblarini yanada takomillashtirish chora-tadbirlari toʻgʻrisida”gi tegishli Qarori bilan tugʻilganlikni tibbiyot muassasalari orqali FHDYo boʻlimlarida qayd etish tartibi 2023-yil 1-yanvardan Toshkent shahrida, 2023-yil 1-iyundan esa butun respublika hududida joriy etiladi. Oʻzbekiston Respublikasi Adliya vazirligining nikoh tuzish va nikohdan ajratishni qayd etish uchun tuman Davlat xizmatlari markazlari orqali arizalarni qabul qilish boʻyicha esa Sirdaryo viloyatida huquqiy eksperiment oʻtkazilmoqda. Ushbu huquqiy eksperiment 2022-yilning 1-noyabridan boshlangan boʻlib, 2023-yilning 1-iyulga qadar amalga oshiriladi.

Taʼkidlash joizki, jismoniy va yuridik shaxslarga koʻrsatiladigan davlat xizmatlari soni yil sayin ortib, takomillashib bormoqda. Oʻtgan yil davomida elektron raqamli imzo kalitlarini berish – 15 ming 255 ta, kadastr sohasiga oid xizmatlar – 12 ming 684 ta, bolani davlat maktabgacha taʼlim muassasasiga joylashtirish – 8 ming 965 ta, narkologiya va ruhiy kasalliklar boʻyicha dispanser hisobida turishi yoki turmasligi toʻgʻrisida maʼlumotnoma berishda – 5 ming 948 ta, sudlanmaganlik yoki sudlanganlik toʻgʻrisida maʼlumotnoma berishda – 1 ming 602 ta, elektr tarmoqlariga ulanish uchun texnik shartlarni berishda – 1 ming 495 ta davlat xizmatlaridan foydalanilgan.

Mamlakatimizda aholi va tadbirkorlik subʼektlariga shaffoflik, qulaylik va soddalashtirilgan holda tezkor davlat xizmatlari koʻrsatish maqsadida bugungi kunda koʻrsatilayotgan davlat xizmatlari soni tobora ortmoqda. Joriy yilda ham fuqaro eʼtibor markazida tamoyili asosida tuman Davlat xizmatlari markazi tomonidan aholi va tadbirkorlarga qulaylik yaratish maqsadidagi chora-tadbirlar belgilab olindi.

Ayni paytda tuman Davlat xizmatlari markazi orqali koʻrsatilayotgan barcha xizmatlardan tumanimiz aholisi va tadbirkorlar juda mamnun.

Umida Saparboyeva, tuman DXM xodimi.